#1001عمرة #الجزءالثالثomra الجزء الثالث : – بعد مادرنا الزيارات تاعنا في مكة ل

#1001عمرة
#الجزءالثالثomra

الجزء الثالث :
– بعد مادرنا الزيارات تاعنا في مكة ل عرفات. منى .مزدلفة. غار حراء ( شفناه غير من لبعيد) .
من بعد كل واحد ضرك يشوف كيفاه يصلي وين يروح ، كاين لي بغا يعاود العمرة يحكي مع المشرف وتروحو في مجموعة ل لمسجد عائشة وديرو الاحرام وترجعو ديرو عمرة ثانية ،
– نهار الجمعة حاولو تروحو صباح بكري مع 10 باه تحكمو بلاصة مليحة .
– بعد العصر كنت نروح نشرب قهوة من بعد نرجع للمسجد نطلع للسطح لفوق خلاص بلاصة واش نقلكم هايلة هايلة تلقاو السعوديين ثم بزاف يجو يتحرو ساعة الاستجابة لي قبل المغرب ، يجيبو معاهم الشاي القهوة ويريحو ثم حتان بعد صلاة العشاء، كنت ديما نطلع نصلي المغرب ثم ونريح حتان العشاء جو هايل .
-مدة الإقامة تاعنا في السعودية كانت 15 يوم بدون احتساب اليوم لي جينا فيه ولي روحنا فيه يعني الإقامة الفعلية كانت 13 يوم .
الأكل: كيما قتلكم من قبل من الأحسن تجيبو معاكم العجائن البقوليات وطيبو ثم نورمالمو الفنادق للثم فيهم كوزينة كيما الفندق لي كنت فيه ، معانا مام لي جابو كوكوت،
أما بالنسبة لي مجابش الماكلة معاه كيما حالتي ، كاين وكالات يوفرو الأكل مقابل زوج ملاين يبالي كاين مليون ونص فيهم فطور وعشا والأكل يكون جزائري
ولي راح مع وكالة ماديرش الإطعام، هنا راح يصرف على روحو .نحكيلكم تجربتي:
الفطور ، نشري حليب المراعي تاع 1L يكفيني جوايه خمس ايام ب 6 ريال اذا مانسيتش ، نشري الرغيف ب 2 ريال ، ولا كاين مطاعم تاع لهنودة ولا باكستان يطيبو لمسمن تاعنا ب 1
ريال ، قشطة puck 11 ريال .
الغداء تقريبا كنت نشري زوج بيض نغليهم البيضة ب 1 ريال، وندير معاهم تونة معلبة و مسمن ولا رغيف ،
العشاء : كل مرة كيفاش تقريبا كنت نتعشا مع صديق عرفتو ثم نروحو لمطعم البيك نشريو وجبة دجاج مسحب (chiken nugguts )فيها 10 قطع و فريت و كاتشاب وصوص ثوم وخبز برغر تاكل بيه هاذو كامل ب 18 ريال , والوجبة لي فيها 7 قطع دجاج ب 14 ريال ونتقاسمو، تلقاوه في اسواق الخليل فندق جبل عمر اجنحة الهيلتون ، كاين ثم ثاني محل لبيع القهوة و الحلويات dunkin اسعارو في المتناول، وساعات مانتعشاوش ناكلو شوي فاكهة تمر حليب لبن وحنا تعشينا .
تلقاو بزاف مطاعم تاع هنودة بالنسبة ليا ماكلتهم ضرتتي مالا معدتش ناكل عندهم يديرو وحد التوابل 😰 وجبة ارز مع دجاج ب 15 ريال ،
بالنسبة للهدايا :
انا كي عاد رحت وحدي وماعنديش لمن ندير هدايا ماشريتش حاجة كبيرة شريت غير لخاوتي والوالدين ، بصح من التجربة تاعي وواش شفت راح تلقاو بزاف محلات وبزارات وكاين ناس تحط في الأرض في طريق كيما عدنا هنا في دزاير ، لي يحطو في الأرض ساعات تلقاو لافار عندهم حاجة رخيصة ومليحة كيما الروايح تاع 10 ريال تلقاوهم على شكل هدايا ،
-كاين ابراج الصفوة تلقاو عندهم حوايج رخاس وملاح فيهم محلات تاع كلش ب 2 ريال 3 ريال ، دير رايك ثم
كاين ثاني سوبيرات في ابراج الصفوة نلقا عندهم حوايج
ارخس من لحوانت لي حذانا،
وديمااا حاولو ينقصولكم، راهم يشوفوك ماتهدرش يزيدولك في السعر . اليوم يقلك 10 ريال غدوا ترجعلو يقلك 15 لازم تشفا على الأسعار
كاين في ابراج الصفوة صراف افضل سعر في الصرافين للثم، كيما نصحتكم من قبل صرفو غير ب شوي 50 يورو غير اذا لقيتو سعر الصرف زاد صرفو 100 ولا اكثر .
-كاين واحد المول في العزيزية بعيدة شوي اسمو نورمالمو الجوهرة . فيه كلش باطل تروحلو بطاكسي الحاجة لمليحة فيه كي تروحو في مجموعة صاحب المول هو لي يخلص الطاكسي وكيتيجو مروحين اذا شريتو من عندهم يخلصولكم طاكسي ثاني .
-كاين سوق الكعكية يبيع شبه جملة، روحو في مجموعة واشريو مع بعض باه تجيكم سومة مليحة
كاين تطبيق careem و Uber كيما yassir تاعنا كي تستعملو اول مرة يمدولك 3 رحلات تخفيض 50% وزيد كي تهز طاكسي تتقاسم مع لي معاك تجيكم الرحلة باطل

انا بحكم رحت وحدي ماعلاباليش المصاريف ثم شحال ، ديت معايا 700يورو وصرفت غير 250 يورو رغم اني ماكلتي كانت كامل برا كنت نحوس ندور نشري ناكل، بصح كفاتني الحمد لله

بالنسبة لماء زمزم :
تشفهاو نهار قتلكم مليح تجي على المدينة وتروح على جدة؟ وقتلكم رحلة مباشرة خير ؟ كيعاد مطار جدة متساهلين شوي في الماء عكس مطار المدينة ، وكي تروحو في رحلة غير مباشرة و ديرو ايسكال في كش دولة قادر ينحولكم الماء كيعادش ممنوع السوائل في الطائرة ، مالا انت جيب معاك قراعي صغار من دزاير عمرهم من الحرم ، عمر واش قدرت لوحهم في الباقاج مايحكوش معاك خلاص هز قد ماقدرت، في المطار يبيعولكم بيدون خمسة لتر ويقلك طلع غير واحد، انا حاولت العامل شوي خلاني نزيد وحدة دونك روحت ب 10 لتر + القراعي لي عمرتهم ،
طولت شوي في بارتي هذا ، باه نكمل كلش … كش معدكم سؤال سقسيو نجاوبكم بواش نعرف .
وكي نتفكر حاجة نزيد نديرها في تعليق .
اسمحولي على الاطالة وادعولي معاكم بالقبول، التيسير ،البركة و الإعفاء من الخدمة الوطنية ❤