#1001سياحة #تركيا معلومات / نصائح / تحذيرات / اقتراحات .. حبيت اليوم نشاركم ع

#1001سياحة

#تركيا معلومات / نصائح / تحذيرات / اقتراحات ..

حبيت اليوم نشاركم على على زيارة تركية بفيزا سياحية ..

اولاً قبل كل شيء الفيزا تع تركيا سهلة نوعاً ما سواءاً كنت عامل ( وين راح نديها بنسبة كبيرة ) ، او كنت تاجر كذلك ، او تقدر حتى تدير كفالة ، وين تحط بلي هناك شخص راك يكون كفيل تاعك ..

سعر الفيزا 26000دج دون احتساب سعر التذكرة طبعاً ، الاولى راح يمدولك خرجة وحدة في ثلاث أشهر

حسناً نقولوا راك وصلت لمطار اسطنبول الكبير جداً اول شيء احذر تصرف بزاف الاورو تم لأنهم راح ياكلووووك ماكلة ، صرف حوالي 30 اورو او اقل قيس النقل من المطار للمدينة لي حاب تروح ليها والفندق .. ثانيا حذاري تشتري الشريحة من المطار غالية الدوبل .. ، وراح تلقى صعوبة شوية فاللغة لانهم يتكلموا بلغتهم فقط ويتفاداو يتكلموا باللغة العربية ولا يفيدوك بلغة اخرى او حتى بالاشارات ( ماشي الجميع ، لكن اغلبية الأتراك هكذا ) ..

فالمطار كاين واحد الماشينات تدخل باسبور تاعك يعطوك كود دخلوا فالهاتف عندك ساعة ويفي مجاناً .. بعدها تبع اللافتات كاين شوية بالانجليزية باش تجيب الحقائب تاعك بعدها اخرج من المطار احكم المصعد ( احبط في -2 ) للأسفل راك تلقى واحد الحافلات صغار ( مرسيديس ) خاصين بشخص اسمه الموسطاش عندو بزاف حافلات خصيصاً لنقل الجزائريين لمدينة بايازيت وين كان بزاف فنادق ميترو ترامواي وكل شيء متوفر .. ( السعر 150 ليرا ) غير تحبطوا فالمطار لتحت تلقاوه هو اصلاً يخدم غير في وقت الطائرات لي يجو من الجزائر ..

بعدها نقولو راو حطك فالمدينة ووصلت ، تروح تكري فندق وين كاين عدة فنادق في كل مكان ( بين 25 اورو – 60 ) من الاحسن تتفادى Booking لانه غالي على الواقع .. إلا في حال كنتو عائلة وماحبيتوووش تريحوا تحوسو على فندق وتدورو بالحقائب ..

خويا الجزائري نقولوا راك كريت غرفة ادخل دوش 💦 ريح حط حقائبك .. بعدها اخرج راك تلقى وين يصرفوا في كل مكان صرف ومن الاحسن ماتصرفش بزاف يعني 200 اورو ولا تكفي باسكو سعر الصرف عندهم في كل يوم يتغير لكن بالتقريب 100 اورو يعطوك 28700 ليرا .. بعدها روح لمحطة ترامواي تلقى قدام كل محطة واحد الماشينات اشري من هناك كارت اسطنبول تبع فالماشينة راي ساهلة الطريقة ( اذا تلفت اكتب فاليوتوب كيفية شراء كارت اسطنبول ) وهي كارت تنتقلو بيها فالترامواي – ميطرو – حافلات .. تشروها تم بعدها اشحنوا فيها شحال راكم حابين ( ديرو في حسابكم سعر كل رحلة 15 ليرا ) ، ثالث مرحلة من الاحسن اذا راكم رايحين سياحة اشروا كارت سيم ماشي شرط كلكم لكن على الاقل واحد فيكم لأنها مهمة من اجل ڤوڤل مابس ، سعر الكارت غالي شوية حوالي 750 ليرا فيها 20 جيڤا انترنيت ..

والان بعدها راي عندكم ڤوڤل مابس وهي اهم خطوة ، تولو اي مكان تحبوا تروحو ايه اكتبوه في ڤوڤل مابس يخرجلكم الرقم تع الحافلة ولا رقم ميترو لي تحكموووه وهكذا تسهال عليكم ..

بالنسبة للأماكن السياحية ، تركيا كلها اماكن سياحية جميلة .. راح تحوسو وتشبعوا تحواس ، راح تزور اية صوفيا ومسجد احمد وين تقدروا تمشوا ليهم على الأرجل .. كذلك البوسفور مشية تع 50 دقيقة .. جزر الأميرات وين تزوروها فالبارحة رحلة تع ساعة ونصف ، توصلوا هناك لازم عليكم امروا اما دراجة او تروتينات إيليكتريك لأنها كبيرة بزاف مستحيل تمشوها كامل .. وعدة أماكن جميلة جداً ، كذلك كاين اكبر أكواريوووم هناك وين كاين كل انواع الأسماك سعر الدخول 650 ليرا ، ( التنقل سهل فالمرماراي شغل ميترو من محطة يانيكابي تحبطوا في أكوا فلوريا ..

بالنسبة للأكل كاين كل ما لذ وطاب من الأكل .. شواء ، لحم ، بيتزا ، ماكدونالدز ، بورڤر كيما ، حتى اللوبيا تع الجزائر وكاين 🥹

اهم شيء ، كاين شوية عنصرية في تركيا لكن نسبة كبيرة ضد السوريين والفلسطنيين ، بصح واحد مايحوس عليك ولا ، برك كي تسقسي مايرجعلكش ويروحلك في وجهك شغل يصعبهااالك ..

نتمنى نكون افدتكم قليلاً واي استفسار ان شاء الله نحاول أجيب على التعليقات