#العمرة نصيحة أولى لكل واحد رايح يسافر لأي مكان خارج الجزائر من فضلك تذكر دائ

#العمرة
✅️ نصيحة أولى لكل واحد رايح يسافر لأي مكان خارج الجزائر
من فضلك تذكر دائما أنك غي تخرج من الحدود فانك تمثل بلد بأكمله يعني الانسان يحاول يكون محترم منظم و مؤدب le max لابغا في طبعه القلق و شي طبايع ماشي ملاح لأنه رانا نشوفو العجب العجاب.
✅️ النصيحة الثانية خاصة للشباب و الشابات اللي يهيبو و يخافو يروحو لمكة يحس روحه غادي يتكتف ولا ماغاديش يعيش حياته ولا مازال ما يتوب يا والله تروح وين ما تروح مكانش بلاصة تحس فيها بالسكينة السلام الداخلي و القوة كيما بيت الله و مسجد رسول الله و بلا الأجر المضاعف اللي فيهم الحسنة ب 100 000 و ربي يفتح عليكم فتح يتعجب له الناس فعول و متندمش ان شاء الله ❤.
نصائح العمرة:
✅️ نبدو بأهم شيئين العجوة و ماء زمزم :
في ماء زمزم كل واحد عنده الحق في 5 لتر بسعر 8.5 ريال بفيزا العمرة يشتريها من المطار ومن الأفضل تعاون روحك بالقاروات الصغيرة اللي يمدوهالك راهي في الصور تحت👇 من الأحسن تفريها في المدينة لانه في مكة متصحلكش الطايح كثر من النايض زحمة كبيرة هاته الأيام ففي المدينة جيب معاك يقسمو كل يوم مع ال 10 صباحا في كل الأبواب خير ما تقعد تعمر و تسكوتشي و تعب روحك.
العجوة و التمور من الأحسن تشرو في المدينة العجوة رخيسة و حتى التمر المحشي باللوز عجبهم بزاف في العائلة و أرخص من العجوة 24 ريال للكيلو يعطيك كمية مليحة.
✅ ️اللي يبغو يتسوقو سوق قباء أفضلهم في المدينة و متشروش عند اللي حدا الحرم المدني ال prix ×3 عادي .
و في مكة كاين العتيبية كيما مدينة جديدة تاع وهران حاجات رخيصة و سواقية وحاجة مليحة تلقوها في الأبراج كاين كل شي.
مرحبا بأي سؤال أو استفسار 😊.