السلام عليكم و رحمة الله خاوتي
شكون يقدر يساعدني في برنامج تاع 8الى 10 ايام
الى باريس و روما اواخر شهر ديسمبر ، يعني 5 في باريس و 5 في روما
(ممكن اغير الوجهة الثانية بدل روما اذا عندكم نصائح )
انا و زوجة تاعي بشرط تكون البداية باريس
حبيت نعرف الاسعار و ين نسكن واش ناكل وين نحوس
كفاه اتنقل الى روما من باربس
نصائح عامة ممكن تفدني
ميزانية في حدود 35 الى 40 مليون بدون احتساب تذاكر الطيران
جزاكم الله خيرا
اول نصيحة … رد بالك تغير الوجهة الثانية بل نقص ايام باريس و زيدهم في روما
3 jrs f paris bzf
باريس و روما مدينتين غنييتن بالتاريخ .كل مكان تقدر تطول فيه .برج أيفل .متحف لوفر .قصر فرساي .الحدائق .مونبارناس … روما سلالم إسبانيا .كوليسيو .فاتيكان .المدينة القديمة …
روما مدينة تستحق الزيارة مننصحكش تبدلها
نصيحة لوجه الله غير الوجهة تماما وروح لمصر ثم روح للاردن طبعا ادا كنت من محبي التاريخ والاثار
روما غالية بزاف و الوقت فيها ثقيل بزاف بصح ميمنعش تزورها وادا حبيت تبدل الوجهة برشلونة تاني هايلة و الطقس كما دزاير و ارخس في كلش الماكلة. الرقاد وترونسبور وزيد الشوبينڨ عندهم لي مول بزاف شابين و الحركة فيها بزاف وادا كانت الزوجة الكريمة متحجبة في فرنسا الافضل تزيد دير بوني والا شابو فرنسا فيها المضايقات بصح روما و برشلونة لالا هايلة …زيد في فرنسا غير تلحق اشريو بطاقة وسمها passe Navigo نتاع ترونسيور شارجي قيس سمانه تمشي بيها ببلا حساب ماشي كما تشري تيكي كل مرة و الانتقال من فرنسا لروما ريزيرفي ادا عندك كارط فيزا من الانترنت وكل يوم عس راهوم يديرو تخفيضات طيارة احسن وكاين تيجيفي القطار السريع بصح يبانلي اغلى و يشد الوقت . الاماكن السياحية نتاع اي بلاد ادخل ليوتوب حوس عليها يخرجلك كلش حتى كفاش تمشي ليها . ونصيحة اشري بطاقة انترنت رايحا تسهل عليك كلش اكتب الوجهة نتاعك في Google maps يخرجلك واش من ترونسبور تشد وعقداش يلحق المهم هوما هاربين علينا في هاد العفايس حتى الاكل حوس في maps اكل حلال يعطيولك وين جايين ..ادا حابين تشرو هدايا كاين بريمارك يبيع رخيس لحوايج وكاين زارا عندهم كولكسيون نتاع الروايح هايلين الافضل تشري نتاع فرنسا حسيت كاين إختلاف نفس الماركة بين البلدان . ادي معاك شوية ڨاطو كي تروح للمطار اير الجيري دايمن روطار ادوخلك الزوجة تحصل فيها ههههه …رحلة موفقة
Paris ekri Airbnb f les Beaulieu dji rkhissa 3la ki tekri f paris centre . Dir carte transport te3 smana 25 euro lel bndem d’or biha ga3 île de France . Après Ida ma hebitch troh l Italie . Te9der dir Belgique (Bruxelles o Bruges f 2 jours après zid tkemel l hollande Amsterdam et Rotterdam 3 jours hakda tkoun dert 3 bouldan f 10 jours
احكم باري وامبعد دير ميلانو باه اتروح البندقية
2 jours f Paris yakfou le reste kamalhom f Rome Milan florence
تقدر تقلص المدة تاع كل بلد و تزيد حتى اسبانيا ,النقل الطائرة ارخص اذا كان الشراء مسبقا. المبيت راح تلقاه غالي نوعا ما في روما ,اخر العام يكون فيه الاحتفالات و العطل,الاكل في باريس شغل راك فالجزائر ماتحيرش اطلاقا,روما ,يوجد اكل حلال ولكن غير فاستفود عند مصريين ولا بنغلاديش, ولا عند نهار راح تسافر فيه,نصيحة ابدا في شراء تذاكر الطائرة من الان تلقاها رخيسة,الذهاب فقط من باريس الى روما راه في حدود 24 الى 35 اورو الان.