#1001info
عندي فكرة مبسطة لتسهيل رقمنة جميع عمليات الشراء سواء
في المتاجر أو المواقع الإلكترونية .
قبل كلشي هاذي نقاط القوة تاع التقنية :
– أغلبية الشعب الجزائري بجميع الفئات العمرية قادرين باه يستعملو هاذي التقنية .
– سريعة و مافيهاش الروطار .
– لا تتطلب معدات حديثة .
– قد لا تتطلب حتى هاتف ذكي .
الفكرة تتمثل في :
جعل عمليات دفع النقود تتم عبر رصيد الهاتف ( ليزينيتي ) .
شرح مبسط :
على سبيل المثال ، الزبون كي يجي راح يشري سلعة معينة ، و يجي يخلص التاجر ، ينتقل الرصيد الي يمثل قيمة السلعة من هاتف الزبون إلى هاتف التاجر .
الكيفية :
أولا لازم المتعاملين تاع الهاتف المعروفين ( أوريدو و جيزي و .. الخ ) يصنعوا أرضية للدفع الإلكتروني ، تكون تتمثل في تخصيص مساحة في تطبيقاتهم تاع الهاتف ، تكون مخصصة للدفع عبر الرصيد .
بحيث يدخل المستخدم للتطبيق تاع المتعامل الفلاني و يحل حساب كيما راهم ضركا أغلب المستخدمين ، يروح للنافذة تاع الدفع ، و يكتب النومرو تاع الهاتف تاع التاجر ، و ينقل الرصيد من حسابه للحساب تاع التاجر ( كيشغل فليكسا للتاجر ) .
البعض من الناس ، يقدر يقولك انو هاذي التقنية قد تشكل خطر على خصوصية بعض التجار الي بلاك مايحبوش يمدو رقم الهاتف تعهم للزبائن ، هنا تقدر الشركة المطورة للتطبيق أنها تدير رمز كود مرئي للتاجر ، يسكانيه الزبون و تتم عملية الدفع بكل بساطة .
بالنسبة للناس الي عندهم بورطابل حطبة ، يقدرو يحولو الأموال من حسابهم عن طريق نفس الكيفية الي يشوفو بيها شحال عندهم ليزينيتي ، بمجرد اضافة خيار الدفع مع الخيارات لخرين .
التساؤل الي راح يجي في بال كل واحد منا :
كيفاه منبعد نقدرو نجبدو دراهمنا الي ف الحساب ؟
أنا تبانلي أنه ليس من المستحيل للمتعاملين الثلاث باه يديرو شراكة مع المؤسسات المالية للدولة الجزائرية و على رأسها بريد الجزائر إضافة للبنوك الي يمكن منبعد تدعم هاذي التقنية .
بحيث يولي المستخدم قادر على سحب أمواله من مكاتب بريد الجزائر أو من خلال أي بنك ، عن طريق إدخال رقم حسابه الي هو نفسو رقم الهاتف تاعو و كلمة سر الحساب الي فتحو ف التطبيق .
هاذي تبقى مجرد فكرة ، نظن قادرة تطبق على أرض الواقع بإمكانيات قليلة ، و تقدر ثاني تكون غير واقعية و معمرة عيوب ، ضرك تصلح ولا ماتصلحش ، الله أعلم .
المهم كي شاركتها بعدما ضربت شحال و هي في راسي .
هذي موجودة في دول أخرى عربية و أجنبية منذ سنوات مثل فودافون كاشاتي في مصر يسمونها محفظة دفع الكترونية بالعملة المحلية و أيضا فيزا على الأنترنت ، حنا لي عايشين في كوريا الشمالية و معلبالناش كلش ممنوع علينا الله لا تربحهم من كبيرهم لصغيرهم عسكري أو مدني دولة فاشلة
الفكرة مستعملة في الصومال جو حطاب هدر عليها
Aidia Hireche
نهار يولي نيميرو تاعك و ماشي تنحي الپيس سمانة يعاودو يبيعو النيميرو لواحد آخر تماك نهدرو على رقمنة عمليات الشراء
فكرة جميلة جدا بقا رقم الهاتف لازم يكون شخصي بسكو راهم يسكروهم
لكن حاليا كاين طريقة أسهل وأكثر سلاسة وأمان عن طريق بطاقة الذهبية 🤔.
فكرة جيدة
لكن خممت على التاجر باش مايكشفش الرقم لي يتمشى بيه و ماخممتش على المستهلكين قاع ؟؟
ياك هاذ الشركات تاع الشرائح شبه فاسدة
تفليكسي 10 ميل تديلك 5 ميل تاع رناتي دون الاستشارة تحتمها عليك
مرات وين تجبرك دير وحد صوالح انت لا دخل لك فيهم و تخلص مجبر و شعبنا غير مثقف باش يروح يريكلامي على جال 5ميل و 10 ميل
ديرلهم منصة يشوفو عندك الدراهم يحملولك خلفية و يقولولك راك خلصت عليها 100 ميل بسيف عليك و تزيد تتطور كثر
نشوفو شركات اخرى غير هاذ الفاسدين لي رانا نتعاملو معاهم
متعاملين الهاتف ليسو مؤسسات بنكية
في راي اسرع طريقة هي انك تخدم بل API تع البطاقة الذهبية و البريدي موب في الدفع الاكتروني
M-PAIMENT
قصدك تكون كيما apple pay دفع بدون الانترنت
كاين دول بزاف يستعمولوا هذي الطريقة
Il faut ouvrir une banque pour faire ce type de transactions, ce qui est impossible pour un simple citoyen Algerien.
المشكل يا أخي أنه المتعاملين تاوعنا ماعندناش ثقة فيهم و انا الاول
تفليكسي 100 دج يدوها و يقولك نتا شاركت في منتدى تزاوج
تخيل عزيزي الزبون يولي عندك ملايين في الشريحة تاعك باش تشري مثلا كليماتيزور
كل يوم يدولك 400 دج نورمال و يقولك نتا درت اشتراك ..
الخلاصة مافيهمش لامان
علاه ما نديروش عملة رقمية نسندوها بقيمتها الحقيقة من الاموال باه يكون السعر تاعها ثابت يعني ما تطلع ما تهبط و نتعاملوا بيها بصفة عادية
مستحيل يكون كاين دفع الكتروني فالجزائر مكان حتى واحد يقبل يخلص الضرائب
العيباد هادو يحبو البسباس و شكون غرسو . ما يليقوش بسبب العقلية الحطبة .
الفكرة جد طيبة و pratique
طريقة معمول بها في أحد دول إفريقية الله اعلم صومال
Nfc : كشما خسرت معاك انا !؟
قانونيا ممنوع سقسيت عليها هذي مدة
متعامل هاتف نقال ماشي مؤسسة مالية شغل قلتنا علاش الخيوط تاع انترنت مرنطبهومش مع خيوط تاع ترسيتي في نفس البوطوات
فكرة فاشلة تماما هذوك اسمهم متعامل هاتف نقال نتا راك دخلتهم ف حاجة خاطية دومان تاعهم قع
و تان مفيهمش ثقة رك تعرف تفلكسي عشرلاف يجيبولك سبة مالفضاء باش يدولك نصها سما يصيبو ملاين مانحكوش خير
و مفهمتش فاش راه مقصر معاك الدفع بالبطاقة الذهبية باش خممت فهادي 😃
هذي في الحقيقة ليست فكرة بل شيء متعامل به في عدة بلدان
المشكل هنا أن المتعاملين يولو بنوك ويدر عليهم أموال طائلة يفتح الباب أمام سرقات ضخمة
هذي يتعاملو بيها في المانيا
مشكل ضريبة اساسا هكذاك تغير وظيفة شركة اتصالات الى بنك
وهنا اشكالية ضربية
واشكالية قانونية امام المشرع
العملات الرقمية هي الحل للمشاكل المالية هادي
هاذي يخدمو بيها ف الصومال
و راك رجعتنا لعشرات السنوات للوراء
ميحبوش
يخدمو فيها في وحد البلاد في إفريقيا شفتها في فلوق حطاب
اولا الطريقة جيدة و بعض البلدان تتعامل بيها و التاجر يروح لمكتب المتعامل تاعو يرجعلهم فليكسي و يعطولو دراهم المشكل الكبير هنا هو فالتاجر خطاش كي يتعامل مع شركة تاع الخط تاعو راح تعطيلو فاكتور و عدة وثائق تبين بلي دفع قيمة تاع فليكسي و استرجعهم قيمة مالية و منها يقدرو الدولة تحاسبو على عمليات البيع و حنا الله بارك اغلبية التجار علابالك كيفاش نسيرو في هذا المجال سما بمعنى اخر التاجر راح يفرش روحو
موجودة في العديد من الدول الإفريقية معمول بها وناجحة
ونسيتي الحاجة الاهم ، بهذي الطريقة كيفاش يتهربو من الضرائب؟!؟!؟
الجزائر ناقصة بزاف من ناحية استعمال الرقمنة
حتي الجامعات ميقروش هاذ التخصص بزاف
مع العلم الدول الكبرى كلها تعتمد على الرقمنة في كل مجالات و خاصة في البيع والشراء
بصح خويا هاد الفكرة كاينة و يعملو بيها عادي. جو حطاب دار عليها فلوج واقيلاتع سومالي لاند.
شباب بزاف و فكرة مليحة
ما تصلحش اخي لأنك رح تصنع سوق و عملة جديدة صعيب التحكم فيها و سهل احتكارها و التلاعب بيها