السلام عليكم صحا عيدكم
نتمني يجاوبوني الكثير من الناس باش نكون فكرة مليحة
انا و الزوج جامي سافرنا خارج الوطن وراح تكون اول مرة
حابين نروحو تركيا في جويلية من فضلكم ما تضحكوش و فهمونا
1- علابالي لازم نحجزوه من ضرك باش يجي البييي ارخس بصح الفندق كيفاش نحجزوه من هنا و هل لازم ?
2- حابين نروحو اسطنبول و مناطق اخري مليحة مع العلم حابين نقعدو 7 ايام او اكثر قليلا واش هي الاماكن لمليحة في اسطنبول لي نقدرو نزورها و خارج اسطنبول تكون فيها الطبيعة مليحة لانو نحبو الطبيعة (تسما داخل و خارج اسطنبول )
3- وش من منطقة نحجزو فيها الفندق تكون وسط المدينة و قريبة من كل الاماكن السياحية و ركزولي علي الاكل و الثقافة و التاريخ و شوي شوبينق
4- الميزانية حوالي 35 مليون ل 2 هل تكفي ؟
5- الفيزا منين ؟؟
6-كيفاش نتنقلو خارج اسطنبول ؟
و شكرا لكم و ربي يفرحكم و سامحوني تعبتكم
.
على حساب معلوماتي تشري البيي قبل مبعد. تروحي للقنصلية تديري فيزا و يمدولك فيزا قيس اليامات لي راح تقعديهم برك
شوفو وكالة سياحية مليحة أحسن
اولا الفيزا تتصلي بالرقم ديالك ب vfs و تشدي موعد المواعيد قريبة يعني تتصلي اليوم تدفعي غدوة اذا كنت ا فالعاصمة راهم جايين ف المالحة. ثانيا الفندق حوسي الارخس تقدري تحجزي ف الفاتح مثلا و بعدها كي تحبي تخرجي كاين المواصلات قريبة. بالنسبة للاماكن الي تزوريها كاين بزاف ف اسطنبول و خارجها كيما صبنجة و طرابزون و راح تصيبي وكالات يدوك تما حوسي برك الارخس. و الافضل تروحوا وحدكم بدون وكالة منا.
اولا ديري في بالك الفيزا راهي 26000 دج
الاوثال كاين بزاف فنادق و من الاحسن شوفو واحد هنا احجزو فيه ليلة و لا اثنين و كي توصلو بدلو كاين فنادق ملاح و طايحين ماش كيما لي تلقايهم في بوكيينڨ
التذكرة غير اشري هذاك هو الوقت
التنقل في اسطنبول ساهل لازم شريحة هاتف و اسطنبول كارث و انتم فريتوها 7 ايام قليلة لأنو اسطنبول بزاف كبيرة و انتم حاطين اسطنبول و مناطق اخرى
ديري البرنامج لي راكي حاباتو و من بعد احجزو
المناطق الاخرى لكان صبنجة ، ازميت ، بوصة ، يالوا نهار تفروها شوفو مع وكالات كاين بزاف فالفايسبوك و اسعار تنافسية ابحثو من درك تلقاو
لكان حابة طرابزون و كابادوكيا ديري حسابك على الحجز اغلبهم يروحو غير weekend
35 لكان فيها تصراف ، اوثال ، تذاكر و فيزا مستحيل تكفي لازم تزيدو
تذاكر شوفي air Algérie تلقايهم طايحين خصوصا les vols de nuit
بيي شروا من درك وفيزا في جوان خدموها سمانة توجد والباقي 👇
تروحوا اقرب وكالة ديرو دوموند تع فيزا دوك في اسطنبول على حساب البنادم اذا كان يسلك راسوا يروح واحدو خير توصلي اسطنبول اشرو كارت اسطنبول تتنقلوا بيها.طرام باطوا. ميترو بيس لكن سمانة. متكفيش اسطنبول كبيرة بزاف فيها معالم اثرية عامين. متكمليها. ننصحك روخو الادا جزيرة الأمراء. بلاصة واسمها ايوب او بلاصة واسمها صرارير
لازم تختارو فندق يكون قريب من المترو و الترامواي لتسهيل تنقلاتكم و اول شيء ابداو بالفيزا تبقى سارية 6 اشهر
Diroli j’aime
اشرو les billets d’avion من ضرك خاطرش تشروه فالصيف يكون غالي بزاف يلحق حتى لثمن ملاين و زيادة
كاين هاد ليدات ملاح فلاپليكاسيون تع اير الجيري 52 تقدري تشريهم بذهبية
سبع ايام من الأفضل تقضوها ف اسطنبول فقط افصل ما تخسر وقتك ف التنقل ل مدن أخرى
الأماكن السياحية كثيرة ف إسطنبول… متاحف و مولات للتسوق
حمل تطبيق safarway و اكتب اسطنبول يعطيك كل الأماكن السياحية و اختار الأماكن لي تعجبك و دير برنامج لي يساعدك
الفندق ننصحك بالأماكن التالية : سلطان أحمد، غولهانة… سركاجي لأنها قريبة ل ترام و الأماكن السياحية
بعض الأماكن السياحية ننصحك بها : قصر دولمابشه
قصر توب كابي
حديقة غولهانة
المتحف الإسلامي
جزيرة الاميرات
جولة في مضيق البوسفور
زيارة اسطنبول لا تحتاج إلى وكالة سفر
من الأفضل تحجز وحدكم و تروحو باه تربحو دراهم و تصرفهم ف السفر افضل
الحاجة الاولى الفيزا وجدي. Dossier و تعيطي تحكمي موعد قبل اسبوع و تخلصي 28000 للواحد.
ثانيا الفندق دخلي لموقع booking و حوسي الفندق حسب الميزانية تاعك دوك احسن لانوا كي يقرب التاريخ يزيد بري و المنطقة من الافضل منطقة بايزيد او الفاتح، سيركجي هادو قراب للمناطق السياحية و المترو و الطرام باش تحجزي لازم كارط بنكار ولا روحي عند وكالة تحجزك و يديرك الدفع عند الوصول Cash.
تذكرة الطائرة الى شريتيها من قبل ب مدة تقدري تلاقيها 4 ملاين لواحد .
كي تلحقي ف المطار كين حافلات يدخلوا لوسط اسطنبول خيري الحافلة حسب منطقة الفندق.
باش تتنقلي خارج اسطنبول كاين محطة فيها حافلات وسمها essenler تروحيلها ف المترو و استعملي Application obillet باش تشوفي سعر النقل و الساعة لي يروحوا فيها الحافلات.
المناطق ننصحك كابادوكيا و طرابزون ريزا اوزنجول بولو اسكسشهير خيري واحدة فيهم.
7 ايام قليلة ادا حابة ديري اكثر من اسطنبول لازم على الاقل 10 .
35 مليون ادا تعرفوا تصرفو تكفيكم عادي وادا حابة استفسارات بعتيلي و دخلي شوفي الصور في صفحتي انستقرام
Nesrine_yous
السلام عليكم صحا عيدك ختي
1- أبحثي على ارخس بيي عبر تطبيق Skyscanner و الحجز قبل بالطبع يكون البيي ارخس ، اما الفندق ، تقدري تحجزي من عادي أبحثي في تبطيقbooking شوفي الاسعار و المكان و اراء الناس على الفندق ، و ممكن تحجزو ثم بصح تتعبو شويا بالباڨاج خاصة كي توصلو تعبانين
2- اسطنبول اسبوع ماتكفيش باش تكملوها ، و كاين مناطق قريبة فيها طبيعة جميلة ايضا سبانجة و معشوقية و الريف
3- سركجي و لالالي احسن المناطق للمبيت، تفادو تقسيم و بايازيت
4- ميزانية اذا بالحجز او لا ؟
عندك تقريبا لشخصين 10 ملاين للطائرة و 6 فيزا و فندق على ذوقكم من 3 ملاين حتى 10 ملاين عادي مصروف كي هنا كي لهيه تقريبا الاكل و التنقل
5- الفيزا أتصلي على vfs و تحجزي موعد يعطيوك الدوسيي ساهل و تقريبا مظمونة
6- داخل او خارج أستعملو الحافلة و الميترو و التنقل العمومي تفادو التاكسي
عن تجربة الخطوات ماشي لي صعيبة ولكن فيها حسابات زيادة مؤخرا لأنو التذكرة + الفيزا برك راهم غاليين.. الفيزا وحدها تسقاملكم في زوج قريب 6 ملاين و التذكرة على حساب، الله أعلم، في شحال تسقام في آخر الفترات تذكرة وحدة تدور فخمس ملاين وطلّع. لذلك مانعرف زيدو ادرسو ميزانيتكم. بالنسبة للفيزا تندار على مستوى مكاتب gateway International وهذا موقعهم لمزيد من المعلومات: https://gatewayinternational.com.tr/en/algeria .. المنطقة لي قريبة للأماكن السياحية داخل مدينة إسطنبول هي fatih و beyazıt و sultanahmet وممكن أيضا sirkeci وكاين خيارات متعددة للفنادق تقدرو تحجزوهم عن طريق الموقع المشهور booking.com وتخلصوه بالأورو كي توصلو ليه. بالنسبة للشوبينق مدينة إسطنبول معمرة محلات في كل مكان بالقرب من المناطق السياحية ولا تزورو بعض المولات فيها محلات ألبسة رخيصة الثمن إذا حابين طبعا كيما LC Waikiki و Koton و DeFacto وطبعا كاين مولات ملاح تدورو فيهم برك كيما Venezia Mega outlet جاي في Küçükköy .. فيما يتعلق بالتنقل داخل المدينة وخارجها تسحقو تشريو Istanbul kart وهذا فيديو يشرحلك الطريقة https://youtu.be/HQQ6b2E4c-M وطبعا شبكة مواصلاتهم فيها خيارات عدة تعاونكم. كنصيحة خروجكم خارج مدينة إسطنبول تروحو لمدن أخرى ماننصحكمش لأنو راح تزيدو بزاف مصاريف، حدكم تروحو للجانب الآسيوي من إسطنبول ل Galata و Taksim بصح مدن ماننصحكمش فأول زيارة. نرجع لسؤالك الأول حول هل لازمكم تحجزو الفندق، بالطبع لازم لأنكم تسحقو تحطوه فملف الفيزا وأوراق أخرى مثل assurance de voyage … إلخ. وبخصوص التنقل بش ماتضيعوش ننصحكم تشريو puce وعن تجربة أنا شريت esim بحوالي 21 أورو و أرخص من الشريحة العادية لي تشروها لهيه وش هو لازم هاتف يدعم التقنية وراح تساعدكم بزاف بش تدورو ب google maps. إن شاء الله ربي يوفقكم و إذا هاذ الخطوات جاتكم صعبة شوفو وكالة سياحية تنقصو المجهود شوي بصح عن نفسي تجربة أولى تاعي لإسطنبول غير فمارس هذا لي فات و أول مرة ندير كامل الإجراءات لأول رحلة ليا خارج لبلاد ممتعة جدا بتحدياتها ومشاكلها.
انا درت لماما و بابا كلش و خلصت لهم منا (عندي كارت فيزا) و راحو ف سبتمبر لاسطنبول فقط.. استقامولهم كلشي 30 مليون بين الاوتيل و التذاكر.. بصح زادو داو باش صرفو و ريحو لتم 10 ايام حق الاكل و الشوبينغ و تذاكر المعالم.. التنقلات كانت بالكارت
يعني باش تديري حسابك.
التذاكر شريتهم مسبقا بشهر بصح هكاك و جاوني غاليين من الاحسن تشري دوكا
الاوتيل كانو حابين ف بلاصة قريبة لمحطة لا ليلي أو سلطان احمد.. كونها قريبة من المعالم و المساجد المعروفة ف اسطنبول و من تم يسهل لهم. التنقل بالترامواي بارتو ف المدينة.. شفتهم واحد وسمو hôtel bestur بعيد على المحطة تاع سلطان احمد ب 450 متر و كاين ترونسبور من المطار عن طريق havaist يحطك لتم ف المحطة يعني يجيك قريب مام نهار لي تروحو فيه.. و زيد كان عندو اثمان مقبولة ف هذاك الوقت.. وشنو ريحو عندو 3 ايام فقط و بدلو ل اوتيل وحداخر أقرب للمحطة و ارخس ثمن
نتوما شوفو لي تساعدكم لكن من الاحين التذاكر احجزوهم دوكا و الاوتيل تان بداو نحوسو من الاحين تديرو ليلتين ااو ثلاثة و مبعد سقسيو تلقاو اوتالات بزاف ماعندهمش صفحات ف المواقع المعروفة تاع الفنادق احسن و ارخس ثمن
و اصلا الاوتيل تروحو ترقدو برك الصح كامل ف التحواس
ديرو أيضا حسابكم التذاكر للدخول مثلا لمتحف توبكابي أو جولة ف البوصفور..
وجدو دوسي فيزا، و وجدي معاهم 27500 دج للواحد حق الملف، كي توجد دوسي عيط لرقم gateway ويعطوك موعد لي يساعدك باه تدفع ملف و يديرولك بصمات و صور بيومترية، كي تكمل الرد يكون من أسبوع ل 15 يوم،
اشري تذكرة طيران من تطبيق air Algérie و شوف أقل سعر، كانت بروموسيو داروها في فيفري لحڨت 41000 دج،
الفندق كاين بزاف و بزاف نقدر نعاونك بأسماء ولا حوس مليح في agooda أفضل من Booking في الشعر و اخدم بخاصية filtre ، بالنسبة للرحلات الداخلية راهي معمرة وكالات في اسطنبول يدوك وين حبيت بصح attention تتكلح خاطكش معمرة des arnaqueurs و كاين بزاف رحلات تقدر ديرهم وحدك
بالتسبة للتنقل داخل اسطنبول راهي معمرة ترامواي و ميترو، و les bus اشري كارطة و عمرها و راك دور
بالنسبة للميزانية متعلقة بواش راح تاكلو و وين تباتو، اذا تبعو حاجة شيك ماراحش تكفي، اذا حاجة متوسطة و مقبولة تكفي و بزيادة
تكفيكم ان شاء الله برك قيس قيس
ديروها ربعين بفيزا لانه راهي الفيزا برك 24000 دج للواحد و تبداي توجدي في دوسي من درك و تدفعي
باش تضمني فيزا من بعد تشري البيي
لازم تكتفي شوية
كاين فنادق 30 اورو ليلة و ملاح حوسي في جوجل مابس و بوكينغ
و كي تحدي الفندق روحي اي وكالة و تحجز لك و احجزي منا و قبل أفضل ( لانكم اول مرة )
ننصحكم بهذا فندق حجزت فيه هايل و نقي و قريب لكل شي بصح معباليش في جويلية شحال راح تكون ليلة لازم تبداي من درك تحجزي
Silvana hôtel
كي تروحي لام بزاف وكالات و يديرو رحلات داخلية و يجيو يديكم من فندق انا حجزت مع هده وكالة أسعارها حلوة مقارنة بباقي و طبعا نيقوسي معهم و بصحتكم 😍😍
احلي شي تجهيز لسفرة😍
Youtube
مدامك اول مرة نظن لوكان تروحو لتونس ولا المغرب .
شوفي اشري بيبي من ضك ومنها ديري دوسي فيزا تسقاملك 26مليون وابحثي علي تطبيق مثلا bookingتلقاي فيه كلشي اسعار واماكن وأنصحك اسبوع فوتيه غير في اسطنبول
علاش نضحكو عليك !! واحد ما زاد معلم ان شاء الله نقدر نعاونك بهذه المعلومات
1- نعم الافضل تشري التذكرة من الان الى راكم متأكدين من تاريخ السفر، الفندق احسن شيئ تدخلي لموقع بوكينغ وتختاري فندق على حسب ميزانيتكم وتحجزو عن طريق كارت فيزا او كاين فنادق يسمحو بالدفع sur place
2- انا حسب تجربتي في اسطنبول هي مدينة كبيرة 7 ايام قليلة باش تشوفوها وتروحو لمدينة اخرى بعيدة، كاين رحلات امدن قريبة وما تكونش غالية بزاف وشاملة النقل تحجزو مع وكالات سياحية في اسطنبول يديرو رحلات يوم واحد كاين بورصة، ازميت، يالوا، شيلا واغوا ازميت … لكن جزيرة الاميرات ماننصحكش تروحو مع وكالة لانه وحدك سهلة ونصف يوم فيها يكفي
3- انا بالنسبة لي احسن منطقة تحجزو فيها فندق هي الفاتح: قريبا من منطقة السلطان احمد
4- اعتقد الميزانية تكفي اصرفو بعقلانية وبعدو على المطاعم اللي معروفين زيبيعلك طبق عشر اضعاف سعره لانه معروف في الانستغرام والهدايا خلوهم اخر يوم 🤌
5- الفيزا ساهلة تتصلي ب TLs يعطوك موعد في يومين جهزو الملفات من قبل فقط لكن زادو السعر تاعها مؤخرا
6- في رايي شوفو رحلات اليوم الواحد واختارو اثنين شاملين حتى النقل لانه معندكومش بزاف وقت
ان شاء الله نكون قدرت نجاوب على اسئلتك اذا عندك اسئلة اخرى avec plaisir 🤗
الفيزا ديرو من دوك راهي 2٫6 مليون ل واحد
البيي اشرو من دوك ب بطاقة ذهبية راح يكون ب 5 ملاين تقريبا ولا
الفندق احجزو في لالالي هي وسط اسطنبول و قريبة من كلش الفندق احجزو من هنا يومين فقط ب اذا ما عجبكش تبدلو
المناطق القريبة كاين بورصة ولا صبنجة و إذا تحبو الطبيعة كاين منطقة بولو هايلة و تنقل يكون ب طيارة و رخيسة.
التنقل خارج اسطنبول يكون طيارة ولا كاين وكالات يدو ل هاد المناطق
الاسعار دايما ساوم مليح و قارن
على حساب وين تسكني تروحي باش تدفعي ملف الفيزا شوفي في موقع vfs 🇹🇷 وجدي اوراقك وادفعي كي تحيك الفيزا ولي تدخلي مرة على مرة موقع skyscanner شوفي التذاكر الي تساعدك ماديا والتوقيت توحهي لوكالة يفر اشرب التذاكر تاوعك من بعد تحي للحجز تقدري متحجزيش حتى توصلي بصح اذا كان وصولك ليلا يفضل يكون عندك حجز ومن بعد بدلي، يفضل الحجز في المناطق لي قريبة للاماكن الأثرية وبغضل ابضا السكن في منطقة فيهم معظم وسائل النقل المهم / سبع ايام شوفي فيها اسطنبول وبزاف تقدري تلقاي الطبيعة لي تحوسي عليها وغادي تمشب بزاف وتركبي بزاف مع الزحمة علاش التنقل لمدن اخرى خليها مستقبلا بخصوص الاماكن ننضحك تقراي مدونات ا وغادي تلقاي ارشادات عامة، انا اكتر حاجة عجبتني هي حي بلاط ، والسليمانية
Pour une première et si matslkoch rasskom aller avec une agence surtout pour faire hors d’Istanbul
يا ختي انا تساعفيني كأول مره روحو مع وكاله سياحيه احسن هي تتكفل بكلشي..و تستقاملك غي كيف كيف تقريبا…بلا عليك هاد تكسار الراس
ممكن من وكالة سياحية تخلص الفندق