يـوجد حـرق – SPOIL ALERT The Concierge of Crime core : بعد إنهائي للموسم الأ

🚨 يـوجد حـرق – SPOIL ALERT 🚨

The Concierge of Crime core :

بعد إنهائي للموسم الأخير من The Blacklist، حبيت نعطي تحليل ونحكي على بعض النقاط سريعة :

أفضل شخصيتين بالنسبة لي (بإستثناء R.R طبعاً الذي يغرد وحيداً بالقمة) هما :
– توم كيم
– ديمبي زوما

كاريزما، شخصية ومواقف كيما تحب يجوك.

– من أسوء الحاجات لي ماعجبتنيش في السيري هي كيفاش يإيليمينيو شخصيات رئيسية لي تعلقنا بيهم بدون أي سبب (بلا ماتموت هاديك الـ Character ولا سبب حقيقي وعندو تفسير منطقي) كيما واش صرا مع “آرام موجتباي، بارك، سمر نفابي . .” شغل المهم يحاوزوا هادوك الشخصيات وراهم مزروبين باش يبدلوهم وهادي حاجة جامي تصادفت بيها في كل المسلسلات لي تفرجتها، شغل يخرجوا شخصية رئيسية لأسباب تافهة مثلاً :”حاب يخرج من الخدمة ويستراح كيما آرام ومازادش بان، يلسقو فيه مرض كانو قادرين يتجنبوه كيما نافابي وإختفت، بارك بدلوها على خاطر كانت أونسانت” والكثير . . هي بالاك سياسة الكاتب يحب يبدل الشخصيات ولا صراولو معاهم مشاكل تقنية في الواقع بصح أعرف كيفاش تستبعدهم وإحترم تاريخهم في المسلسل، وتان في نفس السياق مينداك بعض الأشرار لي كانوا يعظموهم ويبينوهم بلي مكانش لي يقدرلهم يموتوا بالساهل بطريقة سخيفة !

حاجة ثانية كيفاش رايموند كان عندو مرض فتاك مكانش دواء فعال ليه وعامين ويموت ومبعد سبحان الله تمتم كوفوها الدواء رجع ينفع وبرى من المرض بلخف وراء ما ماتت ليز ومارجعتش عندها فايدة لوكان يقتلو الكاتب (مالڤري مدابيا يبقى حي)، ومام كي كان مريض مكانوش يحكموه الأعراض في الأوقات الصعبة والحرجة، والأهم أنه حتى نوع المرض لي كان عندو ومقالوش وشنو هو مام وراء ما خلاص المسلسل.

– دوكا نروحوا لـ The worst of the worst لي دارهم الكاتب، كيفاش الـ Fandom حياتها كامل تستنا تشوف ردّ فعل إليزابيث كي قرات الورقة لي كتبهالها رايموند قبل ماتموت وعرفت الحقيقة تاعو شكون هو (توقعي باين هو نفسو أمها كاتارينا روستوفا) ومبعد تخلاص لاسيري وهاديك الورقة واحد ماعرف واش مكتوب فيها (وأصلا ريد كي ريكيبيراها من منزل كوبر مامبا ماقطعهاش ولا حرقها) وماشفناش ليز كيفاش رياجات بعد كل ما مرت به والناس لي خسرتهم والشخصية لي تحولت ليها لمعرفة الحقيقة (لي هي الحاجة La base تاع المسلسل) ؟

وثاني أغبى حاجة دارها الكاتب هي ماديكلاراش رسميا شكون كان ريدنجتون في الماضي قبل مايدير العملية الجراحية، وأصلا القصة مبنية كامل على هاد الجزئيّة وشفنا عشرة مواسم كاملين باش نبقاو هكداك في حيرة! وأنا مثلا عندي 6-7 سنوات (2017-2018) وأنا نشوف في The Blacklist (هاد المرة درتلو Rewatch من اللول قبل مانشوف آخر موسمين) ومبعد الكاتب يخليني ويخليكم هكداك زعما حنكة من عندو باش تبقى تخمم وجامي تعرف الصح ولا كيفاش ؟ (a la Banshee).

وإذا إعتبرنا Red هو كاتارينا، شيئ غير منطقي نوعا ما ومام تإيمجينيه مايجيش؛ شغل كامل الكاريزما والشخصية لي عندو وهو في الأصل إمرأة! غير تتخيلها ماتدخلش في راسك مالڤري الفكرة تاع الكاتب والحاجة لي مبنية عليها كامل الحكاية هادي هي، مي ماقسهاش شغل الشخصية لي عطاهالو Writer ماتجيش مع الحقيقة تاع كان في الأصل WOMAN (مع كل إحتراماتي للنساء)، وتبانلي هذا هو السبب الرئيسي لي ماخلاناش نشوفوا رد فعل إليزابيث كي قرات الرسالة، الكاتب ماحبش يعطيهالنا ديراكت بلي رايموند هو كاتارينا والنظرة تاعنا تتبدل ليه مي خلاهالنا Mystery وعطالنا Hints عليها هدا مكان باش مانبقاوش في الظلمة.

– رأيي في نهاية المسلسل : نهاية كارثية بأتم معنى الكلمة طريقة موت The Concierge of Crime ماعندها حتى معنى وماتليقش بالهيبة تاعو (الموت عن طريق نطحة ثور والصورة الأخيرة تاع يبان معفوس عليه ومخسر كامل) هي من جهة شويا منطقية كي نشوفوها من الـ Vision تاع مكانش لي يقدرلو ولا يقدر يحكمو مام المرض لي كان عندو (رجع Invincible) تسما هو خير طريقة الموت تاعو، بصح مكانتش وفاة شاعرية تليق بقيمة الأسطورة ومكانتش النهاية لي كنا نستناو فيها من هداك العام، وزيد كامل الـ Influence لي كانت عندو و واش دار في الكاريار تاعو ونهار مات ماوراولناش ردة فعل الناس لي تحبوا/تكرهوا ودولة أمريكا كيفاش تلقاو خبر وفاته ! الموتة تاعو الكاتب ماعطالهاش كامل حقها وبالقليلة لوكان دار مراسم دفنه، والأحباء والتابعين تاعو يحكيو مغامراتو و واش كان يعنيلهم وشويا دموع وموسيقى حزينة . .، مشي كيما دار الكاتب المهبول “ريسلر عيط لكوبر قالو راني حكمتو” و FIN كل واحد يروح لدارهم، الحاجة الوحيدة المنطقية نوعا ما في النهاية العبيطة هي البنادم لي طول حياتو وهو يسيي يحكم ريدنجتون هو نفسو لي ألقى القبض عليه بالنهاية (ريسلر).

– نقد جانبي : الكاتب خلاصلو الإبداع في الأخير ورجع يكرر في المجرمين كيما ألبان فاسيلي The Freelancer عاودو في لاسيري وحد الثلاثة ولا ربع خطرات (مانلوموش صراحة مشي ساهلة تخرج 10 مواسم وكل موسم 22 حلقة ولازم كل حلقة فيها مجرم بخصائص جديدة).

“We’re Here for a Good Time, Not a long Time”

R.