السلام عليكم ورحمة الله
في المنشور لي فات حكينا على القاهرة وبعض الاماكن لي لازم تزورهم. اليوم نزيدو نروحو لشرم الشيخ لي هي مدينة سياحية في الجنوب مطلة على البحر الاحمر. هادي تروحلها باش تروبوزي
المواصلات من القاهرة اما بالباصات وعندهم بزاف شركات اشهرها بلو باص. أو ڨو باص يدوك من 250 جنيه (1جنيه = 7دج) اذا مانيش ناسي واطلع حسب الدرجة (عندهم مواقع خاصة تقدرو تشوفو الاسعار تم) يديرو حوالي 10 ساعات طريق بصح يجرجروك فالباراجات. يتعطلو بزاف قاع نصحوني ونتفاداهم وتبقى عليك نتا تشوف مخروجك
وكاين طيران مباشر من عدة شركات يبداو بحوالي 100€ واطلع ذهاب واياب وعندهم حتى طيران شارتر من طيران البترول بصح المشكل مواعيد ماش ثابتة وتخاف ماتلقاش فالتاريخ لي تحبو تعشي مخلص بالزيادة مع شركات لخرين.
شرم الشيخ عبارة عن منتجعات و فنادق برك وحتى ناسها قلييل لي عايشين تم تسمى زحمة القاهرة تنساها وتشوف سيارة وحدة تمشي في طريق تاع 6 بوزيسيون عادي.
نصيحة كي تحب تخير فندق تأكد ملييييح اذا جاي على ااشاطئ او بعيد خاطرش بزاف فنادق بعاد وتلقاهم يدوكم بالحافلات كل ربع ساعة مثلا وتاني سقسي اذا كان الشاطئ رملي او صخري خاطرش اغلبية الشواطئ صخرية اذا مايساعدوكش باش دير حسابك مقبل.
اهم الاماكن السياحية تم خليج نعمة والسوق القديم وسوهو سكوير هادو بلايص تروحلهم بالليل فيهم محلات وعروض موسيقية وكافيهات….. وحاول الفندق لي تخيرو يكون في احدى المناطق هادو باش تقدر تروحلهم غير على رجليك. وشخصيا نفضل منطقة خليج نعمة على لخرين.
التنقل تم استعمل الميني بيس ساهلين ونظاف بزاف وتلقاو خرائط على الطريق للخطوط تاعهم يرفدك ب 5 جنيه خير ماتروح بالطاكسي ولا indrive يخبطك بسومة تنسا داركم 😅
اهم الانشطة لي ديرهم تم السباحة في البحر الاحمر وحدو متعة معمر شعاب مرجانية واسماك من مختلف الاشكال والالوان تلقاهم معاك فالشط ديجا بلا ماتروح بعيد. وكاين تاني اهم حاجة وهي رحلة الغوص في قارب شباب من صباح حتى لعشية يدوك لمحمية راس محمد ودير الغوص بالمعدات وتهبط مع مدرب لعمق 10 مترات وتم صح تحس روحك فناسيونال جيوقرافيك 😅 هادي تسقام بحوالي 1500 جنيه للرحلة بالغوص والاكل والنقل من والى الفندق وتلقاو بزاف وكالات ينظموها سواء فالفندق ولا فالاماكن السياحية لي ذكرتهم الفوق
بلا مانحكو على الالعاب البحرية كيما الباراشيت والبنانا….. لي تقدر تلعبهم والاسعار من 250 حنيه واطلع خسب اللعبة.
تقدر تروح لفندق الباتروس دير نهار تم عندهم اكبر حديقة العاب مائية (اكوابارك) في شرم الشيخ مقابل 900 جنيه مع المشروبات الباردة وهادي ماكالاه تحجزوها عن طريق المكاتب السياحية يدو معاك بزاف روح ديراكت للفندق تخلص وتدخل عادي.
وكاين تاني لي يحب يدير رحلة سفاري بالكواد وتتعشاو فالصحرا مع عروض فنية…. بحوالي 1500 جنيه
تقدر تاني دير رحلة ليوم كامل في مدينة دهب لي بعيدة على شرم الشيخ ب 80 كلم هاديك تاني شابة بزااااف كيفكيف تسقاملك حوالي 1500- 2000 جنيه بالنقل من والى الفندق
كاين تاني لي يروح في رحلة يزور قمة سانت كاترين وهاديك لازم تدي معاك لبسة تاع شتاء خاطرش باردة بزاف هادي ماعنديش فكرة على سعر تاعها.
كي تحب تبدل شويا جو الاماكن السياحية وتحب بلاصة شعبية وين تلقا كلش رخيس من أكل وملابس ومحلات عصير ومقاهي… روح لحي النور جاي شويا بعد خليج نعمة في اتجاه السوق القديم تم يسكن سكان المنطقة او عمال الفنادق وتلقى كلش رخيس.
حاولت نجمعلكم اهم الاماكن والانشطة لي رقدرو ديروها فشرم الشيخ مع ذكر الاسعار باش تكون عندكم فكرة تقريبية.
بالنسبة للاسعار تاع الرحلات ماش ثابتة راني عطيتلكم المعدل التقريبي خاطرش لازم تنيقوصي مليح هبطلو السومة بالنص ولا اكثر واطلع معاه شوية شوية 😉
