رسمياً : فلم انمي Slam Dunk المُكمل صدر على جميع المنصات مُترجم بأعلى دقة لكن ه

رسمياً : فلم انمي Slam Dunk المُكمل صدر على جميع المنصات مُترجم بأعلى دقة
لكن هل الفيلم يستحق المشاهدة ؟
اولا قبل ما تجري و تحط فبالك انك راح تتفرج سلام دانك و تسترجع ذكريات سلام دانك لقديم لي كان يتعرض فسبيستون .. نقولك ما تتحمسش لانو راح يخيب أملك حتما .. هذا علاه خصك تدير فحسابك انو :
– الفيلم جاي بستايل انميشن 3D مع 2D وهاذي طريقة اغلب افلام الانمي فالوقت هذا يعني كيما فيلم دراغون بول الأخير هذا .
– خصك تدير فبالك ايضا انو الاصوات متغيرين يعني الاصوات لي متعودين عليهم فالنسخة اليابانية بدلوهم كلهم تقريبا .
– و الشيء المهم هاذ المرة انو قصة الفيلم تتمحور حول شخصية واحدة و للاسف ماهوش ساكوراغي هاناميشي لي معروف ( بحساان ) لانو البطل هاذ المرة هو ريوتا .
اكيد الاغلبية كي يعرفو هاذ الأسباب راح يقولو لواش راح نتفرجو ونضيع وقتي عليه ؟ وانا نقولك علاه ..
اولا : لان الاحداث مكملة للانمي ( اهم ماتش فالبطولة الوطنية ) .
ثانيا : الشخصيات راح نشوفو شخصيات قديمة ولفناها و شخصية جديدة مميزة ..
ثالثا: القصة و تسلسل الاحداث فيها ، يبين لينا عمق و ماضي شخصية ماكناش عارفين عليها بزاف و قليل وين تطرق ليها فالأنمي … شخصية كانت محقورة الصراحة وقصة الفيلم جات باش تعطي لهاذ الشخصية حقها طبعا بلا ما ننساو الشخصيات الاخرى .
و اخيرا وفي رايي نظن انو هاذ الفيلم ماهو الا بداية لسلسلة افلام راح نشوفوها مستقبلا .. يعني ممكن كل مرة نشوفو فيلم يتمحور حول شخصية معينة و لما لا من بعد يتم اكمال احداث المانغا .
و فالاخير نجاوبو على السؤال ..
هل الفيلم يستحق المشاهدة ؟
– اذا نتا باغي تتفرج الفيلم باش تعرف تكملة احداث الانمي . نعم ننصحك بيه .
– اذا باغي تتفرج الفيلم باش تقارن القديم بالجديد . لا انصحك . لان القديم افضل من ناحية الرسم و الستايل.
– و اذا رايح تتفرج من اجل القصة . نعم راح تعجبك القصة ولو انو الرتم بطيء شوي لكن قصة ممتازة .
تقييمي الشخصي للفيلم 6.5/10.