#عمرة
اول رحلة ليا كانت لأجمل مكان والحمدالله
بداية من الطيران رحنا مع طيران السعودي وكانت اجمل تجربة من جميع النواحي
ولاني اول مرة نروح لقيت بعض الصعوبات حبيت نحكيهم كانصيحة لناس لي رايحين
اول حاجة الراحة حاولو ترتاحو قبل السفرة وهذي لحاجة لي مادرتهاش لانها سفرة على قد جمالها على قد تعب لي فيها وحاولو قبل تتغذاو مليح وتشربو فيتامينات
ثاني حاجة الجو تغير الجو راح تمرضو اديو معاكم ادوية وماتقولوش مش راح نمرضو مهما ديرو احتياطاتكم راح تمرضو والأدوية عندهم غالييين حتى مواد تجميل بنسبة للبنات مثل واقي الشمس اديو بدوبل لانو اقل واقي شمس عندهم بدراهمنا
مليون
نروحو للأكل انا كنت ضد فكرة لي يدو معاهم اكل من الجزائر وكنت نضحك عليهم ونقول رايحين للمجاعة ياك كاين اكل لهيه ومع الاسف ندمت ندم شديد لانو اكلهم مش بنين ومانتقبلوهش عقبتها فقط فواكه الاكل لوحيد لي يصلح تع البيك ننصحكم بيه
الايجابية الوحيدة اني ماديتش معايا اكل من هنا هي اني ماضيعتش وقت في طياب ولوتال
وناس لي تحب القهوة اديو معاكم لانو قهوتهم ماتتشربش
وناس لي تقلك رايحين للعبادة مش الاكل العبادة لازملها طاقة
وجهد ولازم تتغذاو مليح باش تقدرو تكملو
بنسبة للعبادة استغلو كل دقيقة وثانية لانو ترجعو راح تندمو على كل دقيقة ضيعتوها بعيدا عن الحرم والكعبة
وفي الطواف ومناسك العمرة راح تشوفو تجاوزات كثيرة ومواقف تخليك تفقد اعصابك لازم تحاول تتحكم في نفسك وتكظم الغيض لانو يصراو حوايج يخرجو الانسان من عقلو ولي راحو قبل راح يفهموني وبنسبة لي الصلاة داخل الحرم لازم تبكرو قبل وقت الصلاة بساعة او اكثر
حاولو تحفظو ادعية قبل ماتروحو
وتشاهدو فديوهات عن مناسك العمرة والطاعات لي تقدر ديروهم وكي تلحقو ثم تكونو فاهمين واش راكم ديرو وتعيشو لحظة
بنسبة للهداية نفضل تخليوهم اخر شي وتشريو مرة وحدة مش كل يوم تضيعو وقت في الاسواق
بنسبة لماء زمزم انا ضد تجيبو ما زمزم في قارورات صغيرة كاين اكياس بلاستيكية 5لتر مخصصة لماء زمزم تشريوها ب5ريال واحيانا تلقاوهم ب2ريال وتقدرو تحطوهم في باقاج عادي ويفوتو في طائرة ومايصرالهم والو تستعملوهم هوما تختصرو وقت وجهد
بنسبة للبائعين ديما سعر لي يمدوه هبطوه لنصف واكثر لانو
حاجة تكون ب5ريال هو يقلك 20ريال لازم تنيقوصي معاهم
بنسبة لتصريف حاولو تصرفو من عند اصحاب المحلات يمدولكم سعر اكثر من صرافين
وفي الاخير ننصحكم لي عندو امكانيات يروح يدير عمرة في سن صغير لانو تشوفو ثم كبار السن كفاه يتمرمدو وكفاه يتعبو ويعقبو اغلب وقتهم في لوتال لانهم مايقدروش ويتعبو
وربي يرزق كل شخص زيارة بيته
See less
