#1001_عمرة Part 01 السلام عليكم و رحمة الله و بركاته في هذا المنشور حبيت نحكيل

#1001_عمرة
Part 01
السلام عليكم و رحمة الله و بركاته
في هذا المنشور حبيت نحكيلكم على أجمل رحلة لأجمل مكان في الكون و مراحش تندموا عليه و أهم النصائح :
أولا و قبل كلش ديروا النية هي أهم شي أنوي و اتكل على ربي و خليها فالستر حتى يتأكد السفر ديالكم، و الحاجة لمليحة كامل عمرة فالعشرينات هي صح وين كتبهالك ربي بصح كل مايكون الواحد صغير و قادر ميبخلش روحوا من هاد السفرة لي راح تقربوا كتر و كتر من المولى عز و جل، خاتش كل ما يكبر العبد راح تنقص الطاقة ديالوا.
***أول حاجة نبدالكم بيها هي لاجونس حوسوا مليح و شوفوا لاجونس لي يكونوا الأسعار ديالها معقولة و الفنادق تكون قريبة خاصة في مكة خاتش المدينة دايرين بيها غير الفنادق و كامل قراب و جاية مبلاطية مافيهاش طلعات و هبطات، و بالنسبة لي راح يروحوا مع يماهم و لا وحدة كبيرة في السن معاهم بالنسبة للرجال يسقسيوا لاجونس لي يدوا معاهم مرا مرشدة تساعدهم بزاف خاتش كاين حدود بين المصليات ميقدرش يتجاوزهم الراجل و مع العلم كاين عجايز الله غالب عليهم ميعرفوش بزاف لتلفون و لا يوصفولك لبلاصة لي راهم فيها و مينداك تتلفلهم الطريق، و تانيك لباج دايم يكون معاك هادي دنيا لواحد يكون وحدوا يدوخ و يطيح ولا يتبحر….
***ثاني حاجة وجدوا باسبور و دراهم و لي خدام يوجد titre de congé خاتش ممكن يطلبوهولوا فالمطار ، الدراهم لي راح تصرفهم تم من الأحسن تديهم أورو و لي عندوا كريدي كارت يديها راح تساعدوا بزاف
*** الحاجة الثالثة هي الحقيبة واش لازم يكون فيها :
– الدواء هو الصح فيتامينات، دوا تع لاڨريب ، تع لڨراجم تع ليستوما، سميكتا….. إلخ خاتش تتبدل عليكم لكليما و الواحد ياخذ حدروا.
– الماكلة من الأحسن تدوا معاكم باش متربطوش روحكم بالوقت تم و متسقاملكمش غالية و بلاك متعجبكمش لماكلة تم، علابالي درك تقولوا نروحوا نعبدوا ربي ولا نطيبوا هههه ادوا لحاجات لخفيفة و لي طيب تم تم كما التون ، مقارون سباڨيتي ، روز ، كاين حتى الشربة و لي سوپ تاع شكارة خلط مع لما و جوز، توست ، فرماج ، كاشير ، كسرة و ڨاطو ، قهوة ……
– بالنسبة لحوايج متدوش كامل تع الشتا غير جيلي خفيف على جال لبرودة تع لفجر و الليل و بالنسبة للنسا كاش شال ترميه ملفوق، و تقاشر خشان دير بيهم العمرة و مقص باش يديروا التقصير و شاپوا، ادوا بليغة و باسكات متكتروش صبابط.