السلام عليكم أول منشور ليا، حاب نسقسيكم أنا إن شاء الله مسافر لتركيا مع الوالدة لمدة أسبوع في أكتوبر المقبل، طلبو عليا في ملف الفيزا كشف الحساب البنكي اسكو كشف الحساب البريدي يكفي مع العلم أني موظف عند الدولة، او لازم عليا حساب بنكي مع العلم أني أملك دفتر التوفير والاحتياط الخاص ببنك CNEP. بالإضافة كاشما تنصحوني مثلا متوسط العملة الأجنبية لي نديها معايا مصروف بين التنقل والاقامة والطعام من الحاجيات الأساسية أو الأماكن لي مفضل نزورها وبارك الله فيكم.
الصورة فقط للفت الانتباه.
يكفي كشف الحساب البريدي مدام تتلقى فيه خلصتك لتما
بالنسبة للتنقل كي توصلو دير بطاقة اسطنبول ليك وللوالدة ب 50 ليرة الوحدة وتعمرها ( اذا مزادتش حاليا)
النقل شوي غالي بالباصات والترامواي لكن ارخس من السيارات تقريبا توصيلة بالحافلة تبدا على حسب المكان ب 10 ليرة قما فوق ( اذا مزادتش )
اذا عرفت روحك حتجت طاكسي ماتهزش السيارات لي برا واذا هزيتهم قولهم ديرو العداد والا حمل تطبيق Bi Taxi دايركيما يسير، اذا رح تقعد في فندق قبل متخرجش كي تعيط لواحد مد للاستقبال يهدرو معاه يفهموه وين البلاصة وقاع
انا تنقل صرفت عليه قريب 600 ليرة ( 3 في ايام اسطنبول ودرت فيها بزاااف ) والباقي خارجها..يعني باش تقعد اكثر طلع حسابك ..وشوف شححال باش تدورو .. اذا الوالدة بصحتها .. ديرو برنامج الاماكن لي تروحولهم يكونو حدا بعض ..باش ماتستهلكوش ياسر نقل.
Ghi ccp ykfiii
الطعام مش غالي ياااسر ..وبنين اكل الشوارع كاين شوارما ، كاين الكومبير ..وديرو نهار تاكلو فيه حاجة الله الله في مطعم مليح تقريبا تحتاجو 1000 ليرة للاكل باش تاكلو بالوسع وبالراحة اذا بالديق يمكن اقل.( مليون ولا اكثر شوي بدراهمنا)
المصروف الباقي هداايا وحااجات اساسية ..انا رحت في اوت لي فات وانصدمت كانت دنيا غااالية جدا جدا شغل دزاير وغلطتي لي شريت اللبسة…يعني ادو بالوسع 500-600 اورو باش متحصلوش وحاولو تصىرفو اقل …
ننصحكم حوسو وكولو واشرو هدايا بسيطة( تلقاو هذوك لي عند الجامع الازرق ) ومتشروش من تقسيم… بالاك السوفونيرات تصرفو عليهم 200..300 ليرة بزايد
اكتوبر وقت مليح وجو مليح بالاك تلقو دنيا رخست شوي
وزيدو شاورو الناس لي راحو مؤخرا
الاماكن لملاح كاين
السليمانية (كاين جامع)وكاين مقهى اسمه Hüsnü Ali .تقهويت فيه وعجبني وعليه اطلالة للبحر والبوسفور.. – الجامع الازرق – اية صوفيا حاولو تروحولو وقت كاش صلاة..تستمتعو بيه اكثر – كاين جيهة ايا صوفيا متحف بصح عليه لاشان- كاين تقسيم وبرج غالاتا مش بعاد على بعض- حي بلاط- ايمينونو- اروتاكوي – اركبو في البابور يدور بيكم..جربوه في نهار وفي ليل كل واحد عنده ذوق روحي للجانب الاسيوي اذا قدرتو تروحولو ببابور ..فيه بلايص هايلين ..شوف تيكتوك
جزيرة الاميرات تقدرو تروحو ببابور وحدكم وتدفعو اقل كيما لي يروحو بالبابور لابيروز في دزاير … ماتبعوش تع الوكالات يدو عليكم دوبل …الاكوا …
كاين بزاف امااكن يخصكم تكتبو برنامج ووشفو الاماكن لي قراب لبعض وخيرو اوقات لي جوهم يناسب كل مكان
بالتوفيق
تاشيرة تركيا يطلبو 60 اورو للشخص الواحد في اليوم دير حسابك و قدملهم وثيقة تثبت امتلاكك للمبلغ المطلوب