#1001_سفر
القاهرة- شرم الشيخ 14يوم .
الحاجة الأولى الفيزا، تدفع الطلب في السفارة المصرية جاية فالأبيار، شهر رجعولي وخلصت 10500 دج على كل جواز.
رحنا مع air Algérie، طائرة الذهاب تقلع على 8 صباحا، لحقنا تما على h13 ديالهم.
تبدل العملة ( دولار يجيبلك 19 جنيه مصري)
وتشري puce الأفضل هي orange يمدولك 18g بواحد 1200دج.
كي لحقنا رحنا directement لشرم الشيخ، بالطائرة تستقام واحد 145 دولار، حنا رحنا في go bus ب25 دولار ذهاب واياب( حافلة نظيفة مكيفة وفيها entrée usb فالمقاعد )
الطريق هي normalement خمس ساعات ونصف لكن يديرو 7 علاجال نقاط التفتيش يعني تعيا شوية.
لحقنا لشرم على 3 صباحا، تاكسي داني للفندق ب 400 دج ديالنا
أول اربع ليال درناهم في فندق ثلاث نجوم يستقام 30 دولار لليلة (كنا دايرين كل يوم programme) تسما ماتخلصش 100 دولار في فندق مراحش تريح فيه.
الفندق واسمو naama blue جاي في خليج نعمة (قريب لكلش ) نقي بزاف و agent de réception مزوج مع دزيرية مالا اتهلى فينا ودارنا upgrade.
– ثاني يوم رقدنا صباح للإسترجاع،و رحنا لشاطئ الفنار شباب و old market شباب بزاف وزدنا رحنا واحد القهوة معروفة واسمها farcha café صح شابة لكن 10 دقايق وخرجنا (موسيقى صاخبة، شراب وشيشة ، يعني ماتخرجش علينا )
ثالث يوم خرجنا excursions جزيرة رأس محمد والجزيرة البيضاء ،يجو يرفدوك من الفندق على 8 ، يدوك في قارب شباب بزاف(yacht deux étages)مع واحد 15 شخص، يعني فارغ وتكون à l’aise، يحبس فlarge تحبط تعوم وتشوف récif والأسماك، بعدها درنا plongée وكي كملنا رحنا لهذه الجزيرة البيضاء، بزاف شابة.
عليهم الفطور، وتدخل لعشية على 5 ويرجعوك حتى للفندق هادي ب30 دولار يعني واحد 6000دج.
بالنسبة للصور الي ياخدهملك كي دير la plongée لازم تتفاوض مليح،deux albums تاعي وتاع الزوجة فيهم 40 صورة وزوج فيدوهات ديتهم عليه ب1500دج للواحد (مع الأول قالي 50 دولار للواحد🤣)
رابع يوم درنا السفاري يمدولك quad ولا beach bugy كيما تحب وتخرجو لصحراء سيناء، خرجة شابة فيها ثلاث ساعات (كيف كيف يجو يدوك من الفندق) تستقام 20 دولار للفرد يعني 4000دج
في العودة قتلو يحطني في بلاصة وسمها SOHO square جاية تقول الصابلات لكن شابة عليها بواحد 200 مرة.
الماكلة خلال هذه الأيام، في خليج نعمة وسوهو غالية لأنهم بلايص شابين وفيهم بزاف سياح، لكن تروح أقل من 2كم بلاصة شعبية وسمها حي النور، الأكلات الكبدة والمشويات بأثمان رائعة، ويديرو delivery تاني.
بالنسبة للنقل على راسو تحب تاكسي يديك ب500دج مي حنا كنا نركبو microbus ، يجوزو كل وقت وكنا نطلعو فيه la poussette تاع الطفل، 50دج ونتا لاحق
-بعدها بدلنا فندق ورحنا لواحد خمس نجوم واسمو parrotel ،بزاف شباب يستقام 100دولار وكاين آخرين كيما sunrise، مبلغ 100 حتى 120 لليلة يجيبلك فندق شباب en all inclusive، ريحنا فيه ثلاث ليال.
-وبما أني نحب بزاف les aqua park زدنا ليلتين في فندق albatros aqua blue
هذا هايل ألعاب مائية fort بزاف.
وagent de réception تونسي تهلا فينا مدلنا غرفة vue sur piscine، الفندق فيه سبع مطاعم إيطالي هندي سمك، أكل خفيف، كول وين حبيت ووقت ماحبيت، وعندك accès لجميع فنادق albatros جايين قراب ،ستقاملنا هذا 140 دولار لليلة مي رحنا بكري early chick in وآخر يوم دارولنا late Chek out على الرابعة مساءا.
كملنا 10 أيام شابين في شرم الشيخ وطلعنا للقاهرة، كنا حاجزين في فندق في وسط القاهرة وسمو atlas يستقام 40 دولار لليلة نقي بزاف
النهار الأول رحنا بلاصة وسمها خان الخليلي، شفنا الأسواق ديالهم والمساجد المعروفة الحسين، وصلينا في مسجد الأزهر.
ثاني يوم رحنا درنا المتاحف، المتحف المصري ومتحف الحضارة، قلعة صلاح الدين.
سعر الدخول للمصريين والعرب 600 دج والأجانب 2000دج ويطلبو منك passeport.(الإنتقال بالميترو )وموراها توك توك 🤣
ثالث يوم رحنا شفنا أهرامات الجيزة بعيدة واحد 30كم تسما تدي uber يسير ديالهم يديك ب1000دج.
الدخول للأهرامات ب600دج،
الداخل كبير وصعيب تمشيها، تكري الكاليش بالساعة ، يديك تشوف الأهرامات كامل ويجوزك في بلاصة وين تتصور معاهم ، وامبعد يحبطك حتى ابو الهول، وهو يصورك يعرفو les techniques . (لازم تتفاوض قبل ماتركب، مع الأول قالنا 3500دج للفرد ، مع الآخر مدينالو 1000دج للواحد )
رابع يوم رجعنا لخان الخليلي شرينا les souvenirs، واش يقولك مدلو 30% وماتمدش فوق 50% في أسوأ الأحوال، والعشية رحنا لجزيرة الزمالك، تركب في قوارب النيل (تحب مع الناس تجي 150دج للواحد) وكاين private يحسبوها واحد 3000دج وكاين بالعشاء 2500دج للفرد فيها حفلة ، حنا رحنا في قارب عادي .
بالنسبة للأكل في القاهرة، جربنا كل اكلاتهم الشعبية، الحواوشي والكشري، والكبدة الحمام البط 🤣
مي عند مطاعم معروفة وعندها une bonne réputation لكنها تبقى شعبية وتحس روحك في عرس.
بصحتك خو ♥️… شحال تستقام لشخص واحد تقريبا ؟
شحال تسقام لشخص واحد في رايك ؟
Bsahtek kho ana s9amatli 13 million b ta9achof mais ajbatni bzzaf
bsahtkoum khoya ch7al s9ametlek kolech a peu pret ?
شحال ستقامتلك كل شيء وفي أي وقت؟
bzeeef 9ouwa.sharm el sheikh ❤️❤️ 2019 st9amli hotel w billet d’avion w visa w 96000 da
عمر بوقرطاس 😍😍😍
رحلة شابة بصحتكم .. شكرا جزيلا على الشرح والمعلومات
بصحتكم ✈
بالصحة عليكم 🤩🤩😍
راني شايفك علابالك !!!
Oussama Ouhaibia
Nada Mourad
الله يبارك عليكم
اللهم زوجا يعشق السفر معي 🤲🤲🤲
💯👏👏👏
الفيزا مش الكترونية ؟
الله يبارك قووة 😍
شكرا على المعلومات القيمة اخي
رحت عند بلحة .😂
بلد العروبة و الله توحشتها ام دنيا
صرالي مشكل كبير مع العلام مي والله غير صورت بيه ههههههه
بارك الله فيك وبصحتكم
بصحتك خو
نقرا بتركيز حسيت روحي سافرت معاكم😅
بصحتكم💚
انا نحب ماصر و نتا زدتلي ، يعطيك الصحة خو راح نديرها دليل
بصحتك خو . شرم الشيخ والقاهرة حتى وتروحلها عشرة مرات ماتكرهاش. خاصة خان الخليل والسوق القديم 😍
انا راح نروح وحدي يعني تسقاملي واحد 15 مليون
من فضلك سؤال الطلب تاع الفيزا وش فيه تعيش و اسك تدفع معاه جواز السفر ؟ و قداه قعدت باه هزيتهم؟
بصحتكم
كنت رايح فى 2020 جات الكورونة تلفت الحساب لعوام الماجين ان شاء الله
قلي بيي طيارة مصر شحال
Le prix total de tout le voyage svp si c’est possible bien-sûr
Oussama 🙄
بصحتكم
والله أحسن وجهة، ناس طيبين، أماكن جميلة و أطباق عجيبة 😂😍
Mo Samy wajd rohk kho hhh
بصحتك اخي. حبذا لو وضعت مجموع التكاليف
Sii Ssa
واش اقولك لصحتك خويا الفايدة انك استمتعت بدراهمك وما ندمتش c’est l’essentiel
نقرا ف منشورك و نتفكر ف الأيام الجميلة التي قضيتها ب شرم الشيخ
بصحتكم الاخ أن شاء الله نعاود نرزوها كاين اماكن خفاو عليا مارحتهمش
Sa Rıa 🤩🤩