#سياحة1001
السلام عليكم، صح فطوركم وصح رمضانكم
حبيت نشارك معاكم التجربة ديالي لزيارة مصر ✈️✈️✈️
اولا درت فيزا (الموافقة) في وكالة سياحة
هي كاين طريقتين فيزا تقليدية تلصق على جواز السفر 15000دج أو تتحصل على الموافقة 6500دج وتخلص ثم الفيزا ب 25دولار (ننصحكم ديرو فيزا تقليدية باش مايتعبوكومش)
شريت تذكرة الى القاهرة ب 59000دج ذهاب واياب(كل خطرة كيفاش) من موقع Air Algérie
باش تروح الى شرم الشيخ إما في الباص(250 الى 350جنيه) جنيه أو الطائرة (100-150 دولار)
🔺🔺🔺 القاهرة 🔺🔺🔺
بالنسبة للقاهرة انصحكم بuber في تنقلاتكم، السعر تقريبا كيما يسير في الجزائر
الاماكن الي تزوروها في القاهرة هي بالطبع الأهرامات والمتاحف (رايحين تعيشو الماضي وتشوفوا أشياء رايحة تبهركم) وكاين بزاف اماكن اخرى سنة ما تكفيكمش باش تشوفوها 😁😁
ننوهكم في نقطة؛ في اثناء الدخول الى الأهرامات بالاك يكلخولكم، النصب داير حالة خودو حذركم
يستعملو كل الطرق باش يدولك دراهم، حتى كي يصورك بتيليفونك يقلك خلصني، واذا حبيتو تركبو في الحصان أو العربة تفاهمو على السعر والمسافة من الأول (يبدلو رايهم بزاف)
بالنسبة للدخول الى الأهرامات التذكرة للعرب 40جنيه أعطيلو الجواز وقولو جزايري هذي للدخول فقط أما الدخول داخل احد الأهرامات لازم تشري عند الدخلة باش ما تزيدش تولي (بعيدة) السومة 80 جنيه
ننصحكم تطلعو لمكان اسمه panorama view باش تشوفو الاهرامات في منظر رائع يدوكم بحصان، جمل أو عربة (هو يقولك 300 انت قولو 70، ماتزيدوش فوق150 جنيه وما تنساوش تفاهمو على كل التفاصيل من الأول )
تكملوها ب أبو الهول من تحت وتخرجوا من الدخلة الأخرى أو من المدخل الرئيسي (كاين kfc و pizza hut عند مخرج ابو الهول)
لزيارة المتحف تقدرو تروحو في الباص او uber هو في القاهرة أيضا
الحاجة اللي لازم تزوروها خان الخليلي (الحسين) راح تعجبكم بزاف خاصة القعدة في مقهى الفيشاوي أو عشاء في مطعم محفوظ نجيب (قعدة موسيقية تاع زمان)
وتشروا الهدايا من تم
كاين بزاف وبزاف اماكن أخرى (نهر النيل، بور سعيد…مساجد…كنائس….عندهم بزاف متاحف واثار)
🌊🌊🌊 شرم الشيخ ⛱️⛱️🏖️
أما بالنسبة لسرم الشيخ
الفنادق كاين بجميع الأسعار من 15 دولار الى 1000دولار وحتى اگثر لليلة انت ودراهمك ( تقريب كامل فيهم مسابح) ( بالنسبة للشوطئ كاين فنادق عند البحر وكاين بعاد شوية بصح فيهم نقل مجاني من الفندق)
لمحبي البحر والشعب المرجانية رايحين تعيشو الحلم 🤣
ادو معاكم masque et tuba بزاف شابة تحت الماء زيدو جربو الغوص بالقاروىة
كاين شواطئ مجانية تابعة للفنادق وكاين شواطئ تخلص 100 جنيه
كاين قوارب مخصصة للرحلات يدوكم الى وسط البحر وين كاين الشعب المرجانية (تحويسة شابة 200 جنيه للفوق)
بالنسبة للأكل كاين مطعم المصريين فيه مأكولات مصرية
ومطاعم seafood للأسماك بسعر مليح على العموم (قريب كيما دزاير) هذو متواجدين في السوق القديم
وكاين Mc Donald’s، Kfc, Pizzz hut, Domino’s pizza…..
وكاين اللي يخدمو الكشري ،كبدة اسماعيلي، فطير….
التنقل في شرم الشيخ :
الطاكسيات رايحين يهبلوكم، كل دقيقة يحبسلك واحد ما يخلوكش تمشي مخلوي، تركب بالسيف عليك 🤣🤣🤣🤣
كي تركبوا لازم تتفاهمو عالسعر اذا قالك 50 انت قول 20 جنيه (المهم قاعدة ما تنساوهاش لازم تتفاهمو في كل ما ديرو حاجة على السعر، النصب داير حالة)
كاين باصات صغار ورخاس ب 3او 5 جنيه
بالنسبة للأمن كونو مهنيين، دورو وين تحبو وقت ما تحبو حت فالزنايق الدعوة هانية (الحوانت والمطاعم يخدمو 24ساعة)
في الأخير ننصحكم بالحجز في booking او احد التطبيقات.
اللي عندو visa او master card رايح تهنيك وتعاونك مليح
بالنسبة للصرف تلقاو الات الصرف برا بلا ما تدخل دير لاشان
سعر الاورو حاليا 100 اورو ب حوالي 2010 جنيه
الدولار 100 ب حوالي 1900 جنيه
الجنيه هبط هاد اليامات (الصرف يطلع ويحبط)
