اليوم صراتلي أكبر شقوة مع اتصالات الجزائر وموقف حبسلي راسي
الحكاية بدات قبل 4 أيام : حنا في الدار عندنا ويفي adsl جاو للحي كامل يطبطبو على الديار قالك رانا رايحين نبدلولكم أرقام الفيكس وحتى الانترنت رح تتبدل ترجع “الألياف البصرية Fibre optique” قالولنا لازم تمدولنا معلوماتكم باش نسجلو الطلب ونمدولكم مودام بلاش ويجيو يديرو التركيب تاعو في الدار والمشكلة الأكبر قالك رح يبدلوها إجباريا حتى إذا ما نوافقوش وفي تلك الحالة نوليو لازم نشرو المودام بمليون ونص بطبيعة الحال الجزائريين كل نحبو حاجة تع بلاش كامل الجيران وافقو و جاو دارولنا installation تع الخيوط والمودام وكلش لكن من نهار السبت والانترنت حابسة ما تمشيش قالك استناو حتى يطلقوها ويزيدوكم معاها الأيام اللي بقاولكم في ال adsl القديمة مع هادي الجديدة (حنا بقاتلنا القديمة فيها شهرين) هيا صبرنا بزاف من السبت لليوم الثلاثاء ما قدرتش نزيد نصبر وحنا نحتاجوها عيطتلهم البارح في رقم 12 قالولي لازم تروحي تديري في الانترنت الجديدة recharge يعني نخلصها حتى تولي أكتيفي عندهم في السيستام ويديرو تحويل للقديمة معاها، ايا رحت اليوم للأجونس اللي موالفة نخلص فيها لأنها أقرب ليا بعد ما شقيت قالولي روحي لأجونس أخرى (بعيدة ب 2 ولا 3 كلم عليها) لأنه العنوان تع دارنا تابع لهاديك هيا رحتلها مشيا والسخانة تصرع وصلت لقيت الغاشي استنيت قريب ساعتين حتى وصلت دالتي في زهري طحت في شباك فيه واحد كهل هز رقم الفيكس الجديد وشافلي في السيستام قالي هادي روحي اشري كارطة تع انترنت من برا عند سيبار ولا حانوت تع تلفونات واكتيفيها تمشيلك خرجت من تم قريب طلعتلي لاطونسيون وحوست في الحوانت كامل تع التلفونات والسيبار واحد ماعندو الكارطات هادو حتى وصلت عند حانوت قالي ما تبقايش تشقي في روحك روحي للأجونس يبيعوهم (يحكي على اللولة خلاص اللي رحتلها صباح ربي وقالولي عنوانك مش تابع لينا)، هيا عاودت رحتلهم وشريت بطاقة تع 50 ألف برك كي روحت للدار جيت ناكتيفيها من الفيكس ما حبتش بقيت نعاود 10 مرات كيف كيف والو، عاودت في العشية رجعتلهم و ناوية صح نتعارك معاهم المرة هادي كيفاش يتمسخرو بالناس يبقاو روحي من ديري من اشقاي في الفراغ، كي وصلت عاودت حكيتلهم وش صرا بلي ماحبتش تاكتيفا قلتلهم ربي يسهل اكتيفيوهالي عندكم ايا داروها مشات بصح قالولي تعاودي ترجعي لعزرين الأجونس لوخرة البعيدة نزيد ندير عندهم طلب لتحويل الشهرين الباقيين من adsl في هادي وعاودت رحت وأنا في قلبي قريب نسبهم، وصلت تم زدت لقيت مرا كهلة قاتلي قادرين يطولو بزاف حتى يرجعولكم الايام اللي بقاو يعني قادرة تخلاصلي هادي الكارطة تع 50 ألف ونولي نعاود نشري كارطة جديدة قلتلها كيفاش وكون تخلاص تع 50 نقعدو هكاك حنا ؟ قاتلي الله غالب ماعندي ما نديرلك افليكسي واكتيفي 3G في la puce 🙂 خايفة ياكلولنا حقنا فيهم الأيام اللي بقات وحتى كي نعيط نريكلامي في رقم 12 كل مرة يهز عليا شخص مختلف وكل مرة يهدرولي هدرة مختلفة
اسمحولي طولت عليكم قولولي إذا ما رجعوليش شهرين تاعي نقدر نشكي بيهم ؟ و وين بعد نروح لعند وكيل الجمهورية ولا كيفاش ؟
#1001_help
ربي يعطيك الصبر .. تقدري تخلصي ب baridimob بلا ما تزيدي تشقاي عندهم .. و الشهرين هذوك حطي الطلب و قليلهم يعطوك روسو .. و اقعدي تسمطي بالتلفون او الايميل خطرة على خطرة حتى يردولك
الجزائر الجديدة يسرقوك وانت تتفرج ومتقدرش تريكلامي
خير الكلام ماقل ودل
ساعات الواحد يقول هاذا لي حاكمين المكاتب يخرجوا تقاعد مسبق لا خدمة لا إحترافية عندم شعارهم الأول تعطيل مصالح الشعب
يرجعوهم حتى لو يطولوا في العملية
بصح السيستام يرجعها كوني هانية
😞😞
المشكلة تاع الجزائرين يتعاملوا غير بالهدرة المرة الجاية قوليلها لكتبيلي ورقة و ديرلك الكاشي تاع الاجونص
و هبطي اشتكي بيهم
قانونيا يمدولك تعويض و يرجعولك الشهرين
علابلي واحد ما فارغ شغل مي معليش افرغولهم يترباو
كي هما كي تاع اوريدو