السلام عليكم و رحمة الله تعالى و بركاته حبيت ننشر معاكم بعض الخبرات لي عشتها في

السلام عليكم و رحمة الله تعالى و بركاته
حبيت ننشر معاكم بعض الخبرات لي عشتها في القليل من السفارات الي قمت بيها في اوروبا يمكن تساعد واحد فيكم باذن الله .
نبدو بالنقل :
١- الى الرحلة تاعك الى بلاصة بعيدة من المستحسن استعمال الطائرة ، عملية البحث ساهلة كاين موقع Skyscanner دخل الانطلاق و الوجهة و التاريخ دير شهر كامل باش يطلعلك اسعار التذاكر في جميع ايام هاذاك الشهر وانت شوف واش يساعدك من المستحسن انك تررزارفي من قبل مدة الاسعار يكونو ملاح ، حاجة اخرى من المستحسن تروح بلا Bagage فقط Sac a dos هز فيها غير الصوالح المهمة والله يعاون
٢- الى الرحلة مشي جد بعيدة تقدر تستقل الBus ،كاين زوز تطبيقات شائعة FlixBus اسعار تاعو جد مناسبة وكاين حاجة مين تسجل اول مرة يعطوك تخفيض 20% غادي نحط لينك تاع تسجيل باش يعطوكم التخفيض حتى هو من المستحسن تررزارفي من قبل قبل اسبوعين مليحة ، او BlaBla Bus نفس الكوناسبت ، لاكن الى رحلة مشي بعيدة بزاف تقدر تستعمل BlablaCar تجربة رائعة فيه انك تركب مع ناس متعرفهمش وتتبادلو اطراف الحديث و الاسعار جد مناسبة
٣ – تقدر تستعمل القطار كذالك ، كاين تطبيق Omio يعطيك جميع الاتجاهات في جميع الدول او في فرنسا كاين TGV اسمو OuiGo لاكن يليق تريزارفي من قبل هاذي نقطة جد مهمة في OuiGo .
٤- حاجة اخرى تقدر تقسم الرحلة تاعك ل Steps باش متعياش بزاف و تستفاد أكثر مثلا حاب تروح من فرنسا لالمانيا ، تقدر تروح من فرنسا لسويسرا و من سويسرا لألمانيا

ضرك نهدرو على اهم نقطة هيا وين تبات :
١- اسهل طريقة انك تبات في Hostels الاسعار فيهم جد مناسبة في اغلب المدن بنسبة الذكور مناسب جدا لاكن للاناث لا اعتقد لانو يعطوك Lit مع ستة ولى ربعة من الناس ابحث في موقع Booking.com دير فيلتر بالسعر و عوم بحرك .
٢- هاذي اغلى شويا من Hostels لاكن افضل جودة AirBnb
مناسبة كذالك للاناث لانو يعطوك على الاغلب شمبرة وحدك و يمكن كذالك تلقا الاسعار مشي بعيدة ياسر على Hostels .
٣- تجربة فريدة كذالك Couchsurfing
الكونسابت تاعو هو كاين ناس تعرض انو ناس تجي تقعد عندها كاين موقع couchsurfing.com لاكن لا انصح به قلبوه بدراهم يليق تخلص اشتراك باش تدخل انا مجربتوش شخصيا لاكن في تعليقات في بلاي ستور جد سلبية ناس تشكي بلي تخلص شهر يدو اشتراك تاع سنة و صرات جهرة بعد ماقلبوه بدراهم مبقوش يخدمو بيه ، ايا الحل موقع BeWelcome هذا جربتو شخصيا افتح حساب فيه وعمر معلوماتك صور تاع رحلاتك السابقة و بعض معلومات عند اقترح انك في Bio تكتب بلي راك مسلم باش اي شخص تهدر معاه يكون علابالو و يديرلك حساب ، سينو بعد ما تفتح حساب تبحث عن طريق اسم المدينة يطلعولك الناس لي يعرضو انهم تجي تبات عندهم انت ترسلهم ميساج تشرحلو انت شكون و رحلة تاعك كي دايرة وبلايص لي باغي تشوفهم مهم دير Lettre motivation خشينة باش متبانش Bot , المهم اقري معلومات الشخص لي راح ترسلو مليح لانو كاين بزاف الوان ديرو حسابكم .
٤- سينو الحل الاخير هذا يفضل تكون في فصل الصيف وتكونو مجموعة على الاقل اثنين تقدرو تباتو في الشط الى مدينة فيها البحر او في كاش حديقة عمومية تقدرو واحد يرقد واحد يعس بدالة ولى كيفاه تريقلو امركم وصاي 😁

ضرك نفوتو للماكلة
١- الماكلة ساهلة اسهل طريقة تبحث في جوجل ماب Snack halal near me يطلعلك المطاعم الحلال القراب منك وانت شوف Menu تاعهم ولى صور وشوف واش يعجبك
٢- بنسبة لفطور الصباح ننصحكم تشرو من Super market اسعار جد معقولة و جودة و كمية ، اذا كنت في اسبانيا كاين Super market اسمو Mercadona انصح به وبشدة دايرين بلايص وين تقدر تقعد تحط صوالحك دايرين دورات مياه ودايرين des micros ondes وين تقدر تشري من ثم وتسخن وتاكل اللحوم عندهم مشي حلال ديرو حسابكم كلو الحوت انصح به ، تقدر تستعمل هاذ السوبر مراكت حتى في فترات راحتك تريح فيه .

ضرك نعطيكم نصائح عامة :
١- تقدر تستعمل McDonald’s كا دورة مياه ثم واحد ما يهدر معاك تدخل تقضي حاجتك وتخرج سينو كاين فروع دايرين الباب بكود تقدر تروح تطلب الكود من اي عامل ثماك ولى تستنى يجي واحد حافظ الكود وادخل وراه
٢- متشري والو من المطار الى لضرورة القسوة الاسعار جد مبالغ فيها دير حسابك من قبل الى مطول في مطار وعلابالك تجوع اشري سوندويتش وخبيه ولى حتى قاطو تصبر بيه مام الماء وغالي ، بصح ميخلوكش دخلو في onboarding تسما غير برا .
٣- متحشمش خلاه الى مفهمتيش حاجة ولى راك متردد في طريق ولى منعرف سقصي دبر راسك بلغة الاشعارة بجوجل تراديكسيون مهم سقصي خير ما تروح طريق غالطة وتضيع صوالح مهمة .

اعتقد اذي هيا ان شاء الله نكون منسيت والو .
تبقا هاذي نتيجة تجربتي الخاصة ، الإنسان غير معصوم عن الخطئ يمكن صوالح منيش صحيح فيهم نتمنى الناس تناقشني فيهم في التعليقات ، ان شاء الله تستفادو ولى تفكرت اي حاجة نعدل على المنشور ونزيدها .
دمتم في رعاية الله وحفظه ، طريق السلامة لجميع المسافرين .
#1001سياحة