السلام عليكم، علابالي وقت بحر و تحواس بصح حبيتكم تعرفو بلي المعهد تع الفندقة و السياحة – بومرداس بدا التسجيلات، و فهاذ الدورة فتحو التخصصات التالية:
اولا النمط الحضوري، و هو النمط لي تقراو فيه فجميع ايام الاسبوع، ما عدا الجمعة و السبت (باينة)، و يسمحلك انك تستفاد من الإطعام و الإقامة اذا كنت تسكن بعيد، كذلك يسمحلك انك تستفاد من منحة كل ثلث أشهر (كيما الجامعة) فتحو فيه :
– تخصص السياحة – خيار إنتاج و تسويق: و هو تخصص تتعلمون فيه كيفية تصميم، تخطيط و إنتاج المنتجات السياحية، سواءا رحلات (excursions), اقامات (sejours) او جولات (circuits) على حسب الطلب أو إنتاج على شكل packages, تتعلمو فيه تقنيات التسويق السياحي، عمل الحجوزات، طرق المفاوضات مع موردي الخدمات و كذلك طرق استقبال الزبون و البيع، مع أساسيات التواصل بمختلف اللغات (الفرنسية، الانجليزية و الألمانية) هو تخصص شباب يسمحلك انك تفتح وكالة سفر بعد عام خبرة.
– تخصص الفندقة – خيار إدارة و تسيير الفنادق: هو تخصص شباب تتعلمو فيه أساسيات و تفاصيل الفندقة، بدءا بالاستقبال و وصولا إلى كيفية تسيير الفندق بكل اجنحته (المطعم، conciergerie, service drh, Service des étages…) هو تخصص مليح يسمحلك بالعمل في أرقى الفنادق و حتى Les bases de vie و les complexes و ما إلى ذلك.
نزيدو نحكيو ضرك على نمط التمهين، هو نمط تقراو فيه يومين فالمعهد و ثلث ايام تديرو فيهم تطبيق فوكالة سفر او فندق من اختياركم، النمط هاذا ما يخليكش تستفاد من الإقامة و لازم يكون عمرك اقل من 35 سنة يوم الدخول، بالمقابل يسمحلك تستفاد من شبه راتب (presalaire)، فتحو فيه:
– تخصص الفندقة و الاطعام – خيار فن الطاولة و الخدمات: بدون مبالغة اكثر تخصص مطلوب فالسوق، تخدم صيف و شتا، الفندق لي تحب و complexe لي يساعدك، و طبعا مع شوية خيوط تخدم فles bases de vie نورمال، تتعلم فيها طرق تقديم الطعام و اعداد الطاولات و كيفية التواصل و خدمة الزبائن، كذلك كيفية تسيير المطعم، و تقدر أيضا بعدها تفتح المطعم تاعك، سواءا عادي او راقي، كيما تحب.
تخصص السياحة – خيار وكالة السفر: هو نفس تخصص إنتاج و تسويق الذي تم شرحه سابقا، اصلا تم اقتراح دمجهما في تخصص واحد في الدورات القادمة.
على كل حال اي دبلوم زيادة مليح ليك، و اذا كنت قافز يفتحلك أبواب ما تتخيلها و يوصلك لناس ما تتوقعش انك توصلهم في تخصصات أخرى اطلاقا
مرحبا بكم و بالتوفيق، اي أسئلة لا تترددوا.
