#رحلة_ماتتنساش السلام عليكم تكملة عن رحلتي ( ماليزيا – تايلند ) الحاجة الاولى

#رحلة_ماتتنساش
السلام عليكم
تكملة عن رحلتي ( ماليزيا – تايلند )
الحاجة الاولى لي نتكلم عليها هي الفيزا : بالنسبة للجزائريين فيزا الكترونية للتايلند تستغرق من 25 يوم الى 45 يوم هي سهلة نوعًا ما .
طريقة الوصول الى تايلند كانت عبر الطائرة من كوالالمبور الى كرابي حوالي ساعة ونصف مدة الطيران ، انا رحت مع air asie تعتبر اسعارها رخيصة نوعا ما 25 اورو سقامتلي المشكل عندك الحق ف حقيبة يد واحدة ما يتعداش الوزن تاعها 7 كغ ، بالنسبة ليا مستحيل يكون عندك سفر سياحة و حقيبة تع 7 كغ تكفيك ، انا زدت حجزت مع التذكرة حقيبة اخرى وزن 20 كغ سقامتلي 15 اورو .
وصلنا الى تايلند 🇹🇭 و بالتحديد كرابي ، جنة الله فوق الأرض 😍 .العملة تاعهم تسمى البات
1 اورو = 38 بات بالتقريب ، المناخ تاعهم استوائي حرارة طول العام مع تساقط الامطار بعض الفترات، افضل وقت لزيارة تايلند هي من ديسمبر الى مارس .
المهم فالطريق من المطار الى الفندق تعرف بلي راك في بلاد جميلة جدًا ، شيء خرافي الاخضرار في كل مكان طبيعة ماشي نرمال اشجار جوز الهند و النخيل في كل مكان …
المهم الوصول الى الفندق لي كان في مكان وسمو ao nang مكان فيه الكثير من المسلمين ، وصلت الفندق لي كان على شكل bungalow في وسط الغابة كل شيء فيه مخدوم بالخشب تحس روحك في وسط غابات الامازون و صوت العصافير يمتع فيك و مينداك و يصوطي قرد فالاشجار لي دايرة بيك ❤️، بقيت 9 ايام في تايلند منها 5 كرابي 1 بوكيت 3 بانكوك، تقريب كل الفعاليات les activities درتهم من كرابي كزيارة الجزر و sanctuaire des éléphants – emerald pool…
لأنهم ارخص من جزيرة بوكيت .
الجزر تع تايلند ما تقدرش تتكلم على الجمال تاعهم تخاف ما تمدلهمش حقهم خاصت جزيرتي ) phi phi island – hong island ( سبحان الخالق تبقى غير تسبح من جماليتهم .
حبيت نتكلم على الأكل التايلندي الحلال لي نعتابرو من احسن الطعام لي كليتو فحياتي خاصة لي يقدموه مع فواكه البحر حقيقة شيء خرافي .
وعصير الفواكه الطبيعي 😍 خاصة عصير المانجو .
الحاجة لي تشد انتباهك في تايلند من غير جمالية البلد و الاكل اللذيذ هو ناسها الطيبين تقدر تقول اطيب شعب تقدر تقابلو في حياتك .
هذا بإختصار شديد مروري في التايلند لي عندو أسئلة ولا استفسار نجاوبوه لحاجة لي نعرفوها .