مصر الجزء 2
أسوان والاقصر …كل وحده محافظة وحدها لكن هم أصلا قدام بعض وديما في عروض سياحية يقولوا اسوان والاقصر فاغلب ناس يديروا في بالهم انهم أنه منطقه وحده ..يفضل زيارة اسوان والاقصر بين ديسمبر ل مارس أصلا في فيفري ومارس وتكونوا فيهم مصيفين بعد مارس تلحق 50 درجه
#اسوان
اسوان سكانها منقسمين الى نوبين وصعايدة …نوبين عندهم لهجة خاصه بهم كي يكونوا مع بعض وحتى في النوبة عندهم شوي كلمات ميفهموهاش ليكونوا مش من نفس القبيلة وكاين أهل النوبة في سودان ثاني لانهم امتداد لبعض واصلا اسوان كاين بحيرة ناصر لطلوها 500 كلم تفصل اسوان على مصر 300 متر منها لمصر و200 لسودان
اسوان فيها مطار دولي ومحلي لكن أصلا بعيد عن مدينة بزاف …..
اجمل منظر لنيل تشوفوه في اسوان منسوب ماء عالي وزيد صافي
في اسوان يفضل الاقامه في سوق السياحية باه تقدروا تتحركوا براحتكم ..فنادق في سوق سياحي او قريبة منه تبدأ من 200 جنيه ل 600 جنيه وتلقاو ثاني ايجار شقق مفروشة باليوم ايجار شبه من 400 ل 800 جنيه لليوم
#أهم_مزارات_اسوان
#معبد_فيلة جاي في وسط النيل تروحوا من وسط مدينة في ترونسبور ب 5 جنيه قولوا يحطكم قريب لمرسى فيلة (في اغلب يحطكم عند اكاديمية البحرية وانتم تهبطوا تمشوا ولا تركبو توكتك ب 5 جنيه ولا تهزو توكتك ب 20 جنيه من وسط اسوان ل مرسى معبد فيلة ..دخول نتاعه ب 40 جنيه وطلبة ب 20 ومركب لتديكم تحسب 200 جنية اذا كنتم جماعه راكم نتقاسموا ثمن ..اذا كنتم وحدكم تلقاو ناس كوبل ولا وحدهم اتفقوا معاهم انكم تتقاسموا تكلفه مركب واجرو مركب حتى تكملوا جولتكم ويرجعكم للمرسىى باه تعطوهالوا
#مقابر_نبلاء_وابوالهوى هي منطقة وحده تطلعوا جبل صغير شوي كاين درج(167درجة ) وبعدها تلقاو مقابر فرعونية يفتحوهالكم حراس مقابر يكونوا ثم تلقاوهم لابسين لبس أهل اسوان وامبعد تكملوا تطلعوا للقمة فيها كان برج للمراقبه في فتوحات اسلامية تشوفوا من فوق نيل وجزر لفيها ومدينة اسوان ..تركبو من كورنيش النيل بالضبط مرسى ابو الهوى مركب يسموها معدية تديكم للضفة الأخرى تهبطوا تمشو 5دقايق تلقاو مكتب تذاكر تدفعوا 20 جنيه ولطلبة 10 جنيه
#البيت_النوبي هو متحف يحكي على أهل النوبة وكيفية نقل معابد من اماكنها اصلية بعد ماتبنى سد العالي غرق معظم منطقه نوبة وهجروا النوبين لمناطق اخرى دخول نتاعه ب 10 جنيه وطلبة ب 5 جنيه ..تركبو ترونسبور ب 3 جنيه يحطكم عنده بصح ديما لزم كي تجوا تركبوا تقولوا بلاصه
#متحف النيل يبين مجرى النيل ودول ليمر عليها وهذا متحف وحيد لمش تابع لوزارة الثقافة والاثار تابع لوزارة الري تدفعوا 50 جنيه ..تركبوا من كورنيش ترونسبور نتاع صحاري يحطكم عنده ترونسبور ب 5 جنيه
السد العالي تشوفوا خزان السد العالي وكاين واحد مونيمو يسموه رمز الصداقه على شكل زهرة لوتس وتقدروا تطلعوا لسطح نتاعه تخلصوا 20 جنيه وتشوفوا من فوق بحيرة ناصر والسد العالي وبعض الجزر
#معبد ابو سمبل يعتبر اهم معبد نظرا لتعابد الشمس على وجه تمثال رمسيس في 22 اكتوبر ومرة على زوجته جميلة جميلات نفرتاي على باب معبد مكتوب بالفرعونية لاجلها تشرق الشمس دخول نتاعه على حسب موسم في فترة تعامد ماتصحش أصلا بلاصه ويروحوا ليه بطاكسي مخصوص ب 150 جنيه هو خارج اسوان
جزيرة النباتات عبارة عن حديقة في وسط النيل تروحولها بمركب ودخول نتاعها ب 15 جنيه..هي الرحلة النيلية ليها اهم من الجزيرة
كاين قرى نوبية ممكن تروحواليهم وندخلوا البيوت نتاعهم ملونه وعندهم هندسة خاصه بهم وبيوت نوبة يربوا التماسيح واطفال تلقوهم رافدين تماسيح كما زعم كاش واحد مربي قط ويلعب معاه ..وعندهم نوع خاص من قهوة ممكن تجربوه اشهر قرى نوبية كاين غرب سهيل وجزيرة هيسا وكاين قرية قدام ابو الهوى التحت …
السوق السياحي فيه محلات بيع هدايا تذكارية والبسة النوبية وعطارة اسوان مشهورة بالعطارة
وفيها عدة نوادي تقدروا تدخلوا تشربوا قهوة ولا آتاي ولا عصائر وتصوروا فيهم …لزم تجربوا عصير قصب سكر وعصير مانجا
مطاعم رايحين تلقاو بزاف وفي كل مكان واسعار تختلف على حسب واش رايح تطلب..في مطاعم مصرية تلقاو طبيخ المصري بامية لهي عندنا قناوية لناس الشرق وملوخية لناس وسط ..تلقاو ملوخية نتاعهم…محشي هو دولمى نتاعنا بصح هم تلقى عندهم بالإضافة إلى كورجات وطرشي وكروم تلقاو محشي بتنجان ومحشي ورق عنب ..اي وجبة يحطوا معاها الأرز ..تلقاو فراخ لهي دجاج وتلقاو حمام محشي بصح مش في كل مطاعم عندهم شوربة لسان عصفور انا نقولهم زغلي وماء يغلي متعجبنيش كاين شوربة دجاج بكريمة انا تعجبني ..كشري (كشري عبارة عن مقرون وعدس وحمص وشوي سباكيتي وبصل وصلصه خاصه ) … بتزا في مصر جربتها في كل اماكن حتى زعم مطاعم اصحاب مركات معروفة ومعجبتنيش …شوارما تلقاو مصري والسوري انا يجوني نفس طعم ..انا في مصر نحب ناكل حوت لانه مقارنه باسعار نتاعنا رخيص ..كاين مطاعم مقدونالز وكنتاكي واسعار تختلف على حسب وجبه واش فيها
.قهوة كما نتاعنا يقولوا عليها اسبراسو ومتكونش في كل مكان تكون غير في كافيهات شيك وسعرها بين 60 و80 جنيه ..عندهم حاجه اسمها شاي بلبن هو حليب يزيدولوا آتاي نتاعهم …جربوا ارز بلبن ثاني مليح وام علي عبارة عن حلويات …مكسرات غالية في مصر
