السلام عليكم راني شفت بزاف منشورات على الكليماتيزور توقف والكل يتساءل ويقولك وش هو المشكل او المشكل من الاعدادات مثلا او

السلام عليكم
راني شفت بزاف منشورات على الكليماتيزور توقف والكل يتساءل ويقولك وش هو المشكل او المشكل من الاعدادات مثلا او الاخطاء لي قاعدة تظهر.
اولا وقبل كل شيء لازم تعرف شوية معلومات على المكيف تاعك حتى تقدر تشخص لوحدك.

1- المكيف تاعك قديم ولا جديد؟ وواش من بيئة موجه لها؟
المكيفات القديمة بالعادة متكونش تروبيكال، او مثل ما هو معروف بالرمز T3 على الوحدة الخارجية، اذا لاحظت ان المكيف تاعك يشتغل بالليل فقط او بالمساء ولكن اوقات الذروة لا يشتغل اعرف بلي مشكل كهرباء ناقصة بسبب الضغط والحمل الزائد او مشكلة حرارة زائدة.
حتى مكيفات تروبيكال ويمكن تتوقف بسبب الحرارة. فما بالك بمكيفات قديمة وتكون T1 وماشي تروبيكال؟ اذا كان المكيف يشعل 10 دقايق ويتوقف نص ساعة طفيه وما تشعلوش نصيحة لانه يمكن تتعطل الحماية الحرارية تاعو ويفسد الكومبريسور.

2- المكيف جديد ركبتو جديد ولكن ما يبردش؟
تاكد لي ركبلك المكيف سحب منه الهواء ودار فحص التسرب، خاصة اذا كان فيه الغاز من نوع 410، تاكد بلي 90 % اذا ركبتو وما فرغتش الدورة من الهواء رايح يكون التبريد تاعو ناقص جدا، تبدل الغاز ولا الكونداساتور ماهوش رايح ينفع. ما يغركش قيمة التركيب المنخفضة، شريت مكيف ب 8 ملاين كملها وخلص محترف يركبلك المكيف.

3- المكيف جديد، ركبو واحد محترف ولكن يبرد ناقص؟
لازم تدير حسابك للمكيف تاعك لي رايح تشتريه، مساحة الغرفة؟ مواجهتها للشمس؟ مكان وضع الوحدة الخارجية، اذا كنت حاط الوحدة الخارجية مقابلة الشمس من الصباح للعشية، الغرفة واسعة جدا ومقابلة الشمس بشكل مباشر، توقع انه المكيف رايح يطول جدا حتى يبرد الغرفة ورايح ما يتوقفش ويسخن ويسبب اعطال. اختار المكيف المناسب في المكان المناسب للغرفة المناسبة.

4- المكيف كان يبرد عادي لكن مؤخرا صار ناقص التبريد، الوحدة الداخلية فيها جليد، الانبوب الكبير يتجمد؟ ما هو السبب؟

ببساطة اخي المكيف يحتاج تنظيف!

5- ما معنى الرسائل لي تظهر على الوحدة الداخلية؟ E6-EC-E8؟
الرسائل تعني اشياء كثيرة حسب الكود لي يظهر كمثال E6 معناه الوحدة الداخلية ما تعملش تبادل حراري . الرسائل ذي تقريبا عامة على كل المكيفات لتسهيل التشخيل، ابحث بقوقل شوية ورايح تلقى حل.

ومرة اخرى الايام هاذي مع موجة الحر، اغلب الاعطاب لي تتسجل من الحرارة الشديدة وضعف التيار الكهربائي.
احذر تلغي عمل الكلاكسون (الحماية الحرارية)، احذر تشغله بدون انقطاع او ما تطفيهش كي يسخن، وطبعا ما تحطوش على 16 ودرجة الحرارة برا 60 🙂 ماهيش معقولة! اذا غابتلك وما عرفتش حطو بالوضع الالي .

واي استفسار ان شاء الله اجاوب قدر استطاعتي.