السلام عليكم
حبيت نشارك معاكم تجربتنا الأسبوع الماضي في قضاء عطلتنا في مدينة القالة، فالاول عيينا نحوسو على كراء منزل مناسب وسهل ربي بعد عناء لقينا دار حسب هادا اللي كرانا فيها كل شي، هزينا حوايجنا ومشينا وصلنا لمدينة القالة وتلاقينا هاد السيد والا مرسول منو المهم دانا للدار اللي رايح يكريهانا واللي طلب فيها 400الف، طلعنا للطابق التالت بالتقل تاع الباڨاج وكاين اللي مايش قادر وصحتو على ڨدو من أفراد العائلة، دخلنا للدار مافيهاش كليم مافيهاش فراش عبارة عن بساطات مطايشين فالارض والدار ماهيش نظيفة ماعجبتناش بصح مانقدروش نروحو نفس النهار قلنالو نسلكو الليلة هادي وغدوا نخرجو ما قبلش وحب يسلك الايام اللي رايحين نقعدوهم فتحتمت علينا نخرجو برا ونبداو في اتصالاتنا قرابة الساعة وحنا مطايشين برا بالباڨاج حتى سهل ربي بدار احسن منها بشوية بتنا ليلتين وروحنا بعد ما كنا معولينا نڨعدو سمانة او اكتر. المهم نتمناو حوايج بزاف يتبدلو فيما يخص السياحة في بلادنا باه مانبقاوش نشوفو في بلدان مجاورة احسن منا وحنا عندنا مقومات اكبر من تعهم لكن عندنا وللاسف عقليات ….
البروبلام فيكم مشي واحد مشي زوج يكتب هنا بلي حتى لحق لهاديك الولاية باه بدا يحوس على ديار للكرية، الناس تكري ألافونص في غرضها وتساوم وتنيڨوصيي وتسقسي مشي آخر دقيقة وانت عيان تعبان قاعد تدور تحوس على ديار، مام الكراي كي يشوفك مزير ومزروب والليل قريب يطيح عليك وماعندكش حل اخر يبدا يضرب وخلاص ، دار تاع 3000 دج يكريهالك ب 6000 وتدخل وانت راضي، سورتو واحد مع العائلة لازم 15 يوم ولا شهر من قبل تحوسو على كرية غير في الفايسبوك تلقاو الخير، يصورلكم الدار تتفاهمو على السعر وتأكدو الكرية، حنا بابا يدير نهار يروح لهاديك الولاية يشوف الدار بعينو ويهدر مع الكراي ويشوف الظروف تاع الدار ادا كاين الماء تريسيتي ادا حي محترم .. باه عاد نرفدو صوالحنا ونقلعو
صرالنا نفس شي ولمشكل انو دار شافهالنا صاحب راجلي وبضمان وكلش لحقنا لمستغانم كارتة لاماعن لانقا لا ما لافراش بساطات برك قالما ياتريحو سمانة ياتروحو خرجنا ولينا لدار
صح نهار رحت للقالة ، شواطئ رائعة، و مناظر خلابة بصح ما فيهاش بزاف الإقامات و الفنادق. و كلينا في مطعم تحت كلمة متواضع.
نفس الشيء صرالنا في مستغانم تفاهمنا على كل شي ء و مبعد الدار كارثة خرجنا تم تم
بصح كلش راه كاين ضرك فايسبوك مسنجر قال ياخويا صورلي الدار واش فيها وديرلي فيديو بعثهلي نشوف سينون قال ياخويا غادي نعيطلك ابال فيديو وريهالي نشوفها
هنا و في منشورات مماثلة يختفي الشعب لي يظل يسب ف البلد الجار لي راها تستقبل الآلاف و لي يقولك حوس بلادك
و لي يقولك بلادنا مليحة و لي يقولك السياحة انتعشت في بلادنا
ان شاء الله ميغيضهمش الحال نصيحة
القالة والقل مكلاه تكونبي فيهم