كيما نعرفو كامل سويسرا هي أكثر دولة محايدة فالعالم، بصح كاين واحد المرة ما بقاتش محايدة و دخلت فازمة مع فرنسا على جال واش؟ جبن الغرويار le gruyère
كي نرجعو للتاريخ، الجبن تم صناعته لأول مرة فالقرن 12، في وقت مكانش حدود و غرب سويسرا و شرق فرنسا كانو شعب واحد بنفس اللغة و الديانة و العادات 🙄🙄 في منطقة جغرافيا راهي تابعة سويسرا حاليا.
ايا من بعدها الجبن ولا يصنع كذلك فجنوب شرق فرنسا و حتى النمسا، الأمر عادي لحد الان… مين وصل القرن 18 بدأت الحرب بيناتهم، كل وحدة تقول الجبن تاعي و اصلو من عندي و هو تراث خاص بالدولة تاعي، العالم لازم يعرف بلي الجبن هذا من إنتاج الشعب تاعي و نوريه للسياح و يذوقوه و يعجبهم على اساس اكل شعبي.
بعدها بقات الازمة الدبلوماسية بين البلدين، قامو بعمل اجتماع في مدريد عام 1891 و في باريس عام 1926 و في روما عام 1930 غير بأه يوصلو لاتفاق تعمن الجبن هذا!! و لي فالاخر اعترف بيه الاتحاد الأوروبي من بعد على اساس جبن سويسري لانه صنع لأول مرة في اراضي سويسرية.
الغريب فالأمر مجاش جماعة من الشعب السويسري تقولك مزال الناس تضارب عالفرماج، ولا واحد يقولك كنا شعب واحد و مكاش حدود يعني نفس التقاليد و الخرطي هذاك، و لا واحد يقولك لالا هاذاك الجبن خدموه تع فرايبورغ الألمانية كي هبطو يسكنو فلاسويس يعني ألماني، ولا واحد يقول خلونا مالجياحة تع العالم الثالث… لالا، الشعب تمسك بالموروث تاعو و خلا العالم يعترف بالجبن السويسري، خاطر عارف بلي هو جزء من تاريخ تاعو و من الهوية تاعو كشعب و التفريط فيه بعنوان الاخوة و فرماج برك هو امر غبي و تخلي عن جزء من صورتهم للعالم.
نتمنى واحد الشعب يسكن فبلد بحجم قارة يتعلم من دول العالم الاول، و بلي التراث الثقافي هو الهوية الاجتماعية، اذا سمحت فيه تولي مجهول النسب و شكرا.
و ان شاء الله كي تروحو سويسرا ما تنساوش تجربو الجبن السويسري، ماشي تروحو ستراسبورغ تقولو كلينا الغرويار الستراسبورغي 🙄🙄
وصلت الرسالة..بارك الله فيك.
زيدلهم مقدونيا و يونان لحقو قريب حرب مسلحة على اسم فقط وين اجبرتها يونان بزيادة كلمة شمالية في اسمها وحنا مروكو استولت على اسم المغرب و احتكرته قبل 1950 كانت مملكة مراكشية
بارك الله فيك والله يكثر من أمثالك. عيينا من هذي الفئة الجاهلة السلبية.
شكرا للك على هدا المقال التري
Kayen village gruyeres f la suisse
بالمناسبة مين يقولو سويسرا دولة محايدة هذا ما يعنيش بلي فرشة و لي جا يدير شتى يبغي فيهم ، فالحرب العالمية الثانية سويسرا غلقت المجال الجوي تاعها على المعسكرين الشرقي و الغربي ، أيا طائرات من الحلفاء الغربيين فاتت فالمجال الجوي السويسري ، الجيش السويسري طيح بعض الطائرات منهم عادي
أصبت فيما ذكرت ولكن ..
لانقارن نفسنا بهم فنحن أمة مسلمة أمة واحدة
لايفرقنا جبن أو تراث أو ثقافة
ولافرق بين عربي ولا أعجمي إلا بالتقوى
والإسلام جاء ووحد المسلمين عربهم وعجمهم فاصبحوا أمة سادت الأرض عندما تمسكو بدينهم واعتزو به لا بلغتهم ولا بثقافتهم ولابنسبهم
وكل هذه الصراعات ضعفت عندما ضعف الدين وأصبح المسلم يعتز بدولته أو لغته او ثقافته أكثر من اعتزازه بالاسلام
نحن أمة مسلمة نفتخر بكل ما للمسلمين من تاريخ وثقافة سواء كانت على أرضي أو على أقصى الشرق أو الغرب
راك قلت كانوا شعب واحد وبلد واحد يعني سويسرا مكانش من حقها تقول الجبن من حقي لأن مكانش تقسيمات في هداك الوقت وانا نشوف أن من التفاهة تنوض حروب بشرية على حاجة أسمها الموروث هذا هو لوصل العالم إلى ما هو عليه
Gruyère c est un village suisse …
الجبن مسمى على هذه القرية … هذه الأيام زياني في سويسرا بلد هدوء ..بلد نظيف جدا وجميل طبيعيا .. بعيد عن قصة الجبن هناك مطار دولي تشترك فيه سويسرا المانيا فرنساeuro airoport …..هم متحدين …عكسنا تماما
ماشي معنتها كي يديرو هوما حاجة تسما هذاك هو الصح لي لازم يندار لالا؟
بصح خريطة سياسية فذاك وقت تختلف
العالم الثالث يزرع الفتنة بين المسلمين بالتراث
تخيل مثلا قطر تقرر تعتمد اسم الخليج كإسم رسمي لدولتها وبالتالي كل تراث المنطقة سينسب إلى هذه الدولة
هذا وش صرالنا في شمال إفريقيا.. المغرب دات إسم المنطقة ككل مش تراثنا برك! وبالتالي التقاليد المغاربية كلها تنسب للمغرب بحكم الإسم مثل الحمام المغربي الكسكس المغربي…
كل هذه العبارات كان يستعملها أهل المشرق عند الحديث عن تراث منطقة شمال إفريقيا.. اليوم استفردت بها “دولة المغرب”
التراث هو هوية شعب ووطن يجب حمايته بكل الاشكال وليس بأمر تافه
و درك مي راهم يجيبو ف السلاح الصهيوني باش يديو صحراء الجزائر علاش ما قالوش خاوة و دين ، و كي راهم يحالو ينسبو كلش ليهم راهم يتبعو ف نفس سيلسة الاستعمار ، لو ما كانتش الهوية حاجة مهمة ما يحاربوهاش
كي تروح المغرب تلقا الكسكس ينتكل في كل دار ،القفاطن يتباعو في كل جيهة اشكال وانواع ، والنسا يلبسوهم في جميع الأعراس ، الطواجن طايبين على الفحم في كل زنقة ، المسمن ،البغرير ،انا رحت تما و شفت بعيني ومن بعد تجي تقول الكسكس تاعنا والقفطان تاعنا والطاجين تاعنا كيما حنا عندنا كسكس و قفطان و طاجين هما عندهم ، هما عندهم بالزيادة علينا لانهم يحافظو على التقاليد ولانه بلد سياحي
لمن تقرا زابورك يا داوود.. قريت بعض التعليقات هنا تغميت
شكرا على المقال كفيت و وفيت 🎩
👏🏼👏🏼👏🏼👏🏼
تراثك هو هويتك ودليل وجودك على هذه الأرض عندما يُسلب تفقد أحقيتك في الأرض أيضا .
كيما بغاو يديرو مع تلمسان داو الشدة وجل التقاليد التلمسانية بعداتيكا يقولك تلمسان مروكية وهي الأخت الصغرى لفاس .تلمسان أصلاتها وجذورها ضاربة فالتاريخ بغاو بالسيف يقزموها وتلقاهم مخهم مغسول بلي أرضهم وتالمو لاسقين فدي الهدرة حتى فوقت الغفلة بعض الأغ.بياء عندنا أمنوهم .
وطبق المثال على ما بقي من أراضي مرة تندوف وبشار لي يسموهم صحراء شرقية خخ بعدها تلمسان بعدها وهران حتى تلقاهم لحقو لتبسة بلاحشمة .
صح عندك الحق ان شاء الله الناس تفيق
عقدة العالم الثالث جامي تتنحى… يعني لانو سويسرا في القرن التاسع عشر ولا العشرين ما قالوش مازال الناس تضارب عالجبن معناها هذا هو الصواب… الله يشافي ويهدي الجميع