السلام عليكم ورحمة
اليوم نشارك معاكم تجربة السياحة في أذربيجان.
فيزا إلكترونية تخرج في 3 ايام عمل ب 26$
تذكرة طيران مع القطرية بحوالي 63000دج وتلحق ل 76 تسما نتا وشطارتك والوقت لي تحجز فيه الطيارة.
الهوستلز ابتداء من 6€ لليلة واطلع في العاصمة باكو والفنادق من حوالي 25€ واطلع
افضل مكان للاقامة old city افضل من شارع نظامي خاطرش كالم عليه ومكان شباب وتاريخي وبعيد على نظامي بدقيقتين مشي تسما اربح رقدة كالم خير
اللغة المستعملة هي اللغة الأذرية ولي يفهم التركية رايح يسلكها مليح سينو الإنجليزية رايح تنفعك شوييية فالمناطق السياحية اما غيرها لغة الاشارة وقوقل ترانزلايت يفريهالك عندهم عقلية كيما لتراك مايتعلموش الانجليزية ومايحوسوش يتعلمو للأسف 😅 بصح كشعب افضل من الأتراك بكثير وماعندهمش النصب والاحتيال وعندهم مستوى امان كبييييير ولي كاميرا في كل بلاصة تسما روح مهني ان شاء الله
عملة البلد المانات وتساوي حوالي 130دج حاولو تدو معاكم دولار خير من الاورو يعطولكم سومة خير. والصرف باين بلا مانوصيكم فالمطار تصرفو غير 20€ والباقي برا. وحوسو مليح قبل ماتصرفو خاطرش ممكن تلقاو نفس البنك يعطيلكم سعر مختلف بين الفروع تاعو على اساس المناطق السياحية تسما اخرجو شويا على شارع نظامي تلقاو اسعار افضل في الصرف
المواصلات تشرو بطاقة باكو كيما تاع اسطنبول ب 2 مانات وشارجوها غير بالصرف برك تستعملوها في المترو وفي الحافلات رخيس عندهم ترونسبور واذا كنتو جماعة تقدرو تستعملو تطبيق bolt كيما يسير رخيس تاني
البلد مسلم تسما الاكل حلال تم وماتبقاوش تكسرو راسكم تحوسو وين تاكلو والماكلة معقولة قادر تاكل سندويش شاورما دجاج ب 2 مانات وتاع لحم ب 3 مانات كيما تقدر تاكل ب 20 مانات واطلع وجبات في مطاعم مليحة.
باكو ماتحتاجوش فيها جولة مع وكالة سياحية تسما وحدك تفرزها في نهار ولا زوج دور كل المعالم المعروفة تم واستعملو تطبيق gpsmycity يعاونكم بزاااااف فالنقطة هادي ويسهل عليكم تنظيم برنامج تاعكم في اي بلاصة في العالم.
شريحة الهاتف ماش لازم تشروها تقدرو تستعملو تطبيق maps me وتنزلو الخريطة اوفلاين تعاونكم في التنقل بواسطة الحافلات والمترو وفي معظم الاماكن السياحية والمطاعم تلقاو free wifi. ولا تشرو شريحة ب 25 مانات كيما تحبو.
لي حب يخرج من المناطق السياحية ويجرب اماكن شعبية يروح لمنطقة Qara Qarayev تروحولها بالمترو تم كلش رخيس وتلقاو لي سيبيرات يبيعو رخيس بزاف وكاين تم مارشي كبير وسمو 18kilometre تلقاوه فالمابس فيه كلش لبسة ميناج مكسرات وحلويات خضرة حوت لحم….. بصح رايحين تعانو مع مشكل اللغة بزاف فالمنطقة هاديك.
أذربيجان مافيهاش غير العاصمة باكو لازم تزور المناطق الريفية تاعهم و باش تروحلهم لازم جولات سياحية غير تدخل في double Gates تاع old city تلقاهم يعرضو عليك الخدمات تاعهم ونيڨوصي مليح ولا قادر تريزارفي من بوكينق فرق ماش كبير بزاف الرحلات ليوم كامل من صباح لليل حسب الوجهة يبداو من 70 مانات واطلع حتى 130 ننصحكم على الاقل تجربو رحلة ڨابالا وتزيدو معاها رحلة اخرى مثل شيكي او ڨوبا وكاين اخرين… تقدرو تاني تكرو سيارة اذا كنتو في جماعة بحوالي 50€ لليوم بصح تبانلي تروح مع وكالة افضل مع مجموعة من 5-10 عباد مفزوزة بلا تكسار راس خير وتبقا عليك هاد النقطة.
افضل وقت للزيارة من سبتمبر واكتوبر يكون جو معتدل وماكانش غاشي بزاف ولي يحب الثلج يروح فالشتا بين ديسمبر وفيفري
اي سؤال حطوه فالتعليقات نحاول نجاوب في حدود علمي
