#شحال_سقامتلي بعد فترة صعبة في الكورونا الواحد كان محتاج عطلة يريح راسو بيها ال

#شحال_سقامتلي
بعد فترة صعبة في الكورونا الواحد كان محتاج عطلة يريح راسو بيها
اليوم حبيت نشارك معاكم الرحلة لي قادتني إلى تركيا لوجهة جديدة ربما على الجزائريين ليس اسطنبول أو أنطاليا لكن إلى الساحرة ” مارماريس” Marmaris.
– مارماريس جاية أقصى الجنوب التركي تابعة إداريا لمقاطعة موغلا، وتعتبر منطقة التقاء البحر الأبيض المتوسط وبحر إيجة.
– المناخ رائع جدا خاصة في شهر سبتمبر ” 27 إلى 30 درجة”
– أول ملاحظة الرحلة ستكون متبعة لكنها في النهاية ” ماشي خسارة”.
التنقل من الجزائر إلى أنطاليا ( الوصول في 3 صباحا)، من بعد لازم تستنى 5.30 صباحا موعد أول رحلة عبر الحافلة إلى مارماريس ( 5 ساعات ونصف حوالي 350 كلم وتكلّف ما بين 180 إلى 300 ليرة يعني ما بين 13 و15 أورو ذهابا”.
– خيّرت فندق متوسط لأني بصراحة استغليتو فقط للنوم ( نهار كامل بارا)، مارماريس قرية صغيرة يعني أغلب الفنادق قريبة من وسط المدينة.
– المدينة صغيرة يمكن زيارة كل معالمها في يوم أو يومين على أقصى تقدير زأبرز المعالم ” مارماريس مارينا marina وين كاين الميناء والمطاعم بكل الأنواع”، قلعة مارماريس التاريخية marmaris castle، تمثال مصطفى كمال أتاتورك، مدينة الألعاب أتلانتيس, le grand bazar marmaris.
– أجمل شيء في مارماريس الرحلات البحرية من ميناء مارينا، الأسعار تتراوح ما بين 15 و400 أورو حسب الرحلة لي راك حابها.
شخصيا خيرت رحلتين إلى جزيرة كليوباترا ( سيدير إيلاند بالتركية) ” هادي مستحيل تراطيها” ، وجزيرة داليان وين يلتقي البحر مع النهر، وهناك رحلات أخرى ” أكياكا، غوفوكا، اولودينيز، لكن تقريبا يتشابهوا.
– الرحلة البحرية إلى كلوباترا وداليان استقامتلي 40 أورو ” حاجة نوصي عليها لازم تنيقوصي ماكسيموم في الأول قالولي تستقام 80 أورو بصح كاين بزاف لي يديو ليها تسمى طيح في سعر مليح”
– الرحلة إلى جزيرة كليوباترا فيها 6 ساعات وفيها الفطور خالص، تروح لعدة جزر تريح في كل وحدة 30 ساعة وفي كليوباترا ساعتين ونصف لأنها أجمل جزيرة دون منازع، تلقى فيها أيضا بعض الأثار الإفريقية.
الرحلة إلى جزية داليان فيها 10 ساعات بصح تستهال بزاف ما راحش تندم عليها، فيها عومة في شاطئ خلوي، نهر داليان فيها سلاحق عملاقة بالوان هايلة، فيها تاني حمام تركي أصلي بالطين ” تجربة رائعة”، الفطور أيضا خالص من عندهم.
– من مارماريس رحت أيضا إلى شبه جزية سيليمية الساحرة selimiye، حوالي ساعة بالحافلة مقابل 45 ليرة ” 2 أورو” تما تقدر تجوز نهار كامل فيها شواطئ رائعة، كي تصرف فوق 100 ليرة يمدلك بلاصة خاصة على شط البحر.
– ثاني مدينة زرتها هي داتشا أو datça، أووووووه …. مستحيل واحد يروحلها وينساها، قرية هادئة جدا تجمع بين البحر الرائع والبنايات القديمة والأزقة التي تجعلك تائها فيها، زيد تلقى كافيتيريات ومطاعم بـ”ستيل” جميل جدا، تقدر تجوّز فيها نهار أيضا وتولي.
– الرحلة تاعي دامت 6 أيام وهو وقت مناسب جدا يعني ما راحش تكره بزاف وفوق أسبوع ربما تدخل في الروتين.
الأتراك ما يهدروش بزاف الإنجليزية ” عدا الفنادق تلقاهم يهدروا الإنجليزية مليح”، يعني راح تلقاو شوية صعوبات بصح كلش يجوز.
– مقاطعة موغلا من أجمل المناطق في العالم فيها مقاطعات كثيرة مثل مارماريس، موغلا، كنيدوس، فتحية، أولودونيز.
ملاحظة: أول مرة نسافر وحدي كنت خايف بزاف، بصح في نهاية المطاف كان أحسن voyage جوزتوا في حياتي.