هاذ السمانة شفت 3 أفلام في السينما وهادي انطباعاتي باختصار لكل فيلم الفيلم الأو

هاذ السمانة شفت 3 أفلام في السينما وهادي انطباعاتي باختصار لكل فيلم

الفيلم الأول طولت باش شفته علابالي راهو خارج من جوان اللي هو Le comte de Monte Cristo بكل صراحة عندي نقطة ضعف للرواية الأصلية Alexendre Dumas التي كانت في الأساس قصة مستوحاة من أحداث حقيقية وقام بنشرها متقطعة في بداية القرن التاسع عشر في جريدة لمدة سنة ونصف.. الحاصول اللي حاب يكتب أول فيلم أو مسلسل أو حتى رواية فعليه بكتابة قصة عن الانتقام وقصة كونت مونتي كريستو أفضل قصة انتقام كتبت بالنسبة لي، لا علينا تطلعاتي للفيلم لم تكن عالية لأنني لست من محبي الممثل الكوميدي Pierre Niney أنا جاي شوية old school فيما يخص الكوميديا واللي يعرفني يعرف بلي كاين زوج مدارس للكوميديا اللي تضحكي، المدرسة الفرنسية والمصرية.. دخلت نشوف الفيلم حتى لقيت روحي كملت ثلث سوايع بلا ما نحس، كانت تجربة هايلة رغم النهاية الهزيلة نوعاً ما، كل شيء في الفيلم شباب، الكاست والاخراج والموسيقى والديكور ووو.. رغم ذلك تبقى نسخة Gerard Depardieu الأقرب إلى قلبي وأجدها الأروع من حيث الاقتباس، لكن نسخة Pierre Niney يمكن أن تحوز على المركز الثاني بسهولة..

أما الفيلم الثاني فكان Megalopolis لواحد من الأباء الروحيين لهوليوود والسينما بصفة عامة Francis Ford Coppola.. الذي قام بإخراج The Godfather الذي يعتبره الكثيرون أفضل فيلم في التاريخ.. الحاصول هاذ المرة دخلت وسقف توقعاتي عالي حبيت نطيح عميق وفتحت كامل مجالات الشاكرا اللي عندي على خاطر قريت الكثير من الانتقادات السلبية للفيلم خصوصاً بعد عرضه الأولي في مهرجان كان.. الحاجة اللولة صبت روحي وحدي في الصالة، راح يقولي أحدهم mais quelle chance! تشوف فيلم تاع كوبولا وحدك في الصالة.. كانت أصعب زوج سوايع ونص لي قدام فيلم.. لوكان ماشي القدر للشيباني تاع Coppola كنت رايح نخرج في الساعة اللولة.. المهم فيلم ما عنده لا ساس لا راس، نختصره بالعبارة التالية It was an expensive mess..

الفيلم الثالث هو Joker: folie à deux ممكن نقول هذا هو الفيلم اللي كنت نستنى فيه يخرج هاذ العام.. ما نطولش عليكم بزاف.. الفيلم إخراجيا وتمثيليا شباب بصح الباقي خالوطة وsurtout نقطة comédie musicale ماكاش حاجة تخرجني من فيلم كيما يحشرلي غنية في النص ما عندها حتى معنى.. راني فاهم بلي الغنا هذاك كان داخل مخ الجوكر بصح ما تحطليش 14 غنية كلاو قريب ساعة من الفيلم في باطل.. من كثرة اللقية حسبتهم 🤣🤣🤣 بلا ما نحكي على النهاية المأساوية اللي ماكاش مفعولها كيفا الجزء الأول.. بالنسبة لي هاذ الفيلم ما يكزيزتيش نحيتو من la mémoire ديالي.. كاين غير Joker تاع 2019..

أيا أتهلاو في بعضاكم..