#معلومة دبي في الجزء الثاني حبيت نحكي على أهم المناطق السياحية في دبي لي لازم تر

#معلومة
دبي
في الجزء الثاني حبيت نحكي على أهم المناطق السياحية في دبي لي لازم تروحلهم، راح نحاول نبين كيفية الوصول اليها، و كم تكلفتها، و نذكر أن 1درهم = تقريبا 50دينار تاعنا.
* القرية العالمية global village ، هي وجهة موسمية تفتح ابوابها للزوار عادة في اواخر شهر نوفمبر الى غاية اوائل شهر أفريل، تذكرة الدخول ب15 درهم، وتروحلها بالحافلة تكلفة الرحلة 5درهم. تبعد عن دبي حوالي 35دقيقة، توجد حافلات مخصصة لها تنطلق من اربع وجهات مختلفة منها محطة ميترو الإتحاد حافلة رقم 103, ابتداءا من الساعة 15:15 لأن الحديقة تفتح على الساعة 16:00 الى منتصف الليل.
* حديقة المعجزات miracle garden, هي تاني موسمية تفتح ابوابها اواخر شهر نوفمبر الى اواخر شهر افريل، تذكرة الدخول للبالغين 55درهم، للاطفال 40 درهم، تروحلها ايضا بالحافلة بتكلفة 5 درهم، تستغرق الرحلة حوالي 40دقيقة، تنطلق الحافلة رقم 105 من محطة ميترو مول الإمارات، mall of Emirates كل ساعة على ما أظن.
* جزيرة نخلة جميرا, Palm Jumeirah, للوصول اليها لازم تتنقل بالميترو الى محطمة Damac ثم تحول بالترامواي الى محطة Palm Jumeira بتكلفة بين 6 الى 8 درهم حسب مكان الانطلاق، ثم تاخذ المونوريل monorail 🚝 الخاص بالجزيرة بقيمة 35 درهم تذكرة ذهاب و اياب، يمكن تبانلك طريق جبده لكن حتى فالطريق تحويسة.
* داخل جزيرة النخلة، بالضبط في أتلانتيس كاين بلايص شابين للزيارة مثل the lost chambers سعر التذكرة للبالغين 115درهم هي عبارة عن aquarium مصنوعة بطريقة ابداعية، يوجد ايضا فيها aquaventure water park المنتزه المائي سعر التذكرة للبالغين يبدأ من 320درهم وطلع، كل ما تزيد فالسومة تزيد les activities لي يعطولك لداخل.
* مدينة جميرا، هي مدينة مبنية على طريقة البندقية في إيطاليا، وين توجد فيلا تاع زين الدين زيدان، فيلات بيناتهم الماء تقدر تحجز تذكرة ب80 درهم تعمل جولة، يديك حتى تخرج قريب من برج العرب، و في نفس الوقت فيه مقاهي و مطاعم وفيها سوق يبيعوا les souvenirs, لكن ماننصحكش تشري من تم اذا راك حاب تقتصد، من المستحسن تروحلها بالطاكسي لما ترجع من جزيرة النخلة باش يوصلك الى داخل المكان.
* برج خليفة و دبي مول، تروحلهم بالميترو بتكلفة 5 الى 7 درهم تنزل في محطة ميترو برج خليفة، تزيد تمشي برجليك في ممشى خاص يوصلك حتى داخل دبي مول، داخل دبي مول كاين بزاف انشطة و اماكن ترفيهية، من دبي مول تقدر تخرج لنافورة دبي الراقصة لي تمشي مع الموسيقى، و تشوف برج خليفة اطول برج في العالم، و تقدر تحجز تذكرة تطلع للبرج ابتداءا من 149درهم وروح، من المستحسن تحجز عبر الانترنت يوم قبل، تسقاملك خير من تشريها من دبي مول.
* سفاري safari تقدر تحوس في الانترنت على وكالة من الوكالات لي يروحوا لسفاري، و تحجز مقعدك ولا عدد مقاعد على حساب شحال راكم، 100 درهم للشخص، السيارة 4×4 toyota يجيك عند باب الفندق لي راك فيه على الساعة 15:00 و تروحوا للمخيم في الصحراء، فيه تمهبيل في طريق للمخيم، لي يخاف مايروحش، اومبعد في عروض في المخيم و عشاء و اذا حبيت تكري كواد، حتى الساعة 20:30 يرجعك للفندق.
* لا مير La mer هو عبارة عن منتزه شباب بزاف على البحر و فيه شاطئ تقدر تعوم فيه، فيه مطاعم و مقاهي و أماكن للراحة، يستحسن تزوره لعشية، لأنه شباب حتى بعد المغرب، باش تروحلو لازم تهبط في محطة ميترو برجمان burjuman و تاخذ حافلة رقم C10, اظن الرحلة ماتكلفش اكثر من 7 درهم.
* سوق الذهب، و سوق التوابل او كاين لي يسميه السوق الشعبي او التقليدي, تروح الى محطة ميترو الراس al rass تزيد تمشي برجليك تلحق.
* حي فهيدي الأثري، منطقة تراثية جميلة مرممة تقدر من سوق الذهب تروحلها بالعبره او العبّارة فلوكة صغيرة تقطع الخور للجهة المقابلة بواحد درهم، وفيها في هاديك المنطقة متحف دبي القديم.
* بما أني من عشاق الأفلام أنصح كل لي يروح لدبي يروح للسينما، عالم آخر توجد4 شركات سينما في دبي، انا نفضل vox تقدر تنزل تطبيق تاعهم او تدخل للموقع و تحجز مقعدك، تشوف كامل الافلام المتوفرة و تشوف السينما الاقرب ليك و تختار اي نوع من السينما حبيت، كاين العادية، كاين Max فيها ecran مايخلاصش، كاين 4Dx لي تعيشك داخل الفيلم الكرسي يتحرك فيها الماء الضرب، الريح، الدخان…… كاين kids للي عندهم اطفال، كاين Gold لي يحب التقلاش، و كاين انواع اخرين الأسعار تبدا من 35 الى 120 و اكثر، انا شخصيا نفضل MAX.
* اذا انت من عشاق البحر، كاين شاطئ مارينا Marina beach, كاين kite beach قريب من برج العرب، و كاين شاطئ الممزر بعيد عليهم، كامل شابين وكل واحد مميزاته، و كاين شواطئ خاصة فيها مسابح وكل النشاطات اسعارها تبدا تقريبا من 250 درهم.
* ممشى box park جاي طريق فيها كل المحلات مصنوعة بالحاويات les conteneurs بلاصة شابة تروح تتعشى فيها، جاي في طريق اسمه شارع الوصل تقدر تنزل في محطة ميترو الخليج التجاري business bay, و تزيد تمشي برجليك.
* حديقة الخور، هي حديقة شابة خاصة اذا كنت مع العايلة تروحولها كاش عشية ترتاح فيها، فيها مركز عروض الدلافين التذكرة ب 74 درهم و للاطفال 45 درهم، تقدر تخلص اكثر باش تحكم بلاصة شابة اقرب.
* اذا راك حاب تشري des souvenirs تروح لمنطقة ديرة فيها بزاف محلات تاع هدايا بأسعار مليحة، فيها ايضا سوق نايف لي يحب البخور و العود، تنزل في محطة ميترو بني ياس bani yas, و دور برجليك في هديك المنطقة.
* الأكل و الشرب على حسابك كاين مطاعم و مقاهي نقدر نقول باطل، وكاين متوسطين و غاليين، سندويش شاورما ب 5 درهم، طبق تاع روز 13درهم، و الماكلة تقدر تبرمج روحك على حساب برنامج تاع التحواس هداك اليوم، اذا كنت من هواة المطاعم تلقى كل الأنواع أكل إيراني، سوري، هندي، باكستاني، يمني، إمارتي و كل المقاهي starbucks, costa, caribo, cafe nero, tim hortons…… و اخرين بزاف شابين.
* و كاين اماكن اخرى مثل مسجد الشيخ زايد في ابو ظبي لازم تاخذ حافلة لأبوظبي اظن ب 25 درهم، و كي توصل تاخذ طاكسي يوصلك للمسجد و كاين عالم فيراري في ابو ظبي تاني، و اماكن بزاف ماذكرتهمش انا حاولت نركز على اهم المناطق تاع دبي. وراح نجاوب في التعليقات على اي استفسار.