#ماتغلطش_غلطتي 🌷
الشبيبة كامل ربي يبارك غلطت 🤣 bon انا ماشي غلطت و انما بعض النصائح لي تمنيت يقولوهملي قبل ما نروح ل #مكة 🕋 و #المدينة نتمنى تستفادوا منهم و لا توصلوهم للي رام رايحين
▪︎تمر العجوة ماتشريهش من مكة تلقاه غالي بزاف اشريه من المدينة و من الاحسن اشريه من المزارع مباشرة، اتفاهموا مع المرشد يديكم هو يعرف وين يتباع و تجنبوا تشريو لي معرض للشمس … يبانلك طري و جديد و هو غير السخانة رجعتوا هكذاك
▪︎كي تحب تدير عمرة ثانية حاول تديرها بعد صلاة الفجر مايكونش لغاشي بزاف و تفوتها الاز
▪︎يوم صلاة الجمعة بكر بزاف سينون ماتلقاش وين تصلي و تخلاص عليك تسجد على طريق معبد في درجات حرارة عالية
▪︎قبل الاقامة بشوي يمنع الدخول داخل الحرم المكي و تخلاص عليك تصلي برا فالساحات … صراتلي في رمضان و ماشفيتش اذا صراتلي ثاني في الاشهر العادية
و منه من الاحسن كي يأذن تكون داخل الحرم (لا ينطبق الامر على المسجد النبوي)
▪︎ماتثقلش على روحك كي تكون مروح و تشري عفايس كاينين فدزاير … حاجة ماتستاهل تخسر عليها دراهمك من غير تمر العجوة / ماء زمزم و qlq porte clé يديرو 2 ريال
▪︎افضل وقت باه تمس الحجر الاسود هو بعد صلاة الظهر وين الحرارة المرتفعة رايحة تنقص شوية غاشي و لي مريض غير مايشقاش لانك مع تجي تقدم ليه يتبدل عليك الجو الهواء ينقطع عليك و humidité دايرة ظل ثم و من الاحسن ماتكون هاز والو لا قدر الله طاحتلك حاجة ثما (ساكوشة مثلا) انسى تلقاها ماشي خطراكش راح يسرقوهالك مي كاين الغاشي بزاف ماتقدرش ترجع ليها
▪︎العفسة تاع تحكم بلاصة بساكوشة و تروح تقضي صوالحك ماتمشيش ثما … تغفل على قشك و يكون وقت تنظيف رام يرميوه ديراكت مايحوسوش يفهموا ين راك
▪︎حجر الكعبة يعتبر جزء منها (ماكملوش بناوه معاها بسبة واحد لحكاية) و لي صلى فيه راه صلى داخل جزء من الكعبة … ما تسمحش فهاذ الفرصة
▪︎اوقات زيارة مقبرة البقيع بالمدينة المنورة هي بعد صلاتي الفجر و العصر ماتنساش تضرب طلة
▪︎بعد كل صلاة مفروضة كاينة صلاة جنازة و كامل عمبالنا بالاجر العظيم تاعها جرب ماتراطيهاش و تقدر تحضر معاهم فالدفن في مقبرة البقيع بعد كل صلاة اذا حبيت (في مكة المقبرة بعيدة على الحرم، الذهاب مظمون و العودة نتا و زهرك)
▪︎افضل وقت تصلي فيه داخل الروضة الشريفة بالمسجد النبوي (بساطها اخضر عكس بساط بقية المسجد لي جاي احمر) هو بعد صلاة العشاء … ابقا تقدم بالشوي مع الغطاء المحيط بيها حتى طيرلك بلاصة لانو المسجد يسكر فالليل و منه الغاشي ينقص بالشوي عكس بقية الاوقات
▪︎اذا رحت في رمضان ماكش راح تخمم على الماكلة خاصة في المدينة وين تقدر تفطر في ساحات الحرم عكس بقية الايام وين لازم تشري
▪︎جرب ماتشريش الماء لي يتباع و اغتنم الفرصة اشرب غير من زمزم و ماتنساش التضلع
عمبالي بلي نسيت حوايج بزاف لضيق الوقت
بالاك كاش واحد راح يقدر يزيدهم و لا يصححلي اذا غلطت في حاجة 🌷🌷🌷
ربي يرزقنا زيارتها 🙏
والله غير بقيت نتخايل معاك
غيرتني ربي يرزقنا 🙏
ربي يرزقنا زيارتها مع الوالدين إن شاء الله. بارك آلله فيك
ربي يرزقنا ❤
Merci beaucoup pour l’infos had l’3am nchlh ida kteb reby nkoun tema🖤
اللهم ارزقنا زيارتها يا رب
برك الله فيك أخي العزيز
ان شاء الله يييا ربي نروح يييياااااا ربي مع أبي و أمي ان شاء الله يييا ربي أمنية حياتي 😭
ربي يرزقنا إن شاء الله
اشري كتب قرآن من تم وحطهم وقف في الحرم
كاين في الابراج جمعية تتبرع فيها بما تستطيع لخدمة حجاج بيت الله
اضرب الكبدة حتى تشبع رخيصة شوي
اذا تروح لجدة باش تشري حاجة قليلة غي مكالاه بسكو كيف كيف
دور و حوس واستكشف في أطراف الحرم
التيليفون حاول تخليه في غرفة الفندق تفاديا للانشغال عن العبادة
كثر من ما زمزم معاك عمر عبوات صغيرة و غلفها مليح و خبيها في وسط الملابس لانو ما يخلوكش تفوت أكثر من 5 لتر
…..
كلها نصائح مفيدة لكن فيما يخص شراء العجوة عليك بشراءها من المدينة كما قلت لكن من سوق التمور أفضل فهناك ستجد انواع كثيرة واسعار في المتناول عكس المزرعة لان اسعارها مرتفعة
اشتري مصحف وحطو ثما وقف لله اجر كبير
بارك الله فيك
من النصائح كذلك صيام بعض الايام لي يروح في غير رمضان فيها أجر إن شاء الله
أيضا كاينة نقطة ، لما يمرض واحد لا قدر الله معليه غير يتوجه لأقرب مستشفي و العلاج راح يكون مجاني حتى لو كانت عملية جراحية . تجنبوا العيادات الخاصة .
كي تروحو اقضو اوقاتكم في العبادة وليس في الأسواق لي يحب يشري للعايلة يخصص وقت ..لي يحب يعاود يجيب عمرة افضل وقت قبل الفجر ناس قليلة دير حسابك جوايه زوج تبدا تلحق مع اذان الفجر في السعي وربما تكون كملت سعي تصلي الفجر تولي للغرفة تاعك تتلقى بالإفطار الصباحي تاكل وترقد باش تلحق الظهر في المسجد
وقت المغرب او العشاء اطلعو صلو الفوووق كامل منظر ولا اروع تشوف الكعبة من فوق وناس مع طواف أجواء صح لا تجد الكلمات لوصفها….ادو معاكم دواء وبعض الماكولات الخفيفة تمر براج مكسرات حلويات عندهم ماكلة شوية غالية
ان شاء الله نزوروها ياربي 💙
شكرا بوركتم
حركتو فيا وحد الرغبة لزيارة ذلك المكان الطاهر….اللهم لا تحرمنا منه
شكرا أخي ، الله يرزق الجميع زيارة بيت الله الحرام
اللهم ارزقنا زيارة مكة و بارك الله فيك الاخ
اللهم لا تحرمنا يارب
بوركت اخي الكريم .
دخول برج الساعة مجاني ويخلوك تروح للقمة (ماشي ڨاع فوق) باه تشوف الكعبة من البرج
بارك الله فيك
ركز على شراء حوايج واجيبهم هدايا وتخسر حوالي عشر ملاين هدايا فقط على حوايج قادر تشريهم في جزاير بثمن رخيس. الافضل كما ذكرت (من غير تمر العجوة وماء زمزم كلش كاين في جزاير ورخيص على ثم فاشري هنا افضل بكثيير وشارجي كابتك بالماء خيير)
واذا حاب تشري في السعودية الافضل تشري في المدينة لانها ارخص من مكة.
كي يأذن راهم يسكرو الطريق للصحن (الافضل هنا تبقا واقف ثم قدام الدروج لانو بمجرد يقومو الصلاة راهم يفتحوها باه يتعمر الصحن ) شحال من مرة نلحق متأخر ندير هذي العفسة ونهبط نصلي في الصحن.
اللهم ارزقنا زيارة بيتك ااشريف
ربي يرزقنا عمرة قريبا عاجلا غير آجل 🌹
عمرة مقبولة أن شاء الله
اللهم ارزقنا زيارة بيت الله الحرام🤲🤲
ربي يتقبل نوصيك مضيع حتي وقت في مكة اقضي وقتك جوار الكعبة اذا امكن وخصتا في رمضان اكثر من الصلاة قراة القران والدعاء وفقك الله
ولا حبيت تشري هدايا للاقارب ماتشريش من تما خاطرش غاليين لان التجار كاريين غالي وزيد الثقل تاعهم اشري عند لي يبيعو بالجملة من الجزائر مور ما ترجع