السلام عليكم و رحمة الله ،
شفت كثير من الأشخاص يتساؤلو و يطلبو نصائح حول العُمرة و حبيت نفيدكم من خلال تجربتي
أول شي قبل ما تروحو لازم تكونو عارفين واش رايحين اديرو يعني لازم تراجعو و تطّالعو على المناسك لي راح تقومو بيهم و تكونو حافظين الأدعية لي تقراوهم عند كل نُسُك راح تلقاو المعلومات الكافية فالأنترنت
ثاني حاجة المقابس الكهربائية فالفنادق كلها ثلاثية ديرو حسابكم
و في رأيي شريحة الهاتف ماكالاه تشروها لأنو الويفي متوفر فالفنادق
من ناحية الأكل تقدرو تشرو من ثما تلقاو كلش متوفر لكن غالي شوية لهذا من الأحسن تنقصو مصروف على رواحكم ادو معاكم منا مُعلبات التونة و الجبن و التمر و حليب لحظة و الڨاطو و شوفو نتوما وش تحبو تاكلو ثاني، الأكل فالمطاعم غالي تع منينذاك ماشي كل يوم و كل واحد و مقدوره
الخبز و الفاكية اشروهم من ثما
من ناحية التسوق و الهدايا اتفرجو مليح و ساومو من و من قبل ما تشرو لأنو كاين لي يبالغو و يبيعو بأضعاف الأسعار و من الأحسن ما تشرو والو لأنو كلش متوفر عندنا و بسعر أقل و ماكاش كيما الهدايا الرمزية سبحة و ماء زمزم
ما تكثروش الباڨاج و الحوايج بزاف ادو معاكم الحاجات الضرورية فقط
ثما ماكاش البرد لكن داخل المساجد كاين لي كليماتيزوغ تبردو ديرو حسابكم باش ما تمرضوش و احتمال كبير تمرضو لهذا أدو معاكم أدوية
و طبعا اتفرغو للعبادة و اپروفيتو الماكسيموم اشبعو من الحرم كي تكونو في مكة حاولو تهبطو يوميا للصحن طوفو و تأملو فالكعبة الشريفة و كي تروحو للروضة سلمولي على حبيبي رسول الله
ربي يرزق كل واحد ان شا الله أسعاو ليها و ديروها من أولوياتكم لأنو الأجر ثما عظيم
#1001tourisme
#1001_help
القصة تاع الهدايا هي لي تقلق لانو حرفيا حدايد يتصداو و خلاص… الاحسن جيب ما زمزم و تمر العجوى خير من اي قماشة او حديدة ثانية، و اذا حبيت تذكار من ثما تاخذ صورة و لا اثنين و صاي
بعدو كل البعد على البدع تاع ارمي حاجة ثما باش ترجع و لا تكتب اسمك في كاش جهة في الحرم، اذا قدرت تقرب للكعبة صحا اذا ماقدرتش كمل طوافك مش شرط تحارب ليها
اهم حاجة قبل ما تروح و انت هنا في الجزائر و مباشرة بعد صدور التأشيرة سارع الى التسجيل في تطبيق نسك من أجل حجز موعد للصلاة في الروضة