#شحال_تستقاملك السلام عليكم و رحمة الله رحلتي الى ايطاليا من الجزائر عبر فرنسا

#شحال_تستقاملك
السلام عليكم و رحمة الله
رحلتي الى ايطاليا 🇮🇹 من الجزائر🇩🇿 عبر فرنسا🇨🇵
14 ماي توجهت الى مطار قسنطينة متجها الى مدينة مارسيليا بحكم اني تحصلت على فيزا من فرنسا(24000da)،وصلت على الساعة 12 مع الغداء و شوية تحواس في المدينة رحت الى الهوستل وين حجزت من الجزائر لليلة واحدة ب 38 اورو(كل الحجوزات درتهم قبل الرحلة من نقل و مبيت),حوست شوية مع العشية في المدينة في جو ربيعي هايل مع شوية امطار خفيفة،تعشيت و هبطت الى الهوستل،مارسيليا مدينة تعجبني نحس روحي مرتاح فيها.
15 ماي صباحا تقهويت عند اخونا دزيري في مقهى مقابل station saint Charle اخذت تذكرة الى مطار مرسيليا ب 10 اورو،الوجهة مدينة فلورنس ايطاليا🇮🇹،وصلت الى المطار صرالي مشكل انو مداير حجز un petit sac sous le siège 40cm*30cm*20cm وانا عندي sac a dos شويا كبير ايا بدلتو بواحد صغير خليتو عند صحبي و ركبت الطيارة الى فلورنس😍(60 اورو ذهاب و اياب)من تطبيق omio، الرحلات تبدأ من ماي الى سبتمبر،وصلت على الساعة 14،من مطار فلورنس الى وسط المدينة كاين طرامواي T1 ب 1.5 اورو لمدة 100 دقيقة والتذكرة تشريها من جهاز يقبل كارت و نقدا تاني يحطك في staion santa maria novella و تركب بيه bus تاني،وصلت الى الهوستل ماكانش بعيد بزاف و من بعد مشيت نحوس شوية،حقيقة مدينة ساحرة🤩 تحس روحك في متحف،الحمد لله ماصراليش syndrome de stendhal هههههه وين كان الاكل من 8 اورو الى 10 اورو،المبيت في اوستل وسط المدينة ب 36 اورو لليلة(سرير)،الدخول الى المتاحف و الكناىس لازم حجز من قبل انا مادرتش ماعندي حاجة فيهم و فيهم طوابير كبيرة لازم تستنا بزاف،المهم مشيت نشوف الاماكن لي لازم نشوفهم عبر تطبيق firenze(تطبيق بزاف مليح)،مع المغرب كان لازم نروح الى piazzale michelangelo تشوفو المدينة مع غروب الشمس،بلاصة بزاف مليحة لازم لي يزور فلورنس يروحلها،تعشيت و سهرت شوية مع واحد جيلاتو الايطالي بنة ماش نورمال(ابتداء من 4 اورو)مقابل نهر فلورنس و رحت نرقد وين كان لازم نرتاح للوجهة القادمة
فلورنس بزاف مليحة خاصة وقت الربيع وين الاسعار ماش غالية بزاف و الجو مليح،بالنسبة لي 3 ايام تكفي.
الوجهة القادمة الى الحلقة القادمة اذا عجبتكم ههههه
……….يتبع.