جماعة والله حاب نعرف برك … بزاف ناس ولاد بلاد خاوتنا يقولو دزاير ماعندهاش بنية…

جماعة والله حاب نعرف برك …
بزاف ناس ولاد بلاد خاوتنا يقولو دزاير ماعندهاش بنية تحتية و مصنفيننا من الاسوء إفريقيا ؟
والله سيريو ! أول بلد إفريقي فيه ميترو و 8 تاع ترامواي في 8 ولايات مختلفة …
علاه كي تقيسو البنية التحتية تقيسوها على حساب الولاية لي عايشين فيها ( مع إحتراماتي لجميع الولايات ) لكن حتى المغرب و تونس و مصر تشوف وحد الأحياء يحكمك القيء حاشاكم الوسخ أكثر من الاحياء الجزائرية …
عندك العاصمة سطيف وهران قسنطينة تلمسان هاذو ولايات فيهم بنية تحتية لاباس بيها وتقابل بيها بزااف بالنسبة لي …
و عندك مستغانم ، سكيكدة ، جيجل ، بجاية عنابة …إلخ هاذو بعدهم …
يعني البلاد فيها بزاف ولايات قابلة للسياحة و البنية التحتية راهي تتطور بلخف نظرا إلى المشاريع لي راهي قيد الإنجاز حاليا ..ملاعب ..فنادق … قرى سياحية …..
حاب نعرف واش بيها البنية التحتية تاعنا و علاه مطيحين بيها بزاف بالنسبة لبلدان إفريقيا؟
#welcome_to_algeria

29 Comments

  1. Chebab Nassim dňa مايو 28, 2022 o 10:58 ص

    اولا ما عندناش بنية تحتية مقارنة بالدول السياحية الرائدة في المجال وما نملكه مجرد بريكولاج بالمقارنة إضافة إلى ذلك حتى تعرف انك بعيد انظر إلى حالة المدن تاعنا و اللي راك تقول مليحة كالعاصمة وهران كي طيح شوية شتاء كيفاش ترجع وهنا تفهم

  2. Dou Dou dňa مايو 28, 2022 o 11:01 ص

    Kayz Oux الاسوء خويا بيسك ماتقدرش تقارن روحك مع دول فقيرة ماعندهم والو قارن روحك مع دول لي عندها الخيرات والثروات الباطنية كيما نتا تعرف الفرق الشاسع بينا وبينهم

  3. Souar Sahraoui dňa مايو 28, 2022 o 11:05 ص

    نظام الفندقة سيئ جدا و ثمن مرتفع، الميترو و ترامواي لي تحكي عليه لا يغطي جميع الأحياء في الولايات لي فيهم بلا ما نحكو على الولايات المهمشة، الطرقات نظن ماكش تشوف فيهم اغلب الحوادث بسبب الطرقات، مشكل الأمن في الولايات الكبرى كل يوم تسمع جر/ ئم المنتجعات السياحية تقدر تقول منعدمة ماشي كي نتتاقدو تقولو جلد الذات حنا نتتاقدو المسؤولين ماشي بلادنا

  4. Fahouma Wail Razan dňa مايو 28, 2022 o 11:09 ص

    المشكل فالجزائر انها كبيرة بزاف واش تسڨم واش تخلي . صعيبة باش تقومها كامل من شمالها لجنوبها. إلا اذا كانت ارادة سياسية تاع الصح و خطة طريق تروح لشحال من من عام باش نشوفو النتيجة

  5. Imi Gui dňa مايو 28, 2022 o 11:10 ص

    علمونا جلد الذات وفقط

  6. Boubakeur Amine dňa مايو 28, 2022 o 11:13 ص

    Mahrez Mediouni
    ارواح فهمو بلي راه يقارن دولة بترول و غاز و ثروات مع دول عندها والو

  7. Anes Bousmaat dňa مايو 28, 2022 o 11:14 ص

    روح صحيبي الله يهديك تشوف البنية التحتية تع الصح كفاش مخدوم تحشم لا تشوف مع وجك فلمراية

  8. Karima TL dňa مايو 28, 2022 o 11:14 ص

    لان كاين بزااف يديهم مكسرين او نهار كامل حكمين الحيط لاخدمة ولا الثقافة ولا تربية و…الخ او تلقاه نهار كامل يقطع في بلادو او يهدر في حاجة ميعرفهاش او نهار كامل او هو يطيح باولاد بلاده لي راهم خدامين او قاريين او عاملين المستقبل تاعهم بعرق جبينهم ……هذه الفئة من الناس للاسف كاين منهم بنسبة كبيييرة وهذه الفئة لخسرت صورة الجزائر 🇩🇿 صحيح عندنا دولة حكارة او سرقو و و الخ لكن ماشي يعني تقعد حاكم الحيط نوض اخدم على روحك في بلادو ميخدمش او بلاد الناس يضرب النشاف او يسكت….نحن اولاد الجزائر للازم نطلعو من قيمتها او من قيمتنا …..حنا بعضنا البعض غير البغث او الحسد او لخدع او الغش او السرقة او تحب الدولة متحكرناش مستحيل …..السياحة في الجزائر 🇩🇿 للأسف واحد معطلها حقها لا من الدولة ولا من المواطن.
    انت تكلمت على ميترو و الخ للاسف مقاسش كامل الولايات علاش كاين غير سطيف او عنابة او العاصمة مكاش الجنوب…مكاش غرداية او بشار او ورڨلة و و الخ الله يبارك الجزائر قارة …انا بنت العاصمة ماشي لازم نتكلم غير على العاصمة لالا لازم نوسع او نخدم بلادنا او كامل عندنا الحق فيها…نحن نريد السياحة لكن علينا نغير في اخلاقنا و تصرفاتنا او نثقف أنفسنا لان حنا بعضنا البعض معندناش الحق نخرجو مع ازواجنا او ابائنا او اخوانا على التربية الفاسدة لي راهي برا شباب طايش .

  9. Sàmi SàïĐià dňa مايو 28, 2022 o 11:15 ص

    طريق شرق غرب كاملة حفر و خنادق واشمن بنية تحتية ؟ أغلب الطرق الولائية بلا إنارة تسما بلا منعمقوا من هنا تفهم البنية التحتية الفالصو

  10. نبيل قدور dňa مايو 28, 2022 o 11:23 ص

    الإعلام فقط هو لي وجه ورسخ فكرة أن بلادنا مش مليحة….ولكن لي دار وشاف القاهرة مراكش سوسة حمامات…كيب تاون و ووو تلقاه يعرف قيمة البنى التحتية تع بلادو

  11. Kayz Oux dňa مايو 28, 2022 o 11:24 ص

    كاين وحد الناس والله يختار الصورة المقودة لي فالاحياء تاعنا و يقولك هاذي هي البنية التحتية تاع دزاير ….
    سما هايليك انا نقولك هاذي هي طنجة

  12. Doc Nasri Widad dňa مايو 28, 2022 o 11:25 ص

    👍👍

  13. Moussa AB-yahia dňa مايو 28, 2022 o 11:25 ص

    والله وتشوف الاشقاء هاذو وتشوف الجزاير غير تعرف روحك في نعيييييم….الميديا والكذب هوما لي خلاو البلدان متطورة في نظر الكثيرين

  14. Amina GhorZi dňa مايو 28, 2022 o 11:27 ص

    راجع مفهوم البنى التحتية تفهم علاه يقولوا هاك .

  15. Mayas Oubraham dňa مايو 28, 2022 o 11:29 ص

    Metro +30 ans men sahet chouhada l ain naadja
    Tramway ruisseau dergana 20km 1h30 trajet 😑 w zid circulations zadet bssbto
    Makalah nezid nkml 🥱
    Had lwilayat nta saken fihom wla chefthon fel journal ?
    Ki ykon 3ndna président w des ministres yekhdmo ltema nehewsso 3la tourisme dok rana bezaf b3ad

  16. Ziaf Oub dňa مايو 28, 2022 o 11:40 ص

    سبحان الله نفس هدرة اويحيى كي كان يكدب على الشعب ويسرق 20 سنة..والشعب نية ويامن..شوف البنى التحتية تاع قطر والإمارات..تعرف بلي راك في الحضيض..نتا تدخل للبلدية يجيبو بيك نهار الناس مادار تفري في صوالحها…الدزاير عرة تحب ولا تكره وريح تكدب على الناس تصيب روحك كبرت وكليت ولادك في كرشك…نقولك شكون يشوف الدزاير شابة لي باباه دارلو الشكارة غير دالك راك تكدب على روحك ونتا علابالك بلي عندي الحق

  17. El Khatir Hiba dňa مايو 28, 2022 o 11:41 ص

    ولاد فرانسا

  18. Abdou Faws dňa مايو 28, 2022 o 11:45 ص

    نص العباد ما خرجوش من ولايتهم ينتقدو برك كاين عيباد عايشين في السلبية خاصة لي زايدين في التسعينات و ما يعرفوش البلاد كيفاه كانت اصلا ما يعرفوش بلي التغيير لازملو وقت و تغيير للعقلية اولا و قبل كل شيء

  19. Aniss Khelfaoui dňa مايو 28, 2022 o 11:53 ص

    هاد العقليةجات من عملاء الخارج متل زيطوط وامير اك تعرف عاش المالييك

  20. Youcef Abbas dňa مايو 28, 2022 o 12:02 م

    البنية التحتية ماهيش ترامواي و ميترو!!!!!!!!
    البنية التحتية اكبر بكثير

  21. Hocine Bbdr dňa مايو 28, 2022 o 12:05 م

    راك عارف شامعني بني تحتية ؟ نينشوف فيك تلخصها فالميطرو وطرام !!

  22. Moussa Djeridi dňa مايو 28, 2022 o 12:06 م

    البنى التحتية ميترو و تراموااي يااك !
    تسما نتهناو من أصحاب زيطوط و ديزاد يقابلونا أصحاب الفكر الياجوري تسما لي يحكي لوجيك ويحكي لمصلحة لبلاد مكاانش

  23. Youcef Benabida dňa مايو 28, 2022 o 12:11 م

    يا خويا مفهمتش كامل ضرك وليتو تلمعو صورة الجزائر شوف خويا نحبو بلادنا وكلش ولكن كي راك تقولي الميترو اولا الميترو لي راك تهدر عليه يغطي محطات قليلة الترامواي نفس الشيء والبنية التحتية ماشي تكون البلد الافريقي الوحيد لي عندك هاذ الحوايج يعني خلاص نتا الطوب الجزائر من اغنى الدول الافريقية ومزال الطريق عندنا طريق سيار مكسر منحكيوش على الطرق البلدية وطرق داخل الولايات انا مشيت شحال من بلاد الفقر قاتلهم بصح طرقهم مليحة ثانيا المواصلات فالجزائر من اسوا الحوايج اقسم بالله فالجزائر كي متكونش عندك طوموبيل غير تكره حياتك يا عجابة نحكيلك في ولايتي باه تروح مكان لمكان 5 كلم البيس يدير بيك 50 دقيقة ومعندكش حل غيرو مع انو المنطقة قدام الجامعة يعني منطقة حيوية ثالثا الفنادق باه الانسان العادي يكري فندق قليلة وين تصرى لانو الفنادق قليلة وغالية وان وجدت سوء المعاملة وقلة النظافة وغيرها ثالثا الانترنت في الجزائر حدث ولا حرج كامل علابالنا كيفاه الحالة زيد الخدمات لازم تكون عندك معريفة باه يفرولك شغلك ثم ثم من غيرها لازم تستنا حتان يخلصو القصرة تاعهم زيد الاموال يا عجابة بلدان نائية وعندهم محلات الصرافة وحنا معدناش وغيرها وغيرها انا نحب الجزائر ولكن البلدان هربت علينا كامل في الحق يقال

  24. Fatma Zahra Aiche dňa مايو 28, 2022 o 12:15 م

    جيجل واش فيها بنية تحتية كي عطيتها كمثال مازالت تعاني من التهميش لا طرقات كي الناس لا مصانع كي الناس بالرغم من وجود ميناء جن جن مازالت معزولة اقتصاديا .. شوف قبل علاش توقف طريق العلمة -جن جن

  25. Mohamed Kilany dňa مايو 28, 2022 o 12:16 م

    هو انتو اعلم ببلادكم في موضوع البنية التحتية وانا اعتبر الجزائر من اجمل بلاد العالم بس تصحيح المعلومة بس ان الجزائر مش من اول بلد افريقي اتعمل فيه مترو هو المترو اتعمل من قريب في سنة 2011
    بس اول مترو في افريقيا كان في مصر وبدأ المشروع من الخمسينات وبسبب الحرب خلص واتفتح في سنة 1983
    + اول خط تورماي في افريقيا كان في مصر في الاسكندرية في عام 1860
    + اول خط سكك حديد في افريقيا كان في مصر سنة عام 1834

  26. Hamid Zahi dňa مايو 28, 2022 o 12:17 م

    لي راهم ينتاقدو المخير فيهم تحكم فيه طفلة ويجي لهنا يلعبها عالم وهو نكرة بين الناس
    ابردو تحيا الجزائر بايجابياتها وسلبياتها
    تحيا الوطن هي أمي وابي
    الحمد الله على نعمة الأمن ♥️🔥

  27. Fatma Zohra Sahraoui dňa مايو 28, 2022 o 12:18 م

    البنية التحتية ماهيش مباني و فقط الطرقات المرافق
    الخدمات ونوعية الخدمات اللي لازم تناسب كافة الفئات
    ذك نتا باش تقضي صالحة في كاش مدينة
    لازم تمدلها نهار كامل من حياتك و تبدل كامل شغالاتك ولا مكالاه
    و منعرف اذا قضيتها

  28. Bonce Mbonce dňa مايو 28, 2022 o 12:22 م

    راكم تعييو في رواحكم تقلو النقائص اقلك جلد الذات تقلو حابين نطورو يحصلها في الشعب تقلو كاين حفرة تفسدلك ماتريال اقلك انت سلبي تقلو حابين نشوفو بلادنا شعبها يتمتع بخيراتها أولى من الأجنبي اقلك نعرفوهم بالبلاد خلي الأجنبي ينتقدك واسمع وافهم هذا عقل ولا فكرون

  29. Yass Mine dňa مايو 28, 2022 o 12:30 م

    روح ربي يهديك ميطرو و 8 تاع ليطرامواي يهدرو عليهم الناس وونقولو عندنا بنية تحتية

أترك تعليق