#1001_عمرة #الجزءالاولomra السلام عليكم ورحمة الله ، نحكيلكم تجربة العمرة لي در

#1001_عمرة
#الجزءالاولomra
السلام عليكم ورحمة الله ، نحكيلكم تجربة العمرة لي درتها الأسابيع الماضية .
-أول حاجة بغيت نشجع الشبيبة لي بغات تعتمر ، معاكم خوكم 26 سنة اول تجربة ليا في العمرة ورحت وحدي ، جامي تقول راك صغير ماتدري الدنيا هاذي كيفاش راح تكون ، اذا راك نافح على عمرة وعندك حقها اتكل على رب وروح .
-المنشور راح نديرو anonyme لي بغا يسقسي يدير تعليق نجاوبو ولي يحتاجني في بريفي صح يخلي
تعليق نبعثلو ان شاء الله .(الجماعة لي كانت في نفس مجموعتي اذا عرفتوني ماطاقونيش من فضلكم )
نبدالكم بالقصة تاعي راح نقسمها على جزئيين ، الجزء الاول نحكي على المدينة والجزء الثاني على مكة .
-بعد ما حبست الخدمة قعدت شوي مع روحي وكنت حاس بالضغط و الكئابة سيرتو الخدمة الوطنية تستنا فيا في جانفي ….معرف كيفاه جاتني في بالي فكرة العمرة ، مخممتش بزاف ديراكت نويت عليها ورحت سقسيت وكالة عجبتني درت معاهم (مانيش راح نقلكم على اسمها باه ماتقولوش إشهار حوسو على الوكالات لي يديرو رحلات مباشرة ولي يروحو المدنية اولا و العودة تكون على جدة في الجزء الثاني نقلكم علاش ) المهم خلصت 21.5 مليون سنتيم ، وصل اليوم باه نروح وجدت قشي ودعت اهلي وديماريت لمطار قسنطينة ، رحلة مباشرة مع الخطوط flynass للمدينة المنورة ، وصلنا فليل رحنا للفندق ، فنادق المدينة قراب وملاح والأرض كانت مسطحة على عكس فندق مكة من بعد نحكيلكم عليه ، الغرفة يتقاسموها 4 أفراد، مهم وصلنا فليل للفندق مع ثانية صباحا اذا مانسيتش، رقدنا شوي ونضنا لصلاة الصبح وهنا المفاجئة صوت الأذان كيفاش والراحة والطمئنينة لي جامي حسيت بيها من قبل ، واحنا في الطريق للحرم وتشوف الناس جاية من كل اتجاه ومن كل مكان تبقا غير تتعجب مافهمت فيها والو ، مع دخلت للمسجد اول حاجة قابلتني ماء زمزم ايا روحت نجري شربت شوي ماشاء الله ماء خفيف بنين ، من بعد تهز راسك تشوف كيفاه المسجد معمر بالناس والتنظيم والمبردات وتشوف الابواب بزاااف حتان تتلفلك …بعد ماصلينا اول صلاة لينا ثم ليكانت الصبح رجعت رقدت شوي ونضت ديراكت للمسجد نصلي الضحى ونقرا قرءان ، الراحة والسكينة لي عشتهم الايام هاذيك تخلي العالم كلو وراك واول مرة نجرب الخشوع ، ريحنا في المدينة ثلالث ايام ، زرنا فيها قبر الرسول والروضة الشريفةو صلينا ثم وزرنا مسجد قباء لي قال عليه الرسول صلى الله عليه وسلم لي يتوضا في دارو ويخرج يصلي في مسجد قباء ركعتين كيشغل دار عمرة ، زرنا المعالم الدينية لفي المدينة. وأحسن بلاصة عجبتني هي الساحة مقابل مسجد الغمامة وين كان الرسول صلى الله عليه وسلم يصلي صلاة الاستسقاء، خاصة في الليل بعد صلاة العشاء تشري حاجة خفيفة من KFC تاكل ولا كاين واحد يبيع القهوة ثم يبالي ب 10 ريال ، وتريح خلوي تتأمل مع روحك وتدعي .
الاسعار في المدينة شوي غالية بصح كي تجي تشري حاجة ديما نيقوسي ينقصلك ، من نهار دخلت عند واحد نسوم فلحوايج جيت خارج جا ليبيع يجري عندي قالي علاه رحت قتلو اسعار مرتفعة قالي قولي نقصلك من ثم عرفت بلي في كلش لازم تحاول مع البائع ، ساعات حتى ينقصلك عشرين ريال ولا ثلالثين كي تبينلو بلي مش مهتم وتخرج في وجهو… جامي جامي تبين بلي راه عاجبتاك الحاجة هاذيك ثم راح يشويك، .
نحكي ضرك على الأكل :
اديو معاكم كلش قهوة مقرون تونة سباغيتي براج قاطو ، خطرتكش لحالة شوي غالية ثم . بحكم اول تجربة ليا ماديت معايا والو من غير التمر مقروض وتونة …كنت ثم نشري حليب المراعي والزبادي (الياهورت عندهم ) الحليب ومشتقاته تاعهم بنان هههه الفواكه ثم رخيصة تقدر تشري بنان ،كيوي، مندرين…
الغداء كاين واحد ثم يبيع شوارما ب 8 ريال مع شوي زبادي لي يدير 2 ريال تقدر تشبع ، العشاء مكنتش نتعشا مرة نتغدا مرة نتعشا.
الجو : كان سخون يعني مكلاه قش شتاء ادي غير
بواش تروح وتروح للجزائر
شريحة الهاتف : شريت شريحة موبايلي ب 58 ريال فيها 15gb انترنت و خمسين دقيقة مكالامات تحكملك 15 يوم قد الرحلة قد قد.
نصيحة : 1-صلي قد ماتقدر ، عندك الفرض تاعك ، الضحى ،قيام الليل، النوافل صلي برك .
2-تمتع بالمدينة وبناسها الطيبين وعيش لحظاتك كلها تأمل خطراكش مكة مختلفة بزاف .
3- احفظ ديما رقم الباب لي دخلت منو باه ماتهملش.
4-ادي معاك باور بانك تحتاجو
4-ماتصرفش كميات كبيرة تاع أورو في الصرافات صرف غير ب 50 أورو
5- حذائك اكرمكم الله ديما ديرو في صاشي وخليه حذاك وين تصلي.
6- لي راح مع واحد كبير في السن ديما تفاهمو على مكان تتلاقاو فيه اذا تفارقتو وديما خليه يعلق البادج تاعه فيه اسم واللقب والبلد والفندق ورقم الهاتف باه اذا ضاع لاقدر الله يتصلو بيك .
6- اذا عندك كارت فيزا بايسيرا راح تعاونك ثم وتنقص عليك التعب (انا كنت نستعملها في المطاعم كنت نخلص بيها )
في الجزء الثاني نقلكم شحال ديت معايا وشحال
صرفت
-كل مانتفكر حاجة راح نعدل المنشور ونزيدها .
-بالنسبة للصور ماتدوهمش من فضلكم .
يتبع ….