السلام عليكم ، انا بصدد التخطيط لرحلة العمر : الجزائر – السعودية (ايسكال خفيف) – كوالالمبور (4 ليالي) – بالي (5ليالي) – سنغافورة (ليلة) – كوالالمبور – السعودية (ايسكال 3 ايام لاداء العمرة “فيزا مجانية”) – الجزائر
الرحلة اقتصادية و تكون حوالي 26 مليون.
هل من نصائح من فضلكم !
#1001_help
رحلة شابة هادي خويا
أنا مرحتش لشرق آسيا بصح ننصحك تشوف كيفاه تروح لكل الدول القريبة لإندونيسيا يعني تزيد تايلند كاملوديا و فيتنام للبرنامج تاعك خاطر اغلى حاجة هي التذكرة ومدامك رايح شوفهم كامل خطرة وحدة
تأكد من فيزا سنغافورة، ليست سهلة
Edini m3ak😕
كيف؟ المزيد من المعطيات؟ وكالة سياحية؟
Rabi yshalak de préférer troh l char9 asai tzid les payé kml li Thema
شحال تذكرة الطائرة ؟
Dream destinations 😍 good luck
نصيحتي : استمتع 😍❤️
وفقك الله و سدد خطاك
بالتوفيق خويا
كيف الطريقة لرحلة مثل هاذي ؟
روح خويا بصحتك روح وحدك خير و مكلاه وكالة
ان شاء الله أستمتع و عيش لحظة متسمعش للمحبطين
عندما تكون دارس امور و واضع خطط تأكد انك راح تكون اجمل ايامك ❤️❤️
المرة جاية زيد لمد دراهم و اذا تحب تنوع ثقافات روح للمالديف نهارين ولا ثلاثة و مبعد الهند رخيسة طول قريبة ليها و زيد اختمها بسريلانكا وش نقلك رحلة موفقة ♥️😍
حاليا بالي راهي بالفيزا، و الفيزا تاعها بدعوة من شخص من بالي و غالية شوية
خطوط سعودية ارخص خطوط بالنسبة إلى تركية ولا امارتية احسن حاجة درتها
لفاكسان ماتنساش بعض دول يطلبوها لحد الان
جمال جمال ها واش كنت نقول
أخي بالنسبة للسعودية يجب فيزا ترانزيت أو فيزا شنغن
هل يمكنني مرافقتك فتخطيطك أعجبني و أريد زيارة الدول التي قمت بذكرها
ياخويا كي تروح اعطينا المخطط والايجابيات والسلبيات … طريق السلامة
اعطينا برنامج الخطوات خويا ربي يحفظك
إندونيسيا و سنغافورة و ماليزيا يركزوا على الحجز الفندقي انا فماليزيا قريب رجعوني لدزاير نسيت ما اكدتش الحجز حتى قتلهم بلي دارتهولي وكالة و بعثوه عندهم دوك نقوللهم يبعتوهولي
فيزا سنغافورة راهم مزيرينها و ليلة وحدة ماتكفيش غير ادا مخطط تزور زوج ولا بلايص قراب لبعض (هي صح صغيرة بصح ليلة ماتكفيش باش تكتشفها)
زيد شويا في المبلغ ما يكفيش
اخي كنصيحة حاول تحوس على المعلومات جيدا في المواقع الرسمية و ماتشوفش تعليق واحد و تآمن المعلومة بدون تحقق لأنو رايح تخسر الرحلة تاعك
26 مليون !!
كي تروح وترجع ان شاء الله احكينا على التجربة والمصاريف رحلة موفقة
الله يسترك و يديك و يجيبك في لامان، وصاية برك ماتحتكش مع منوالة راهو الوقت يخوف، و امشي وين كاين الموفمون و ادخل بكري لوتال ماتخليش حتان تحبس الرجل باه تدخل، و حافظ على الصلاة و الأذكار و الاستغفار ديما لازمينك.
سؤال برك على كي قلت العمرة 3 أيام، كاينة منها؟
بصحتكم وربي يهنيكم
اذا راك مخطط في شهر اوث راح نتلاقى تماك اخي
26
تقريبا 18الى 19 تروح طايرات بس
و الانشطة كاين بزاف و كلهم بالدولار و النقل داخل هذه المدن خاصة في بالي
نصيحة مني نقص الايام في كوالامبور و عوضهم يا بايام في بالي ولا سنغافورة لانو تكفيك يومين في كوالا
و اذا كانت ميزانية شوية ناقصة ما تروح لسنغافورة تربح دراهم الطاىيركًو الفيزا و تعوضهم باماكن جميلة في بالي
عاود راجع حستباتك، 26 مليون (€1300) ماشكيتش تكفيك
لاعدت شاب بصحتك ممكن تقدرلها بصح ماك راح تستمتع بوالو لان هذه الرحلات كلها متعبة جدا
الفكرة مليحة لكن جيبك لا يكفي
مانيش نثبط فيك خويا بصح المبلغ راه يبان شويا قليل ، خاصةً سنغافورة النار حامية عندهم في الاسعار
بصح عادي جرب و شوف ممكن تلقى مبيت ارخص
رحلة سعيدة
نصيحة وحيدة روح أزدم ومتسمعش لناس
ماشاء الله
انا درتها بصح الجزائر كوالالمبور وايسكال في قطر ..
كوالامبور الماكلة فيها رخيصة وحتى المواصلات عليك بتحميل تطبيق grap والفنادق مليحة مثلا verdant hill ببوكينغ جاي قريب من كلش وفيه مسبح وافطار ولا اروع ب 7000 دج غرفة مزدوجة انصحك به …
وباقامتك بالسعودية في طريق عودتك راه كاين فنادق رخاص بالعزيزية الشمالية وفيهم مواصلات مجانية …. بالتوفيق
ماتنساش تكتب اسامي البلايص اللي تحب تزورهم ورقم الحافلات لتدي ليهم وتامبريمي خريطه تاع المواصلات ورقم القطارات واسامي المحطات والماطارات باه ماتضيعش وقت ونت تحوس انا هكدا ندير نكتب كلش في اجنده صغيره حت اسامي الشوارع نهزهم من غوقل اسامي المطاعم الحلال اسامي السوبرماركت الرخاص في السعر نشوف تعليقات تاع ناس عل المطاعم الرخيسه وجوده مليحه باه نربح وقت ومصاريف. و enjoy بصحتك وربي يتقبل عمرتك
ان كان 26 مليون دون احتساب تذاكر الطيران فتكفيك عادي و تفضال
أما اذا كان 26 مليون شاملة لكلش، محال تكفيك، تبع معايا:
عندك 10 ايام مبيت، نقولو جنوب شرق اسيا رخيسة، تبات في بيت شباب 10 اورو × 10 ايام = 100 اورو
فالسعودية غالية تقسم، محال تلقى تحت 50 اورو الليلة، 50×3 = 150 اورو
فيزا بالي 50$
الأكل لمدة 13 يوم، نقول 5 اورو لكل وجبة، 26 وجبة × 5 اورو = 130 اورو
التنقلات في اربع دول و دير حسابك، السعودية قطار الحرمين باش تروح من جدة لمكة، ذهاب اياب 120 اورو هادا الشي لي باين، دون احتساب التنقلات الداخلية، من المطارات الى وسط المدن لي ناوي تزورهم، او بين المدن اللي حاب تزورهم…
100 اورو مصاريف التنقل الداخلي
المجموع = 650 اورو
26 مليون تعادل 1234 اورو بالسوق السوداء, يعني تبقالك 590 لتذاكر الطائرات وهدا شيء مستحيل, 590 اورو هو سعر التذكرة الجزائر السعودية ذهاب و اياب أخي
يا أخي تبانلي من غير الممكن قاع هاد الدورية ب 26 مليون فقط!
من ترجع ان شاء الله قولنا بالتفصيل شعال ستقامتلك ان امكن
مشي وقتها ، خلي ورى رمضان
خويا من فضلك شحال شريت التذكرة ؟ جابلي ربي راك غالط في مصاريف رحلة ..مستحيل يجوك سنة و عشرين
كوالالمبور مافيها والو ابار شويينڤ…تكرهي حياتك… مادام جاية لجنوب شرق آسيا… حاولي تبدلي البرنامج. غير كيما نعرف وحدين جاو دارو شهر في جنوب شرق آسيا بين تايلند، فيتنام، كمبوديا،و يومين في كوالا لمبور، بالي مليحة، باه تقتصدي ديري couchsurfing تستضيفك عايلة عندهم باطل، و درك راح الحال سخانة هنايا… سنغافورة ماكان ماكان، كوالالمبور قعدت فيها سمانة في نوفمبر كرهت حياتي برك الا حبيتي تروحي للجزر مليحة بصح تستقام، بصح العاصمة انا ماعجبتنيش جاية مخنوقة، إلا تقعدي يومين 3 بالاكثر، بالي مليحة، و فيتنام و كمبوديا مايستقامو و يستاهلوا خاصة للفيتنام، كيما قتلك couchsurfing ينقص عليك مصاريف ال فندق، ايضا كوالا لمبور ماهيش آمنة نحكي عن تجربة زوجي قعد فيها قريب شهرين كتشفها مليييح كي جيت انا…ولينا غير تظلام ندورو بالمواصلات يعني مانتمشاوش على رجلينا فالاماكن الخالية لكن بقية الدول المجاورة جد آمنة.. خططي للرحلة قبل ماجي و سنغافورة بزاااف مزيرين و يرجعو مالمطار بزاف صراتلهم نعرفهم صراتلهم خاصة لي ماشي معولين يطولو فيها يردوك مالمطار كي يشوفو بلي راح تقعدي نهار برك…
و نصيحة تاني في ماي راح يكون المناخ ممطر، و دي backpack باه ماتغبنكش