السلام عليكم ، صيف 2022 في بجاية ، الجزائر من بين الاماكن التي يمكن زيارتها و

السلام عليكم ، صيف 2022 في بجاية ، الجزائر 😍

من بين الاماكن التي يمكن زيارتها و النشاطات التي يمكن القيام بها في بجاية:
✅كاب كاربون (cap carbon)
✅ يما ڨوراية، المشي حتى pic des singes، صعبة شوية باش تلحق بالنسبة للكبار، لانو فيها بزاف درج و عالية، تلقاو تما بزاف قردة لي تقدروا تلعبوا معهم و توكلوهم.
✅ شاطئ les aiguades
✅ شاطئ الساكت أو بوليمات و كاين بزاف شواطئ، شخصيا عجبني بوليمات بزاف، نقي، فاميليال، و فيه نادي يديروا الغطس (club de la plongée sous marine) ، بالنسبة للغطس، في لويكاند. شاك ويكاند تلقاوهم، حاولوا تكونو تما حوالي 13سا هما 14 يروحوا يديروا الغطس، و بالنسبة لايام الاسبوع، اذا كاين ڨروب يديروا، سي نو لالا. بالنسبة للسعر، يديروا 2000دج للواحد، مدة الغطس، 10 دقائق أو اكثر، يعتمد على عدد الأشخاص.
✅ في الليل كاين brise de mer, قريبة للميناء (le port) فيها سهرات ملاح عائلية، كاين تاني مطعم تقدروا تتعشاوا فيه
✅ شلالات كفريدة (les cascades de kefrida)، مكان بزاف شباب و فيه الغاشي، تقدروا تديروا تما zipline، كيما راكم تشوفوا في الفيديو. بالنسبة للسعر، 300 دج ادا درتوا كيما أنا ، و كاين نوع آخر لي هو تتعلق من ظهرك، صافي تروح على كرشك، هدا 500 دج. و ما تخافوش 100% safe😁
✅ سد ايغزر اوفتيس (ighzer ouftis) هذا مكان ولا اروع، راحة نفسية فيه و قريب من كفريدة. بعيد عليه ب وحد 4 كلم أو اقل, باش تحبطوا للباراج، تقدروا تكروا بيدالو تروحوا بيه ولا تحبطوا تمشوا، شوية وعرة الحبطة هاديك مي البنة في المغامرات😍😁
✅ تيزي نباربار، مكان جميل جدا فيه جسر تمشوا فوقه ومن تحت كايو وديان و شلالات، كي يخلاص الجسر، تلقاو الواد و تلقاو بزاف منابع للمياه صالحة للشرب (sources) و الماء ديالهم لذيذ جدا😋
✅ مغارات اوقاس😍 ( les grottes d’aokas)، مغارة جميلة و مثيرة للاعجاب. الدخلة ب 100 دج للكبار و 50 دج للصغار. دخول مجاني بالنسبة للاطفال اقل من 5 سنوات.
✅ تقدروا ايضا ديروا الطيران الشراعي (parapente) في اوقاس. كاين ناني في مالبو مي أنا درتها في اوقاس و عندي معلومات الناظي تحبوا نمدلكم رقم الهاتف أو صفحة الفايسبوك ديالهم. السعر 5000دج و المدة تتراوح ما بين 5 دقائق الى 10د.
✅ البحيرة السوداء. (Le lac noir), هادي بعيدة شوية، وحد 100 كلم بعيدة على المدينة، و زيد لازم تمشي وحد 12 كلم على الاقدام حتى تصل، صراحة اظن انها مغامرة شيقة و لكن ما قدرتش نروح ليها هاد المرة، مرة أخرى ان شاء الله.
✅ تقدروا ايضا تزوروا جيجل و سطيف في طريقكم ادا كفاكم الوقت، أنا رحت لجيجل مرة، رحت للمغارات العجيبة.

هذا وش قدرت نمد، أنا زرت بزاف اماكن ما شاء الله ، و ما كاش لي يحكي معاك أو يدنا ليك، ناسها مربيين و محترمين الله يبارك.

ملاحظة: بالنسبة للاسعار الاخرى كيما الباركينج…الخ، معظمهم 100دج و في الشواطئ 200دج، في الشواطئ تحب تكري طابلة ، كراسي و باراسول ب حوالي 500دج، ولا ادي معاك، كما تشاؤون.
نتمنى نكون فدتكم، اطرحوا اسئلتكم هنا و سأحاول أن اجيب ان شاء الله.

#1001tourisme