رحلة: انجلترا – اسكتلندا و الساحرة ادنبرة
الانطلاق كان من الجزائر عن طريق الخطوط الجوية البريطانية و صولا إلى مطار هيثرو لندن، قمنا بكراء سيارة على مستوى المطار، الاسعار تختلف حسب النوع، حنا بما أنو الرحلة تاعنا تمتد إلى استكتندا كان لازم سيارة مريحة نوعا ما، قمنا باختيار Mercedes GLC 300 ساعدتنا بزاف.
اليوم الأول وصلنا فيه قررنا المبيت في لندن و بما أنو قبل كنا اكتشفنا لندن هاد المرة كرينا شقة عن طريق airBnB فالضواحي في منطقة Warfield – windsor منطقة هادئة و الحقول و المساحات الخضراء محيطة بها
اليوم الموالي مساءا انطلقنا من لندن إلى ليفربول لحقنا فالليل اليوم الموالي قضيناه في ليفربول مدينة رائعة ليفربول وحدها لازملها رحلة مستقلة، خرجنا من ليفربول مباشرة نحو ادنبرة عاصمة اسكتلندا الطريق مشيناها فالنهار كانت طريق خيالية جدا مناظر خلابة طول الطريق، هندسة المنازل غير طبيعية مداخل المزارع الخاصة و لا أروع.
لحقنا لإدنبرة و كنا كرينا مسبقا عن طريق airBnB شقة من 4 غرف و فيها backyard نقية، الشقة كانت مجهزة بكل وسائل الراحة، الليلة لي وصلناا فيها درنا جولة خفيفة تقريبا كلش مغلق الا محل سوري يغلق متأخر تعشينا عندو و رجعنا، اليوم الموالي بدات الجولة فالعاصمة و من حسن الحظ تصادفنا مع
Edinburgh International Festival
كانت الجو بارد نوعا ما down town فيها السواح بكثرة، زرنا اكبر عدد من المعالم لي قدرنا عليها ايام معدودة كنا اكتشفنا عدة اماكن في ادنبرة، اخر يوم زرنا Portobello beach شاطئ رائع ( ماخلصوش علينا باركينغ، و مافرضوش علينا نكرو باراسول بالسيف) .
العودة كانت خط مباشر ادنبرة لندن، هاد المرة كرينا في Berkshire و بالتحديد في مكان اسمه Forest road طريق فالليل تخوف. اليوم الموالي توجهنا الى Brighton كان يوم مشمس شوية رجعنا في نفس اليوم الى لندن قضينا اخر يومين في Kensington و هاد المرة كان فندق.
اليوم الموالي كانت العودة للجزائر، هدرت على الرحلة باختصار كاين مواضيع لازم منشورات منفصلة بصح الله غالب هدا وش قدرت، نشالله تستفادو ولو بالقليل.
من فضلك لو سمحت سعر كراء السيارة كم..؟
بصحتكم خويا..
الرحلة الحلم تهبل بصحتكم ❤️❤️❤️❤️