سلام عليكم فوتت 3 ايام ما يتنساوش في hôtel appartements l’aventure في مدينة الق

سلام عليكم
فوتت 3 ايام ما يتنساوش في hôtel appartements l’aventure في مدينة القل ولاية سكيكدة…جيت نحكيلكم عليها.
انا من سكيكدة وحبيت نقضي ايام مليحة تاع استرخاء ماشي مجرد زيارة للشاطيء، بحكم ما عنديش سيارة كنت نروح فقط للشواطيء القريبة من السونتر واللي تكون مكتظة..
خممت في وجهة خلاف بصح غاضتني نروح لفندق في وسط المدينة بعد على جال الشاطيء ولا الخدمات تاعو وأنا نسكن غير حداه 😂😂 مالا قلت ع الأقل نروح لدايرة خلاف ف الولاية تاعي واخترت القل..
بديت نحوس على الفنادق رغم توفر بزاف ديار للكراء، بصح حبيت فندق ولا حاجة هكا خدمية باش نكون اقرب ما يكون للبحر، ماشي نبقا طالعة هابطة ولا نسكن بعيد ع البحر ونتعذب خاصة كي ما عنديش سيارة..
بعد البحث، تفكرت هذا الفندق او بالأحرى الشقق الفندقية كان خرجلي من قبل بصح ما اهتميتش.
اتصلت بيهم وسقسيت على الاسعار، جاتني شوية غالية بصح قلت الله غالب اللي يحب حاجة مليحة لازم يخلص…
ما ندمت على حتى دورو حطيتو في هذي الرحلة خاطر فعلا المنظر يخطف الأنفاس (جاني نفس الاحساس نهار رحت لزنجبار رغم إختلاف التضاريس طبعا، بصح الفكرة هو أني انبهرت واستمتعت)..
البحر تهبطلو بالدروج، الكااااالم، ماكانش اكتظاظ، الناس اللي كاريىن لتم قمة في الرقي، واحد ما يشوف معك، ماكانش مظاهر غريبة ولا تصرفات مزعجة…
رغم أنو الشاطيء صخري بصح تقدر تعوم عادي واللي ما يعرفش ولا الاطفال كاين les bouées مع الحراسة..
الشقة مجهزة ونظيفة وتطل على البحر من كل جيهة جنة وخلاص..
الاسعار ستوديو بميلون، أف 2 مليون وربعمية، أف 3 مليون وست مئة…حنا كنا 5 اشخاص وطفل صغير كرينا أف 2.
القل سونتر مشية تاع 5 دقائق تشري وش تحب وتجي..ولا تخرج تدور خاصة ف الليل
تقدر تكري فلوكة ب 5000 دينار الي روتور تديك لشاطيء القبيبة (ساعة غير ربع بالفلوكة) شاطئ رملي معزول مافيهش الغاشي قمة الجمال…
السعر هو سر جمال هذا المكان، رغم أنو فندق زنجبار المطل على المحيط كان أرخص بصح في ظل غياب المنافسة يبقى يستاهل هذا السعر، شفت فنادق قريبة منه خدماتها أقل وسعرها كيفو أو أعلى…
أي واحد حاب يستمتع بوقته صح صح ننصحو بهذا المكان الرائع.
#1001info