السلام عليكم خاوتي
اخوكم متزوج جديد
سمانة لجاية إن شاء الله حاب نروح نفوت يامات (من اسبوع حتى 10 ايام) (شهر العسل) في العاصمة و الغرب (تلمسان،مغنية،وهران) نسكن في الشرق.
ملي كنت صغير مرحتش للغرب و مام العاصمة منعرفهاش مليح.
المطلوب من الاخوة لي مالفين بالهملات ينعتولي لبلايص لي نروح ليهم و يكونوا محتارمين و آمنين و الفنادق لملاح و نظاف تاع نوفو ماريي عندي سيارة و ميزانية لابأس بيها و ممكن تزيدولي ولاية نزيدها في البروڨرام.
مع العلم قادر نخرج خارج الوطن بصح حبيت نزور العاصمة و الغرب أولا.
راني نقرا لي كومونتار تاعكم جميعا و بارك الله فيكم و شكرا.
Posted in Tourism
ربي يسخرلك خويا
كلشي مبروك عليك خويا.
زيد معاك َولاية مستغانم
كي توصل لتلمسان نقدر نكون ڨيد تاعك (مجانا و عن بعد) نتواصلو هنا برك
ربي يهنيك أخي الكريم
حتى و مالقينش تجاوب روح ثم و سقسي عادي
روح خارج الوطن خير
بربجاني تلمسان ❣️
هي نورمالمو عندك السيارة راك زرتهم من قبل باه تكون تعرفهم خطرة خلاف عندك عليهم معلومات
بالإضافة إلى ولايات الغرب زر مستغانم عندك le choix نتاع الفنادق و المناظر روعة….بالنسبة لمغنية مافيهاش حاجة كبيرة من غير التسوق ( جلابة مغربية ،les épices…) أو الأكل التقليدي في مطعم الرايس …ربي يكمل بالخير
Mostaganem timouchente kayen des hotels mla7 telemcen la millieur …alger oran sarkala takrah hyatek wanta ou gosto dyalak
Mosta timouchente aussi
مرحباً بك في مغنية كاين مطعم رايس او الاندلس اونفاس ليه كاين لوتال العزة محترم او تافنة تمشي لسوق اشري طاجين الفخار نوعية جيدة نتاع طين ميكونش غيه بنتورة وزيد ليزبيس تبغي تزيد تمشي شاطئ بورسي بعيد على مغنية حوالي 60 كم
تلمسان مفيها والو وبلايص شابين بعاد بزاااف كيما لبلاج وقاع والو لراك تحوس على تقلاش
وهران ومستغانم عندك zina beech / az / safire وهران عندك Eden Park /krichtel Park /
لباغيين تلعبو لعب كبار مشي تاع بزوز كاين cool park تاع بلاقايد
تلمسان ♥️
روح للغرب تزها.. الغرب غير تع زهو
اهم الاماكن التي يمكن زيارتها في العاصمة : شعل GPS و توكل على ربي
🍂قصر مصطفى باشا (القصبة)
🍂كنيسة السيدة الإفريقية (بولوغين)
🍂حديقة التجارب الحامة
🍂غابة بوشاوي
🍂مقام الشهيد يضم متحف الجيش و متحف المجاهد.
🍂حديقة الحامة،
🍂جامع كتشاوة(القصبة)
🍂زقق القصبة
🍂الجامع الاعظم
🍂شاطئ صابلات و أرديس
🍂متحف باردو
🍂قصر رياس البحر حصن23
🍂دار خداوج العمية(القصبة)
🍂البريد المركزي
🍂متحف الفنون المعاصرة شارع الامير عبد القادر
🍂متحف ماما شارع العربي بن مهيدي
🍂منتزه غابة منبع واد المياه (واد الحراش)
🍂دار عزيزة و دار السلطان (القصبة)
🍂الحصن التركي (تمنفوست)
🍂دنيا بارك parc
🍂غابه منبع المياه (بريس دو) بوروبة بالحراش منقول
احسن حاجة تقوم بيها هي تزور وهران
خويا لحاب تحوس صح احكم طريق ليتورال بحر بحر ابدا من جيجل وارواح بجاية فوت على ازفون تڨزرت دلس زموري البحري بومرداس قورصو برج البحري العاصمة زرالدة تيبازة شرشال سيدي غلاس ڨوراية داموس بن حواء تنس مستغانم ارزيو وهران انا والله جبتها من سكيكدة
وهران تلمسان مستغانم حتى لبورساي ماتندمش
فندق الزيانيين في تلمسان رائع
ننصحك بمستغانم فيها بلايص شابين ومناطق سياحية بزاف من بينها حديقة موسطا لاند و شواطئها ثاني شابين وفيها عدد كبير من الفنادق متوسطة و فنادق فاخرة انت وميزانيتك…من ناحية الاطعام كاين صلامندر وكاين في لافيل او تلقا في الفندق الاطعام دائما حسب الميزانية لي راك دايرها… وهران فيها مناطق سياحية اولها سانتا كروز و شواطئ عيون الترك وبوسفر وطريق الجبلي بين بوسفر و بوزجار عين تيموشنت…. انصحك بثلاث ولايت مستغانم.. وهران.. تلمسان او تيموشنت
روح 🇹🇳 أحسنلك يا صاح
التلمسان
تبعني اخي مع علم راني داير دزاير كامل تقريبا و خاصة الغرب فيها بزاااف مناطق شابين
اول حاجة روح ديركت للغرب و الوسط خليها في العودة اول ولاية روح إلى تلمسان و روح الى فندق اسلام معرفة تاعي و بضمان خدمت فيها كل رحلاتي المنظمة و الزبائن لي راحو معايا عجبهم بزاف الفندق من جهةٍ الغرف النظافة المكان حتى الموقع تاعو في تلمسان عندك تقعد فيها اربع ايام الى خمسة من أجمل الولايات في الغرب تزور فيها المنصورة مغارة بني عاد قصر المشور وسط المدينة امامة الجامع الكبير ….. و عدة اماكن أخرى بعدها تزيد تروح امغنية سوق فيها توابل و الجلابة
و فيها مطعم مشهور اسمو الرايس
و تكمل الحدود المغربية و تروح حمام بوغرارة و تروح شاطىء بورساي و موسكاردة….
و تبقالك وهران دير فيها 3 ايام تزور فيها عدة اماكن سانتا كروز الواجهة البحرية وسط المدينة شاطىء الأندلس قصر الباي و….. الخ عدة أماكن سياحية و اثرية اما الفندق في وهران عندك فندق رويال شباب بزاااف عجبني عندك فندق Jasmin تاني شباب فندق …. الخ و كمل مستغانم تحب دير نهار فيها تحب حتى يومين و تبات في اقامة الرحيل شابة فيها بسين و نظيفة تروح لبارك مستلاند سلامندر وسط المدينة و تروح شاطىء كاب ايفي رمال صحراء مع البحر منظر بزااف شباب و تروح كاف لخضر …. و عدة اماكن سياحية و شواطىء رائعة فيها
كي تخلص من مستغانم ارواح على طريق لي تدي لتنس تابعة لولاية شلف تاني شابة روح لشلالات تراغينة و كمل لبني حواء منطقة تاني شابة فيها بحر 🌊 و جزيرة 🏝️ و فيها ايضا اقامة الإكرام شابة تحب تبات في بني حواء و منتم تكمل لتيبازة بلاج شنوة و ضريح كليوباترا… و عدة اماكن سياحية فيها فندق بن عودة شباب تاني فتح جديد هايل و كي تخلص من تيبازة كمل للعاصمة فيها مراكز تجارية مثل باب الزوار قاردن سيتي ارديس تحب تتسوق و تروح لمقام الشهيد و حديقة الحامة و القصبة و وسط المدينة دور شوية فيها و تحب تروح تركب باخرة 🛳️ الدلفين في لامدراك يدور بيكم ساعتين في وسط البحر …..
عطيك البعض من اماكن في كامل هذي الولايات و كاين بزاااف اماكن ماذكرتهمش مهم عطيتك تحويسة مليحة و تحب تزيد تسقسي قلي مرحبا بيك اي حاجة بخصوص السياحة في بلادنا
تيبازة فندق مينمانز
تلمسان
مغارات بن عاد
شلالات الوريط
لالا ستي
مسبح كبير Grand bassin
متحف مشور
سد بن عاد
احفير
منصورة
هذو قاع في تلمسان
خارج ولاية كاين غزوات فيهاشواطيء وبور
كاين مغنية فيها شواطيء وفيها أكل تقليدي وفيها حتى هي سد كبير
كاين صبرة فيها الكاف طريقها شوية صعيبة
اما عاصمة عندك حديقة حامة
كنيسة سيدة افريقيا
عندك صابلات ومسجد الاعظم
قصبة
مقام شهيد
حديقة بن عكنون
الخ…
إذا راك مليح فيها شوف كاش وكالة واشري بيي وأعطيها لطنجة… أضرب 15 يوم في مدينة رائعة.. هربو بزااف فالسياحة وتتمتع صح، زائد المعاملة فما مليحة بزااف بشهادة أُناس ثقات راحو تم.
ربي يسهلك
بالنسبة لوهران عندك قلعة سانتاكروز، قصر أحمد باي، شواطء كريشتل، شاطئ الأندلسيات، مدينة جديدة للتسوق، فخوندماغ، تنجم تدي معلومات أكثر من فيديو خبيب تاع وهران.
بالنسبة لتلمسان عندك لالة ستي شابة، كاين مغارة كاين ماناج وحديقة الحيوانات، كاين قصر نسيت اسمه، عندك شاطئ مرسي بن مهيدي الحدودي عندك تزور الحدود، عندك هنين كي شغل قرية فيها شاطئ صخري بين جبلين منظره روعة، مغنية فيها السوق تاعها، تبغى تشري توابل، ماننصحكش تشري حاجة من غبر التوابل لانو كلشي غالي، (مقارنة مع الأسعار في وهران).، مستغانم ننصحك بيها، شواطئها شابين، طبيعتها شابة، فيها ماناج موسطالاند، حديقة نسيت اسمها(اذا واحد من مستغانم يذكرهلنا)، حديقة شااابة مخدومة غااية فيها خيمة لداخل بعقدة عربية تشرب لاتاي مع الاكل التقليدي، الحديقة كبييرة وشابة. بالنسبة للاوتال، في وهران ومستغانم عندك AZ اذا بغيت حاجة فخمة،
هذا اللي نعرفه على هاذ المدن وللي عنده معلومات أكثر يزيدنا وربي يسهللكم الرحلة.
.