#1001_movies
#Spoilers
حرق لمسلسل From🛑⛔ …………..
❌ أول نقطة : حابكم تركزو في الرقم ثلاثة لأنو عندو رمزية مهمة في القصة ..
– “ها هم قادمون .. قادمون من أجل ثلاثة” .. الأغنية اللي سمعوها ماريل و بويد وإلجين + كيني عندما رد على الهاتف .+ جدة سائقة الحافلة كانت تغنيها ..
– الرمز اللي بسبتو كريستوفر قتل القرية كامل كيما كان فيكتور صغير .. هذا الرمز عبارة عن دائرة في وسطها 3 خطوط متقاطعة ..
– الثلاث أشخاص اللي لقاهم بويد مربوطين وميتين ومن بينهم مارتن الرجل اللي مد لبويد الدم تاعو ومات ..
راكم ملاحظين بلي الرقم ثلاثة هذا قاعد يتكرر بزاف .. دورك خلونا نكتاشفو شكون هوما الأشخاص الثلاثة المهمين في القضية هذي :
أنا حسب رأيي الشخصي المتواضع الأشخاص هوما تابيثا + جايد + بويد .
❌ ثاني نقطة : الكتاب في الحلقة الأخيرة هذي بينو بلي يخدمو بواحد المفهوم لي هو عبارة عن لعنة .. هذي اللعنة هي سلسلة من الأحداث تتكرر بأشخاص مختلفين .. بالمختصر شغل دي سيكل يتكررو بصح بشخصيات مختلفة .. كيفاش أكدولنا هذي ؟
– ببساطة لأنو تابيثا هي نفسها ميراندا أُم فيكتور .. في زوج عندهم طفل وبنت .. وفي زوج يجيوهم نفس الهلوسات ونفس الأهداف ( حابين يروحو لبرج النور باش يمنعو الأولاد هذوك لي جايين مغبرين)
– أيضا جايد هو نفسو كريستوفر .. في زوج صرالهم هوس بالرمز هذاك تاع الدوايرة والخطوط المتقاطعة .. والجنود لي يشوفهم جايد هم جنود من فترة الحرب الأهلية اللي تبانلي شارك فيها كريستوفر .. جايد أيضا في الحلقة الأخيرة لي خرجت تسبب في كسر واحد من التماثيل لي لقاوهم في الكوخ وإذا ركزتم في في شكل التماثيل المتلاصقة هو نفسه الرسم الموجود على حجر التاليسمان وكأنو يقولولنا بلي هذوك الأكواخ كانو محميين بالتماثيل وأنت خربت فيهم درك تسلكها (ربما حتى أحجار الطلاسم لي في القرية يوليو مايحميوهمش وتصرا كارثة !!!!!! ) ..
– هل بويد هو نفسه مارتن ؟ .. في الحقيقة لا نعلم ولكن عندنا أدلة : مارتن حكا لبويد على مرتو آبي وهو ميعرفهاش أصلا .. وزاد مدلو هذوك الطفيليات في الدم تاعو اللي تسببو منبعد في مقتل الوحوش .. أصلا بويد باش تلاقا بمارتن لكان شفيتو في الحلقة الأخيرة من الموسم الأول لقا هو وسارة الشجرة لي معلقين فيها زجاجات .. نحا منهم زجاجة مكتوب فيها 1864 ودخل للشجرة المجوفة كي ضربت العاصفة لتم باش استيقظ في القبو ولاحولو الحبل (مازال معرفناش شكون بصح تبانلي الطفل لي لابس أبيض) وسع تلاقا بمارتن وصرا لي صرا .. تسما نقدرو نقولو بلي مارتن من الشخصيات لي كانو في السيكل تاع 1864 …
❌ ثالث نقطة : خلونا نتكلمو على الطفل لي لابس الأبيض + الأطفال لي يجيو لتابيثا + رسومات الكهف والدلالة تعهم :
– أولا الطفل اللي لابس الأبيض في رأيي هذاك الطفل حاب ينقذ الناس لي راهم عالقين في القرية .. تلقاه يديريجي فيهم بلواحد بش مايكرروش الأخطاء تاع الناس لي سبقوهم .. كيما تابيثا كي وصلت لبرج الضوء كون كملت كون راهي ماتت وصرالها كيما ميراندا .. على هذي الطفل لي لابس أبيض قاللها هذا هو الحل الوحيد ودزها من البرج حتى لقات روحها في العالم الحقيقي وكل هذا بالاك باش تعاود تجيب أب فيكتور للقرية …
– ثانيا الرسومات اللي في الكهف وعلاقتهم بالأطفال : اذا لاحظتو الرسومات تلقاو شكل تاع وحش أحمر تبانلي هو السبب في الأحداث لي تصرا كااامل .. لربما يكون هذا المخلوق هو لي تسبب في اللعنة لي راهي في القرية .. واكتسب المقدرة هذي من خلال التضحية بالأطفال .. على هذي تابيثا حابة تنقذهم باش تروح اللعنة هذي .. أيضا الأطفال هذو هوما لي موجودين في حجر التاليسمان (الرسمة لي فيه تشبه للتماثيل لي لقاهم جايد ملتصقين في بعضاهم وخرب فيهم .. كيفاه عرفنا ؟ من الجماجم تاع التماثيل لي كانت مجروحة تماما مثل الأطفال لي يجيوه هو وتابيثا كيما يهلوسو)
– ثالثا نحكيو على الوحوش : اذا لاحظتو الوحوش أشكالهم أشخاص عاديين من كل طبقات المجتمع وغالبا من فترة الخمسينات ولا الستينات .. هذا دليل على أنهم كانو أشخاص عاديين (التشريح اللي دارتو كريستا أثبت النظرية هذي) .. ومنبعد هذو الأشخاص تحولو لوحوش بصح وش الهدف تاعهم ؟ .. أنا نقولك بلي هاذ الوحوش هوما اللي يخليو الشخصيات تاعنا يمشيو في حلقة واحدة ميخرجوش عليها .. هوما لي يتحكمو في الأحداث ويقتلو الشخصيات باش تزيد تحس بالمعاناة واليأس وتكمل في السيناريو لي حابتك القرية تكمل فيه .. على الأقل حتى جاء بويد وقتل واحد منهم لأول مرة لربما دلالة على كسر هذه السلسلة الملعونة من الأحداث .. ولكان لاحظتو وراها مباشرة حملت فاطمة وولات تأكل في الفواكه المتعفنة (يا ولدها راح يخرج وحش يا هي بعد رايحة تتحول لوحش .. وربما تكون هي وحش الحمّام لي ديما يغرق إلجين في البينوار .. ربما .. )
❌ رابع نقطة : فيكتور هو الشخص الوحيد في القصة اللي عاش فترة مجزرة كريستوفر والفترة الحالية .. وهو الوحيد لي راهو يشوف في الأحداث تتكرر ويلاحظ في التغييرات وعندو أسرار غير هو لأنو عاش كي كان صغير تقريبا نفس الأحداث ..
❌ خامس نقطة هي الأشجار : أشجار في كل مكان .. باش تدخل للقرية لازمك تلقى شجرة طايحة في الطريق .. اللأشجار المجوفة اللي تنقلك لأمكنة وأزمنة مختلفة .. الشجرة الرئيسية اللي معلقين فيها الزجاجات بالاك كل زجاجة تديك لزمن معين كيما صرا لبويد .. الأشجار تاع الغابة لي فيكتور لاحظ بلي قاعدين يتحركو .. الخ
وزيدلهم الجذور تعهم لي هوما الأنفاق لي تحت الأرض ..
وبما أننا حكينا على الأشجار والوحوش .. كاينة وحد الأسطورة قاعدين الناس يقولو بلي بناو عليها القصة .. ربما في منشور آخر نتكلم عليها ..
❌ في الأخير ملخص صغير : السلسلة تتحدث عن قرية أو بلدة عادية تعرضت إلى لعنة من نوع ما جعلت سكانها أو الدخلاء اليها, يعيشون في سلسلة من الأحداث المتكررة نسبيا .. يبدو وأن الأشخاص يتم اختيارهم بعناية .. هذه اللعنة أو الكيان أو القرية تقدم لهم مختلف العطاءات كالشفاء من الأمراض أو حل المشاكل الأسرية .. ثم تسلبها منهم بطريقة عنيفة .. الأمل ثم اليأس .. هذه المعادلة هي ما يتغذى عليه الكيان .. وقد آن الأوان لكسر السلسلة الملعونة من طرف أبطال القصة الحاليين ..
