السلام عليكم
بمان الموضوع طويل شوي رايح نقسمو لجزئين او 3
الجزء هذا فيه معلومات خفيفة حول البيرو،التاشيرة تاعها و معلومات تهم لي راحيين للسياحة
كيما تعرفو هي دولة لاتينية في غرب امريكا الجنوبية تحدها الاكوادور و كولومبيا و الشيلي
اللغة الرسمية الاسبانية و عاصمتها ليما
العملة تاعهم sol حيث تساوي 50 دج بسعر السوق السوداء
البيرو تفرض تاشيرة للجزائرين،الملف تقريبا كيما تاع شنغن يتكون من جواز سفر + نسخة، حجز وهمي للتذكرة،صورة خلفية بيضاء،حجز فندقي مؤكد او دعوة من البيرو،casier judiciaire,كشف حساب بنكي للاورو 3 اشهر لخرة،شهادة عمل او بطاقة طالب + ملف الضامن ( شوفو اول تعليق)
المهم ترجم كلش غير الباسبور للفرنسية،تتصل بالقنصلية لي جاية في الابيار،الجزائر العاصمة،تشد رونديفو بالهاتف و كي تروح دير مقابلة شكلية مع موظف قنصلي و تربح
سينون تحبو تسكانيو دوسي و تبعثوه بار ايمايل مي لازم تروح للقنصلية على جال المقابلة و باش تخلص 30 دولار ( تخلصها بدينار بالسعر تاع البنك).
المشكل انو التاشيرة تاعها من أصعب التاشيرات للجزائريين في امريكا الجنوبية خاصة اذا كنت شاب و درت دعوة من فتاة بيروفية راح تدي روفي sans voir،شوف كيفاش برك تقنع الموظف القنصلي بلي ماشي نيتك تزوج ولا تحرڨ.
التذكرة غالية شوي ،في افضل الحالات تترواح بين 14 الى 28 مليون
على العموم،المدن الكبرى امنة و الشعب تاعها مسالم و طيب جدا ماتحسش بحاجة اسمها العنصرية،اعرف برك وين دور و اخطيك من المشاكل,و حذاري من الحرقة ثما باسكو كي تكون حراق ماعندهمش حاجة اسمها حقوق الانسان
البيرو فيه العديد من الاماكن السياحية خاصة للناس لي تحب المغامرات و تخرج من المدينة مثل جبال الانديز،قلعة ماتشو بيتشو لي تعتبر من عجائب الدنيا 7،غابات الامازون،واحة هواكاتشينا،The Inca Trail
كاين زوج مدن سياحية تستحق الزيارة هي العاصمة ليما و مدينة كوسكو
حتى العاصمة تاعها رايحة في هافانا مخلطة مابين البنايات الكلاسيكية تاع حقبة الخمسينات و ناطحات السحاب الحديثة،و زيد مدينة ساحلية ذات تعداد 9 ملاين نسمة
الكراء رخيس جدا تقدر تكري شقة ب 15 دولار لليلة
الاكل الحلال مشكل شوي و صعبة باش تلقاه لقلة الجالية العربية و الاسلامية،مي الحوت و الخضر و الفواكه رخيسة تما،القهوة كي الماء ثم خاصة arabica.
المنشور القادم حول عقود العمل و الزواج اي الهجرة بصفة عامة
روح لاكوادور بدون فيزا و ادخل لبيرو حارق و فك عليك
من نيتك خويا تنصح فينا اخطيكم من ززواج والحرقة كاين انسان عاقل يحرق للبيرو 😂
بارك الله فيك خويا 🇵🇪🙏🏻❤️