سلام عليكم كاين واحد الاخت حطت منشور على العمرة ماشاء الله قدمت نصائح قيمة ربي يجازيها…
لي عندهم معلومات حبيت نستفسر على كبار السنّ كيفاش، حبيت ندي جدّة للعمرة في عمرها 84 سنة، هي تمشي بصح تعرج شوية يعني تمشي بلعقل تمشي وتحبس يعني فالطواف كيفاش؟ وتدخل لدورة المياه بزاف أكرمكم الله، والمبيت فالفنادق نقدر نبات معاها؟ ولا لازم وحدها؟
مارانيش حايب تكون ليها مشقة، واش رايكم؟ واي نصائح لكبار السنّ باش تفوتها مرتاحة؟
وربي يرزق كل واحد زيارة بيته الحرام…
Posted in Tourism
كاين العربات باش تمشيها باطل الا صبتهم ولا تقدر تكري
الفندق شوف نتوما واش كريتو تبات معاها عادي
عندك مشكل دورة المياه داخل الحرم ماكاش لازم تخرج للتوسعة برا و نسبيا فيها مشي شوية
لازم دير حسابك.
و ساهلة خلاص كلش مفروز و منظم
كبار السن تلقاي خدمة مجانية للكراسي المتحركة طوفي وتسعاي بيها أو خدمة ذاتية تلقاي كرارس تسوقيهم ممكنةجدا تكون بثمن…أو تلقاي ولاد بلاد ثم ساكنين وتحت لوتال عندو كرسي متحرك تكريه يسوق بيها ويكمللها عمرتها ويرجعها لوتال في حدود 50 ريال
شفتهم بزاف يدوهم بالكرسي متحرك هكا تساعد.عليك وعليها تنقل و تحرك ولكن الفندق حاول يكون قريب للحرم باش متظطرش تركب فالمواصلا ت بيه
من الاحسن رجل معاها
شوف مع لاجونس يدبرلها كرسي متحرك طيلة فترة العمرة
المشي صعيب لان بعد المسافة بين الفنادق والحرم
في حالة صعوبة الذهاب يمكن الصلاة في مساجد مكة نفس اجر الصلاة ان شاء الله خلصة مع مشكلة دورات المياه في الحرم
اختار فنادق قرب الحرم جهة الابراج لانها اقرب ومستقيمة وزيد سقسي
ابتعد عن شارع غزة لانو جاي في طلعة
الطواليت راح تتعب من الاحسن حفاظات
شوف فندق قريب من الحرم
اخطيك من شارع غزة راهو بعيد خلاص
هي المهم تدير العمرة و يديروها بالكرسي المتحرك
عدا ذلك َحتى كي تصلي في الغرفة عندها نفس الاجر تاع الصلاة في المسجد
من الأفضل اشريلها كرسي متحرك من هنا يكون نوعية مليحة لانهم غالين لفم.
وماذا بيك فندق يكون قريب لانو فندق بعيد مع نقل والكرسي متحرك تعبك.
إذا وزنها خفيف وتقدري دزي بيها ماتعبكش اما اذا وزنها ثقيل راح تكون شوي مشقة لكن ربي يعطيكم القوة ان شاء الله.
الفنادق من هنا تقدري تحكمي في غرفة ثنائية أو أكثر مع بعض.
الطواف يكون في أماكن مخصصة الكراسي المتحركة
كاين فم جزائريين أو باكستانيين يدرو الطواف بالدراهم من 50 ريال وطلع يعني 300 الف دراهمنا،تقدري تقاشري في السعر (مقاشرة تكون في جميع الأسعار لأنهم يضربو الفوق خاصة السلع الحضاري وما تقبلوش من عند الأول فوت للثاني دائما).
ادو معاكم لينجات، مناشف كاغط، أدوية، ليكوش إذا تحتاج بكميات كافية لانو كلش أغلى من هنا
مراحيض كاين في الخارج تحت الأرض مشقة شوي الكراسي المتحركة(من الأفضل شخصان يتعاونو)
الطواف بالكراسي كاين بصح غالي تقريبا 50 يورو ولا اذا ممكن نتا تطوف بيها تلقى الكراسي المتحركة لتم تفكر واحد . و المبيت تقدر تكري غرفة ثنائية ليك وليها ولا اذا رحت مع وكالة يحطوها مع نساء .
تقريبا كل الفنادق فيها كراسي متحركة التحت تستعمليه يوميا تديها بيه لكل صلاة اما العمرة عادي في الطواف كاين طابق الاول مخصص للكراسي المتحركة تطوفي بيها عادي والصفا والمروة كي مثليه تسعاي بيها مع انها شوي تعب بصح اذا قدرتي تكري واحد يطوف بيها ويمشي بيها الصفا والمروة احسن المهم يكون ثقة لانو كاين لميوريلهاش الدعاء والاركان ويسرق في عدد الطواف والسعي
الطواف و السعي كاين بالكراسي المتحركة في الدور الأول لانوا الدور الأرضي فيه غير المشاة و اذا كانت حابة تمشي على رجليها عادي تقدر تمشي ببطئ.
الغرفة تقدر دير معها طبعا عادي
اذا كان لازم تدخل المرحاض حطها تصلي فالتوسيعات وين قريب ليها ونتا تقدر تروح و تولي ليها شفا برك على رقم المكان و تقدر حتى تصلي من الفندق اذا كان قريب و لها نفس الأجر لانوا الفنادق القريبة داخلة مع الحرم. و تقدر طيح في مجموعة فيها نساء يقعدوا معاها و يعاونوها الناس هناك تحوس غير دير الخير