تجربة زيارة لمصر جزء 1 السلام عليكم ورحمة الله وبركاته حبيت نشاركم تجربتي في مص

تجربة زيارة لمصر جزء 1
السلام عليكم ورحمة الله وبركاته حبيت نشاركم تجربتي في مصر وبما اني زرت اغلب مصر نقسم لكم تجربة لعدة أجزاء
حاليا 1دولار =31 جنيه و1 اورو = 32.5 جنيه هذا سعر بنك ومكاتب صرافة في سوق سوداء أعلى بصح لزم تكونوا تعرفوا شخص ثقة لأنه أولا متاجرة في عملة ممنوع ثانيا تخافوا يكونوا مزورة
الفيزا من سفارة مصرية بالجزائر مليون و50 الف في وكالات سياحية تبدأ من مليون ونص ل 18000دج …..كاين الكترونية تخلصوا بين 600 الف و800الف وكي توصلوا مطار قاهرة تخلصوا 25 دولار
#القاهرة عدد سكانها اكثر من 20 مليون وفيها كمبروموا كحل
اهم مزارات سياحية في القاهرة :
#الاهرامات مع انها اهم الاثار في عالم وفي مصر لكن منطقه مش مهتمين بها وتلقاو ليكروا جمال وخيول سامطين يلصقوا فيكم حتى كاين ليسب اذا محبتش تكري من عنده وثاني ليقولك اعطيني نصورك حتى لوكان بتليفونك يصور لك بدراهم …تركبوا مترو للجيزة آخر الخط تخرجوا تلقاو مني بوس يعيط اهرمات تركبو فيه يحطكم تمشوا شوي تلقاو الاهرمات عندها زوج دخلات ..كاين تذكرة دخول للمنطقه ب 60 جنيه واذا حبيتوا تدخلوا لاهرام من داخل تلقاو مكتب بيع دخول كل هرم ب 60 جنيه وابو هوا ب 100 جنيه
#المتحف المصري جاي في وسط البلد قدام ميدان التحرير وجامعه دول العربية سعر دخول ب 30 جنيه وطلبة ب 20 يفتح على 9 يقفل على 4 نتاع عشية
#قلعة صلاح الدين …فيها مسجد محمد علي باشا ومتحف الشرطة ومتحف الحربي وفيها مسجد ابن طولون من عهد مماليك ..دخول ليها ب 60 جنيه ..اذا كنتم في وسط بلد تركبوا من محطه عبد منعم رياض تسقسوا bus ليحط عند قلعة تركبو ب 6 جنيه يحطكم تقطعوا طريق وتطلعوا تمشوا واحد 10 دقايق تقفل على 4 نتاع العشية
#مجمع اديان فيه عدة كنائس اثرية ومنها كنيسة تخبات فيها السيدة مريم وسيدنا عيسى عليه سلام وكاين معبد يهودي وتزيدوا تمشو شوي تلقاو مسجد عمر بن العاص ..مجمع اديان مزارات سياحية فيه تقفل على 4 ومسجد عمر بن العاص يقفل بعد العشاء …اذا كنتم في ميدان تحرير تركبوا متروا وتهبطوا في محطه ماري جرجس وتبداو جولتكم
#برج القاهرة هو برج تشوفو فيه قاهرة من فوق وكاين فيه مطعم وكافي بصح اسعار اكل غالية بزاف ..تذكرة برج 50 جنيه ….اذا كنتم في وسط بلد تروحوا ليه تمشوا ولا طاكسي #قصر البارون هو قصر ميزته تصميم هندي ولونه ..تذكرته 30 جنيه وتذكرة السطح 30 جنيه ..تركبوا من محطة عبد منعم رياض في وسط البلد اي bus رايح صلاح سالم قولولوا يحطكم قريب لقصر بارون تمشو. شوي تلقاوه
#مصر القديمة فيها مقام السيدة زينب ومسجد الست نفيسة ومساجد اثرية تعتبر منطقه شعبية تركبوا مواصلات لسيدة زينب يحطكم وانتم تتمشاو براحتكم منطقه كبيرة
#قصر الامير محمد علي (حفيد محمد علي باشا) في المنيل فيه قصر الامير ومسجد نتاعه من أجمل مساجد رغم صغره وفيه متحف الصيد نتاع الامير دخول ب 30 جنيه
#الحسين وشارع المعز وخان خليلي قدام بعضهم فيهم مساجد ومطاعم وكافيهات يديروا فيها عزف او رقص التنورة ومحلات يبيعوا فيها حجات تقليدية وفرعونية وفضة ..متاحف ومساجد لفي شارع معز تفتح في نهار برك
#حدائق الازهر هي حديقه وحده وكبيرة مدخلتهاش هذا عام معلبليش شحال ولى سعر دخول كانت ب 20 جنيه قريبة من الحسين ومشيخة ازهر تركبوا كابسولة من الحسين ولا العتبة يحطكم عندها
#حديقه حيوانات قفلوها لتجديد مانعرف وقتاش يعاودوا يفتحوها
#القرية الفرعونية عبارة عن قرية سياحية فيها حديقه وبحيرة تركبوا فيها زوارق بحرية
#دريم بارك في مدينة 6 اكتوبر برك فيه العاب للاطفال وللكبار (نتاع الكبار كاين بعض العاب فيها شوي مغامرة واحد خواف مايركبش ههه ) كاين سعر دخول أفراد وسعر دخول عائلي وكاين العاب تخلصوهم وحدهم
كاين قصور غلقوها لترميم كما قصر عائشة فهمي وقصر عبدين ..
ليحبوا تسوق ومولات كاين بزاف في شيخ زايد وفي مدينة 6 اكتوبر ومدينتي والرحاب ..الخ
ثاني تقدروا تدخلوا لنادي زمالك والاهلي
كاين مراكب دير جولات في نيل دخول مرسى مراكب ب 10 جنيه الواحد ومراكب ب 30 جنيه للواحد….وكاين نقل نهري تحبوا تجربوه عنده أوقات معينة ..وكاين مراكب دير سهرات وعشاء في نيل تحبوا تحجزوا معاهم تلقاهم في مكاتب سياحية دايرين عروض ولا في صفحات عبر مواقع تواصل إجتماعي
هذا اهم وش كاين في القاهرة …متروا يغطي عدة اماكن في القاهرة خصوصا طلبة وباحثين ليحوسوا على جامعات متروا احسن يديكم جامعة القاهرة .جامعة عين شمس .جامعة الازهر.جامعه حلوان .الجامعة الامريكية
بخصوص فنادق في قاهرة تلقاو بزاف انتم ودراهمكم وتلقاو هوستيل ثاني …أنا شخصيا نفضل نكون في وسط البلد باه يسهل عليا التحرك وزيد قريب ليا كل شيء انا نحجز ديما في فندق في ميدان تحرير اسمه اسماعيلية هاوس يطل على ميدان تحرير وجامعه امريكية في ظهره اسعاره هذا عام تبدأ من 300 جنيه كاين غرف فردية حمام داخلي وكاين غرف فردية حمام مشترك وكاين غرف ثنائية وغرف ثلاثيه وغرف رباعية مع فطور الصباح وانترنيت