السلام عليكم ، شفت ناس تحوس على معلومات السفر الى تركيا ، بما اني رحت في اوائل م

السلام عليكم ، شفت ناس تحوس على معلومات السفر الى تركيا ، بما اني رحت في اوائل ماي هاذ العام حبيت نشارك معاكم تجربتي
•التذكرة : الخطوط الجوية الجزائرية 53000 دج إشتريناها 3 اشهر قبل موعد الرحلة
•الاوتيل : اخترنا أوتيل في وسط اسطنبول قرب المسجد الازرق و آيا صوفيا ، بعيد 8 دقائق عن الترامواي بسعر € 620 غرفة ثلاثية مدة عشرة ايام اسمه Elisa hotel . ( عن طريق Booking ممكن الاسعار تتغير في الصيف )
•التنقل من المطار للاوتيل : اصحاب الاوتيل تواصلو معانا و عرضو علينا التوصيل ب 50 € سيارة خاصة .و في في العودة كذالك
• التنقل في اسطنبول : عن طريق الترامواي و الحافلات ، كاين تطبيق اسمه moovit دير وين راك باغي تروح انطلاقا من أي بلاصة و في اي وقت و يمدلك المواصلات التي تركبها منها رقم الحافلة او الترامواي .
•التسوق للنساء: كاين ماركات تركية تبيع بسعر جدا معقول مقارنة بالجزائر و هي : Defacto , LC Waikiki, Koton و كذالك الاسواق الشعبية اللي رحتلها هي سوق الجمعة و سوق محمود باشا الموجود في منطقة eminönu يليق تروحو في الصباح الباكر و الملابس الخارجة عن الموسم تلقا عليها تخفيضات كبيرة و ذات جودة جد عالية و قاشحو في هذه الاسواق باسكو كاين لي كي يشوفوك سائح بلعاني يزيدو السعر
ايضا كاين محلات gratis و Eve لمستحضرات التجميل
بالنسبة للمولات : رحت لاربع مولات : Venezia , olivium , Historia , kale كلها تسحق الزيارة ماعدا kale .
الاماكن السياحية : جزيرة الاميرات ، ortaköy اللي فيها البطاطا الكامبير و فيها مسجد مطل على البحر ، شارع تقسيم و برج غلطة ، miniatürk , اكواريوم فلوريا ، مسجد أيا صوفيا و المسجد الازرق ، Venezia .
•نصائح عامة: كي تبغي تصرف العملة الصعبة صرف في المناطق لي مافيهاش السائحين بكثرة مثل منطقة سلطان أحمد فيها التصراف غالي كذالك الحلقوم مثلا 600 ليرة لكن عند محل اوباما المتواجد في سوق محمود باشا 200 ليرة للكيلو (100 ليرة بالتقريب تساوي 1000 دج ) .
الاكل عندهم غالي حتى الماركات العالمية مثل ماكدونالد الاسعار فيها تبدا من 100 ليرة ،
التنقل بالترامواي يكلف 10 ليرة للرحلة لازم تشري كارت اسطنبول للتنقل و في حال كنتو اكثر من شخص تستعملو نفس الكارت و مع عدة استعمالات كي يفرغ و تبغي تعاود تعمره الالة ماراحاش تقبل الدراهم و تولي بسيف عليك تشري كارت جديد ( سعر الكارت 50 ليرة )
رحلة موفقة لجميع واحد رايح ☺️