#شحال_سقامتلي .. درت عمرة في نوفمبر لي فات ، و نقوللكم شحال تجيكم هكداك … أنا من الناس لي نسافر وحدي و جامي سافرت مع كاش وكالة سياحية … التذكرة شريتها من تونس إلى جدة مع السعودية و خلصت عليها 280£ تقريبا 7 مليون ، الفيزا كي يكون عندك باسبور أجنبي ولا إقامة ولا تأشيرة تع شنغن و uk و usa و كندا و استعملتها يعطوك تأشيرة سياحة عند الوصول ،. . أنا بالباسبور ديالي درت فيزا سياحة كي لحقت ، عطاوني فيها عام و خلصت عليها 490 ريال تقريبا 2.5 مليون .. و درت بيها عمرة و راح نزيد ندير بيها عمرة في رمضان القادم إن شاء الله ، فيزا عمرة في الجزائر الوكالة تحسبها ما بين 6-6.5 مليون و فيها دخلة وحدة برك .. تسمى سياحة أفضل اذا كنتو ناويين تروحو ديراكت لمكة ما تنساوش لباس الإحرام طلعوه معاكم في الطائرة و كي يدخل الميقات بدلو في الطائرة و ديرو النية تع العمرة و اذا كنتو رايحين للمدينة هذيك حاجة وحدوخرا ، باش تروح من مطار جدة إلى مكة تقدر تروح في قطار الحرمين ولا طاكسي و لا كلونديستان .. أنا خلصت كلونديستان 200 ريال ( غالي شوية ) .. في مكة كريت في شارع أجياد منطقة قريبة للحرم ، يا ربي 10د مشي عن الفندق و خلصت 4 ليالي ب 600 ريال تقريبا 4 مليون .. الفنادق في مكة قاع فيهم 4-5 beds تسمى تروحو جماعة تقسمو كلش .. يا ادير عمرة لازم تحجز أونلاين في موقع nusik بصح تقدر ادير نورمال واحد ما يحوس عليك ، الأكل في مكة أنا واحد ( ربي يغفرلي ) عفت الماكلة هذيك تسمى كنت داير حسابي و اديت معايا شوية حلوة و التمر و الكسرة ، جبتها 4 أيام ناكل التمر و الله المراعي و شوية كسرة و مين داك kfc .. الأكل بين 15-35 ريال ، باش تشري شريحة تخلص بين 35-85 ريال و لازم تعطيلهم رقم الفيزا و ادير البصمة ، كلش مراقب تماك ، الصرف تماك كاين لي يقولك تدي الدولار أحسن و تقدرو تصرفو حتى الدينار ديالنا و نقدرو تستعملو فيزا كارد نورمال، باش تروح ادير عمرة على شخص ميت لازم تروح لمسجد عائشة و تحرم من تم ، تحكم طاكسي يديك تماك يستناك ادوش وتصلي و يرجعك للحرم ب 40 ريال ولا تقدر تروح بكلونديستان جماعي ب 5 ريال ذهاب و 5 ريال عودة ، مكة ما تختلفش عن باقي المدن العربية في التجارة .. تسمى الناس لي موالفة تروح لتونس و إسطنبول و مراكش و القاهرة علابالها بلي الأسعار فيها تضخيم كثير .. حاجة تع 10 ريال يقولك 100 نورمال .. الناس لي عايشة في مكة ما تشوفش في مكة كيما حنا لي نسكنو خارج السعودية .. كي تيجو تشريو لازم تهبطو السعر maximum .. على كل حال ما شريت والو من ان كنت جايبها ندخل الحرم نصلي ما نخرجش حتى مور العشاء و نطلع نرقد … هيا صراحة العمرة مليحة تروح مع شخصين و تقسمو كلش تجيكم أرخص شوية و اذا كنت حاب تبعث الوالدة ديالك العمرة من الأفضل تروح نتا معاها و الله شفت بزاف أمهات مساكن مبحرين تماك و بزاف مساكن دايرين عمرة و يطوفو بالكعبة و يمشيو بين الصفا و المروة و ساكتين ما علابالهمش واش يقولو ولا يدعيو … روحو مع والديكم و علموهم واش يديرو … و كاينة حاجة أيضا ادو معاكم كلاكات تع البلاستيك ، ال Hugo boss ديالي نويتها صدقة تماك 😌😂 المنشور القادم عن المدينة المنورة إن شاء الله
خونا باختصار اشحال سقامتلك بدراهمنا !؟
ربي يرزق والدينا ويرزقنا
عمرة مقبولة ان شاء الله و شكرا على المعلومات 🌸
نتا موالف تسوبريمي المنشورات تاعك… الله يسترك ماتسوبريميش هدا.. نسحقو منبعد صحا 🙏🥲🤝
ربي يتقبل و شكرا على منشوراتك الرائعة
ربي يرزقنا و يرزق والدينا و كل شخص متمني هذاك المكان
تقبل الله منكم وجعلنا من زائريها يارب
عمرة مقبولة إن شاء الله 💛، اللهم ارزقنا زيارة بيتك الحرام و السجود فيه يا رب 🥺❤️🤲
بارك الله فيك
عمره مقبوله وربي يرزقنا زيارتها ان شاء الله ونتمنى المنشور يبقى مايتمحاش
بارك الله فيك
عاودت العمره من مسجد عائشة ؟ الاخ اسمحلي لكن رخصه فقط لعائشة رضي الله عنها وللنساء فقط كان لازم تروح للطائف خويا وربي يتقبل منك
ربي يتقبل ❤️
عمرة مقبولة العاقبة للحج
تقبل الله منا ومنكم صالح الأعمال
شكرا جزيلا للمعلومات
عمرة مقبولة ان شاء اللّه.. و لعقوبة لكل مشتاق🌹🙏🏻
رب يتقبل..والعاقبة لينا يارب
ربي يتقبل ان شاء الله وربي يرزقنا زيارتها عن قريب ❤️
شكرا على المشاركة …. و ربي يتقبل ان شاء الله
يتسمى مع الاخير نفهموا بلي ستقامتلك اكثر من الوكالة
الله يقبل و ربي يكتبها لينا
ماشاء الله تبارك الرحمن نسال الله من فضله
اتسما قداه اسقامت كامل، احسبيلي بليز😣
ماشاء الله ربي يرزقنا زيارتها
ربي يرزقنا عمرة في القريب العاجل 🤲
و ادي معاك شارجور زيادة ماتنساش لي پريز لي عندهم triplettes ماشي كيما تاعنا باش ماتخلاصش عليك تطلب 🙈
ماشاء الله
الله يقبل
العاقبة لينا 🥹❤️
شحال استقامت كامل مقدرتش نحسب؟
شكرا ربي يتقبل
عمرة مقبولة ، تقبل الله منك
تقبل الله وعسى ان نكون ممن تختارهم مكة لزيارتها
عمرة مقبولة ان شاء الله
الله يبارك فيك.
تصحيح وإضافة : الشريحة تقدر تشرسها ارخص لكن تبجا من 30 ريال وروح، بخصوص الطاكسي لازم تنيڤوصي جدة – مكة تقدر تروح ب 80 او اقل واذا رحت من المدينة لمكة في قطار الحرمين تستقاملك من 175 ريال فما فوق
بخصوص إعادة العمرة ديرها من الطائف، من مسجد عائشة قالها غير ابن الباز رحمه الله اما بقية العلماء قالك لالا،انا سقيت عالم هناك قالي هذا خلاف للسنة والله اعلم
تقبل الله، اللهم بلغنا زيارة بيتك الحرام 🤲🕋
ربي يرزقنا عمرة ان شاء الله كامل
ربي يتقبل منك
مشاء الله والله شوقتنا ، ربي يجعلنا من زوارها و ربي يتقبل منك
ماشاء الله عمرة مقبولة وربي يرزقنا إن شاء الله
عمرة مقبولة
ما شاء الله .. الصور فقط تفتح النفس كيف الحقيقة. ربي ييسرها على كل من يتمناها.
عمرة مقبولة ان شاء الله
بارك الله فيك جات في وقتها السبوع القادم نطلع أن شاء الله