#البطحة – واش يا عمي برنو ، وقيلا الرحلة طيرتلك النعاس ؟ = تعرف يا اللاز كاي

#البطحة

– واش يا عمي برنو ، وقيلا الرحلة طيرتلك النعاس ؟
= تعرف يا اللاز كاين حيطان واقيل انا قديم عليهم هنايا .. كل شبر عندي معاه حكايا .. كي جينا سكنا منقولك كان في عمري 4 سنين منقولك 5 سنين والله ماني حاصي هاداك وقت وهادا وقت .. كانو كاينين خمسة ديار ، كنت كي نبعي نخرج برا نلعب منصيب معامن نلعب .. الوقت فات يجري ، ناز ماتت وناس انزادت .. ولي جا للحومة على جال شهر صاب روحو بولادو وولاد ولادو .. والحومة راك تشوف ولات ب 20 دار و 30 دار وتيسعت .. شحال من ليالي فوتناهم بالشمع ، مكان كاين لا ما لا تريسيتي .. والبرد والشتا .. الشتا شانقولك .. كي تجي المطر تدخل علينا من السقف من فوق .. البرد البرد البرد .. والبرد تاع بكري مشي كيما تاع ضروك بارد قارس .. بصح القلوب كانت دافية … كان باباك الله يرحمو يضحك ويقولي ” لي يسكن في هادي الحومة ميخرجش منها واذا خرج يدوه في محمل ” الله يرحمو .. مكانش داري بلي يجي نهار وترحلو …
– الله يرحمو .. نتوما تاني رقدتو عمي برنو .. رقدتو بزاف ، الدنيا هادي تحب واحد قافز ؛ الضعيف تطحنو ..
= شكون لي قالك مقفزناش ؟ يجي وقت وتفيق بلي الشطارة مدير والو .. كاين حوايج بشطارتك وفهامتك ومتتحكمش فيهم .. غدوا صباح كي تروحو متحوسوش عليا .. عيشو حياة أخرى وانساو الحومة هادي وانساوني ..
– واش راك تودع عمي برنو والا واش ؟
= أنا راني قاعد هنا معندي وين نروح راني مليح كيما راني .. أنا نخاف يصرالي كيما هاديك الحوتة غير تخرج من البحر تموت .. هنا عشت وكبرت .. هادا منعرف ، فيها باراكة .. متخافش متخافش .. كي نتوحشكم نجي نشوفكم نعرف وين نصيبكم ..
– متأكد مراكش ناوي تروح عمي برنو ؟ خممتلها مليح هادي ؟
= ايه …
– تعرف يا عمي برنو ، نت على الاقل راك درت القلب وخيرت وش راك حاب .. شت الحومة هادي بيها بعيبادها ؟ المخير فيهم ما خير الحياة لي كان حابها .. واحد فينا مقدر يخير الحياة لي كان متمنيها .. مام غدوا رانا راحلين .. معلاباليش اذا نقدروا نخيرو من بعد والا لالا .. ربي برك هو لي علابالو ..
= سبحانو
– تصبح بخير عمي برنو ..
= اللاز ! الباصي باصي …
– وحنا ذهب ماشي كاصي ….