السلام عليكم
عندي رقم موبيليس شريتو من 2020 انا من باتنة وكاينة مراة اوخرى من سطيف عندها نفس الرقم تعي ويضالو ولادها وبناتها وراجلها يعيطولي ويقولولي هذا الرقم تع امنا دارولي ازعاج خواتاتها وبناتها يعطولي وكون غير يقولولي اسمحيلنا غلطنا لا هوما يزيدو في الهدرة مزعجين نضال نبلوكي في الارقام و مين هدرت معاهم قلتلهم اشرو رقم جديد لامكم ولا نشكي بيكم قالولي الله يسهل الرقم يبقى عندنا ورحت لاجونس تع موبيليس قالولي ماكانش منها هذي جامي صرات و هدر معايا غير هذاك الي يخدم في الريسيبشن و ماحبش يخليني نفوت وواحد ماصدقني ابار دارنا المشكل ضرك رقمي فاتحة بيه كلش وماداتو للناس قاع ومدايرة بيه بزااااف صوالح نحتاجهم كيما سوشل ميديا والذهبية ثان يوصلوهم الميساجات ليهم .. انا راني خممت نشكي بيهم بصح خايفة لا نكون انا اخر وحدة شرات الرقم ويقولولي نتي الي لازم تنحيه وهي يعني انا محتاجة الرقم ولوخرى غير مرأة كبيرة يعني تقدر دير اي رقم ضرك قولولي كشما واحد يخدم في موبيليس يقولي كيفه ندير ولا كشما حل ولا نبقى نبلوكي في الارقام وخلاص
#1001_help
نفس الشي مع الرقم تاع الوالد مي المشكل يصرا كي يخرج من ولاية باتنة و نعيطولو يهز علينا إنسان آخر و أرواح نتا فهمو بالمشكل هذا واش هو الحل الله أعلم
مام انا صراتلي!
كي فتحت فايبر ب نيميرو تاعي تاع جيزي بداو يوصلوني لي ميساج تاع ناس يسقسيو على صاحبهم، و قالولي بلي هذا نيميرو تاع صاحبهم و عندو شحاال وهو يمشي بيه!
وانا هاذ la puce من بكري عندي، مافهمت والو
تقنيا متصلحش . الرقمين مختلفين .
والله غير صرات لخويا شراء نيميرو جديد اوريدو بعد ربع اشهر عيطولو ناس من العاصمة يقولولو البورتابل لي بيعتهولي مسروق قالو خويا انا خاطاني قالو شريت بيس جديدة راك غلطان قالولو عندنا شهر وحنا نحكو مع لي باعلنا بورطابل مسروق ونعيطو لهذا نيميرو تاعوا قالهم خويا هدا نيميرو تاعي شريتو جديد غير في الصيف برك كيفاش انت في العاصمة وانا في جيجل ؟؟وبقاو يهددو فيه تع بالسيف انت هو والله غير مشكل كبير ننصح ناس ماتزيدش تشري نيميرو جديد وصاي
القصة أنه الرقم كان عند المرأة الأخرى في الأول و لعدم استعمالها له لمدة ثلاث أشهر يلغى أوتوماتكيا و يعاد بيعه لشخص آخر و أنت من اشترتيه لهذا هم يعتقدون أنه لأمهم. الحل هو اذا كان عند تلفون ذكي فعلي خاصية استقبال الأرقام المسجلة لديك فقط. هذا المشكل يقع فيه كثير من الناس.
جربي طقس تلفون تاعك و عيطي لنيميرو تاعك من هاتف آخر 🫤 بلاك صح نيميرو او عندهم ولا خرج مغلق سما راهم يحوسو غير على مشاكل ولا يكونو مدايرين رونفوا لنيميرو تاعك
روحي اشكي و ما تخافي من والو من غير الله
عندي وحدة صحبتي ثاني هكذا نعيط مرة يصوني عند صحبتي و مرة عند هاذيك المراة كل مرة بالزهر حتى المراة هاذيك كي تهز تقولي او انا مانيش الاستاذة بشرى او صونا عندي 😂
والله مام انا صراتلي كان عندي نيميرو و نفس النيميرو عند شخص آخر و توجور يعيطولي حتى بدلتو
هي حكاية ما تتصدقش اكيد هناك سوء فهم لكن تجيك في شويا تعب و بدليه احسن ما يدولك خدمة سنين ولا يبلوكولك حساباتك
إذا عندك رقم آخر (إذا ما عندكش اشري رقم آخر مع هذا)، روحي للموزع تاع البريد ودخلي البطاقة الذهبية خيري اللغة العربية ومبعد خيري تغيير الرقم وهناك يتغير الرقم تاعك ويدخلك ميساج في الهاتف
نفس الشيء بالنسبة للمواقع، تدخلي الاعدادت وتغيري الرقم
وتقدري تحتفظي بالرقم الثاني بيدما الناس توالف رقمك الجديد، انا هكا درت حتى فات عام باه بلعت الرقم لي كانو يزعجوني فيه
كيفه ينحو الرونفوا للرقم للجديد
الحل تروحي لموبيليس و مش كلمة وحدة يقنعك بها لازم يحوس على رقمك .
و من الاحسن ماتخليش الحال على ما هو عليه الان
قادر يدو لك حساباتك ناهيك عن الخصوصية 🤦🏻♂️
أنا دارنا عيطولي قالولي رفد علينا راجل ، كي عاودو دوزيام فوا حكموني نورمال مافهمتش علاش زعما!
Sratli 9bl , lazm tktbi wahd l code ctt ms nssit 3lih😑😑
الحل يا اختي هو انك تشري رقم جديد وتضيفيه لحساباتك في مواقع التواصل خاصة فيسبوك وانستا وزيد بدلي رقم البطاقة الذهبية بالرقم الجديد شوفي فاليوتيب الطريقة المهم بدلي كلش للرقم الجديد واصدقائك وعائلتك عادي مع الوقت يتأقلمو مع الرقم الجديد ومام الواتساب بدليه .انا هكا درت اذا كي بدلت الرقم وضرك راني برقم جديد ورقمي لاخر داه واحد اخر بصح ما قدر يأثر عني بحتى حاجة
#21*
بدلي نميرو وصاي اصلا ميديش منك 10 دقايق ونتي بدلتي نميرو تاع الفيس وصوالحك قاع وناس ترجعي تمديلها كيما مديتي فلول نتي عندك حل يريح الراس وباغية وجع الراس 😐
الأخرى غير مرة كبيرة وتقدر تدير اي رقم، زعما انت حاجة كبيرة من اجل توازن الكرة الارضية ويتصلوا بك من خارج الغلاف الجوي كممثلة النفايات البشرية
ماهوش نفس الرقم اكيد صراتلي قبل هكذا روحي للوكالة تاع موبيليس يريقلوهلك
كفاه هذه رقم واحد لشخصين عمرها لصرات.. روح اشكي بجدهم وصايي….والا يكونو هذو دايرين تحويل المكالمات لرقمك؟؟
روح للوكالة واطرح الاشكال نتاعك..متهدرش مع تع الاستقبال
انا كانت عندي بيس كي يعيطولي الابال يوصل عند شخص اخر و مشي نفس الرقم
Ca m’a arrivée la meme chose malgré je ne sais pas du tout cette femme de quoi elle parle lol
صاريلي نفس المشكل من حوالي تلاث شهر بدا ، يعيطلي السيد من سطيف و انا من باتنة
يقولي هذا الرقم تع الزوجة تاعي ، و يبدأ يعرش
و لي دوخني هذا رقم تاعي من 2012
الصراحة انا فاقد الأمل في موبيليس من زمااااان
Kifkif y3ytoli chaque khtra chkon yhkmo mra wla rajl wahd mchrq lakhr mn lghrb matfhm walo
تحويل مكالمات لا اكثر ولا اقل
لي يقلقك بلوك ولا طيحيلو
كاين عفسة
تبلوكي الارقام غير مسجلة في هاتفك
بلوكي الأرقام التي تزعجك
انا تاني هاد نيميرو عندي في 3 سنين و دائما يعطولي يحوسو على واحد اسمو فاتح مازال ما لقاوه هههه كل خطرا نقولهم نميرو تاعي هادا قديم و هوما تاني يقولولي مضاري نهدرو معاه في هاد نيميرو 🤷🏻♀️
بدليه نتي وتهناي الذهبية تقدر تبدل الرقم عادي مكانش.حاجة فاسوشل ميديا كيما قلتي نتي متقدرش تبدلها الرقم معندكش حل خلاف حتا الشركة.وماشي مستعرفة.كيفاش حبيتي تلقاي حل😅
بدلي رقم لي ماكدا بيه حساباتك قبل مينحولك او كشما يصرا.. دير احتياطك قبل ميروح رقم مع حساباتك لي مأكدتهم بيه
تقدري تبدلي الرقم من الذهبية عادي ، و سوشل ميديا و الجيمايل و اي ابليكاسيون كيما قلتي، انا خدمتك فاشري رقم ثاني و عودي عيطي منو للناس و قوليلهم مايزيدوش يعيطو في الموبيليس، ابقاي مدة من الزمن هكذا حتى تقدري تريقلي خدمتك بالرقم الجديد و طيشي عليك تكسار الراس، هادو كون جاو يحشمو ما يتزايدوش في الهدرة، راكي طحتي في رهط مش بني آدم ، الباب اللي يجيك منو الريح سدو و استريح
عيطي لخدمة الزبائن تع موبيليس و اشتكي بتع الريسبسيو اولا و ثانيا احكيلهم القصة
ممكن افار رونفوا بلاك المرا هذيك دارت الرونفا لنميروك وما فاقوش صرات مرة لوحدة حبيبتنا واحد عندو الدين ناض دار الرونفوا لنميرو على العمى طاح في حبيبتنا نهار كامل مسكينة والناس تهبل فيها
لا هذا مشكل فتيليفون واحد خربلك و دارلك تحويل مكالمة صراتلي مرة خربولي و كنت نعيط لماما نخرج عند مرا اخرى روحي شوفي فتيليفونك