السلام عليكم … اليوم جيت نحكيلكم على رحلتي لمصر، لأنو بسبب المنشورات لي شفتها

السلام عليكم … اليوم جيت نحكيلكم على رحلتي لمصر، لأنو بسبب المنشورات لي شفتها هنا هلاني ندير كوراج ورحت. إن شاء الله نتوما تاني تلقاو واش راكم تحوسو هنا.

أول شيء سعر الطائرة أنا حجزتها 3 أشهر قبل الذهاب ب 5 ملايين + الفيزا طلبتها من وكالة رقمية تخلص 7000 دج هنا وكي تلحق لمطار القاهرة تخلص 25 دولار باه يمدولك فيزا تتعلق في جواز السفر + 2000 دج مصاريف الضمان لي تخلصها هنا قبل الذهاب + حجز الفندق عبر تطبيق booking (شخصيا حجزت في فندق أنا وصديق ليا في وسط البلد وفندق محترم وبسيط لتسع ليالي ب 160 يورو)

هذي هي مصاريف الرحلة الثابتة ولي تخلصها هنا في الجزائر قبل الذهاب لمصر.
– أهم نصحتين هنا؛ أحجز الطائرة دائم قبل الوقت بمدة من أجل سعر مناسب / اختر فندق في وسط البلد باه تقدر تمشي لأغلب الوجهات السياحية ومليحة للسهرات والتفسح-

كي توصل لمطار القاهرة، تصرف الأورو لي عندك، وكنصيحة صرف 100 أورو برك ومنبعد كي تحتاج زيد صرف لأنو مش راح تقدر تعرف تقريبا مصاريفك شحال راح يكونو.
100 اورو ب 3380 جنيه مصري بسعر البنك في المطار.

وشريحة الاتصال اشرو من المطار فيها عروض شابة، انا شريت orange فيها 27 gb وبزاف هدرة ب 210 جنيه مصري ، وباه تروح للفندق نزل تطبيق uber وروح بيه عموما راح تخلص في حدود 100 الى 150 جنيه مصري

متوسط المصاريف اليومية في مصر تختلف من شخص لآخر ولكن عموما 500 جنيه مصري (ممكن أقل وممكن أكثر) كافية باه تفوت مصاريف نهار كامل مرتاح من طعام ونقل وغيرها.

نصيحة مهمة تاني نمدهالكم، هو أنو قبل ما تروحو لمصر ديرو برنامج رحلة باه ما تضيعوش الوقت وتقدرو تستفدو من الرحلة وطبعا أهم حاجة استمتعوا هذا أهم شيء

مصر فيها بزاف مباني تاريخية ودينية مميزة عن بقية كل الدول وعادات الشعب والمدينة تخليك تتعلق بيها وتخليك تستمتع، رغم وجود بعض الأشياء لي تقلق كيما الناس لي تلسق فيك باه تبيعلك وفي كل مكان سياحي يحبو يتحايلو عليك.
ولكن تبقى مصر وجهة سياحية فريدة من نوعها وبثقافتها وعاداتها ننصحكم تزوروها وتتمتعو بيها.
أعرفو ناس وعيشو التجربة المصرية والتنوع الثقافي الموجود هناك وتقاليد أهل المنطقة .. عرفات بزاف ناس فيها مصريين وعرف مثل سوريا والسعودية وغيرها، مرينا ببزاف أمور وتبادلنا كثير الحديث وخلينا لحظات لا تنسى فيها.