السلام عليكم
طريقة الوصول إلى جزيرة بيرهنتيان (perhentian)
الرحلة من الجزائر إلى كوالالمبور ليسكال في قطر .
عند الوصول إلى المطار الدولي لكوالالمبور 1 في ماليزيا غيرت المطار ورحت للمطار الداخلي2 للذهاب إلى مدينة تيرينڨانو (terengganu) والتذكرة هاذي بين كوالا وتيرينڨانو شريتها 25€ (6000دج) مدة الرحلة 50 دقيقة .
كي وصلت لمدينة تيرينڨانو توجهت للمحطة البحرية كوالا بيسوت (Kuala besut ) عبر الطاكسي بسعر 6700دج والمدة تقريبا ساعتين سير (كاين النقل البحري وكاين الحافلات رخاس لكن انا لحقت فالليل ولهذا تحتمت عليا نروح فطاكسي ولكن كي تكونو صحاب تقسموها 6700دج جيكم رخيصة) .
كي وصلت للمحطة البحرية رقدت في فندق هناك والصبح غير نضت لقيت روحي واجد مشيت حوالي 5 دقائق و من هناك ركبت السفينة ورحت للجزيرة حوالي 40 دقيقة سير فالبحر .
وكي توصل للجزيرة تحب تهبل مالجمال والخلوي لي فيها أنا حجزت في فندق suheila حوالي 45€ الليلة الواحدة فندق على البحر مباشرة Pied dans l’eau .
وكاين فلايك صغار يخدمو طاكسي يدوك للشاطئ لي تحب والسعر مناسب بين 400دج و600دج حسب المسافة
البحر شباب بزاف في كل المناطق والرمل أبيض والسياح من كل جنس ولكن الشواطئ فارغة ماكاش الهاماج والدحيس .
و في العودة عندهم السفينة ترجع 3 مرات فاليوم 10 تع الصباح و 12سا و 16سا و بنفس الطريقة ترجع لكوالالمبور وانا زدت قعدت 3 ايام في كوالالمبور ورجعت .
صراحة تجربة رائعة ولي عندو أي استفسار مرحبا 🙂
سعر التذكرة 125000دج (12مليون و500) مع القطرية .
كي توصل للمحطة البحرية تخلص حوالي 3200دج تذكرة السفينة تشمل الذهاب والعودة .
حوالي 1500دج ضريبة على السائح .
بالنسبة للفنادق كل واحد ومقدورو أدخل لبوكينڨ وخير كاين كل الاسعار .
بالنسبة للعملة تمدلهم 100€ يعطوك 500 رينڨد ماليزي اي واحد رينڨد يساوي 45دج
.
بصحتك خو❤️