السلام عليكم الجزء الثاني : كيفاش دير عمرة حر نبداو با المدينة نبه خاوتي لي يح

السلام عليكم
الجزء الثاني : كيفاش دير عمرة حر
نبداو با المدينة نبه خاوتي لي يحب يصلي في الروضة راهي ولات با الحجز ميخلوكش تدخل بلا حجز غير ادا صخرلك ربي شرطي تدخل طلع تطبيق نسك هنا في دزاير تم ميطلعش كي طلعو احجز هنا دير لمدة شحال تريح فل المدينة يعطوك التوقيت تاعك تدخل بيه وتصلي في روضة النبي صلى الله عليه وسلم،
الأكل في المدينة ناقص شويا لواحد يدير حسابو يديباني غير حوايج خفاف اصلا تما ابروفيتي الصلاة والعبادة ،
الدروس تاني لي يحب يستفاد في مكة والمدينة بعد كل صلاة كاين حلقات ،
ديما ادي صاشي معاك دير فيه الحذاء أكرمكم الله بسك يتخلطو بزاف ،
المزارات خاوتي لي يحب يزور الأحسن ديرهم صباح باه مضيعش الصلاوات فل الحرم كاين جبل أحد و المقبرة لي مدفونين فيها الصحابة شهداء احد وفيه سوق تاني ،
مسجد قباء اول مسجد بناه النبي صلى الله عليه وسلم في الإسلام السنة تدخل تصلي فيه ركعتين لا أكثر ،
البقيع مقبرة بجانب الحرم بعد كل صلاة كاين جنازة تقدر تدخلها تشوف المقبرة ولك قراطان من الأجر تاع صلاة الجنازة واتباعها ،
هذو الأصل سنة مليح تزورهم ولي عندو الوقت كاين بلايص اخرين ،
مكة : عندك العمرة تلحق لمكة ديرها اي وقت تدخل با الإحرام تاعك كاين أبواب مخصصة تلحق تم تسقسي يوريولك
تنبيه برك خاوتي اذا تيسر لك الوصول للحجر الأسود و الملتزم اللهم بارك اذا كان الغاشي مطبعش تدي الإثم شاور لها من بعيد كما قال النبي صلى الله عليه وسلم يكفي ،
با النسبة لي يحب يصلي فل الكعبة اذا تيسر لك أحد صلوات في وقت العمرة اللهم بارك بسك ميخلوكش تدخل بدون احرام واذا لبستو لغير العمرة تعتبر غش افيتيها ،
عندك طواف الوداع تقدر ديرو فتوسعة لفوق ولا مليحة الواحد يطوف نافلة كل يوم لي يقدر فتوسعة ،
مزارات مكة : جبل عرفات غار ثور مزدلفة غار حراء تروحلهم فطاكسي نيقوصي على سومة فنص متنساش
العملة : الريال 1 ريال = 50.5 دج / 100 ارو جيبلك حوالي 400 ريال متصرفش قاع دراهمك صرف بشويا ،
ماء زمزم با النسبة لي عندهم فيزا سياحية ميقدرش يشري الماء فل المطار ولي عندو فيزا عمرة يشري عادي بيدون 5l ب 8.5 ريال ،
شريحة الهاتف : متشريش فل المطار كي تلحق لمكة ولا لمدينة روح لمحطات البيع خير بعقلك الله اعلم زين مليحة فلنترنات وسومة ،
الميزان ار الجيري عندك حتى ل 50 kg زوج كبات وحقيبة يد وصاكودو تقدر تماصكي قرع ماء صغار اغلقهم مليح بصكوتش وزربعهم فل الكابة ولا بدون تاع خمسة في وسط الإحرام سيلوفان وسكوتش ،
مع الخطوط التركية انسا جوز الماء فل الكابة ينحوهلك
العطر لي حب يشري خاوتي اشري اورجينال دير فيه لافار مشي اورجينال متشقاش كاين هنا فدزاير ،
نختمو بنصيحة اغتنم وقتك فصلاة في الحرم قرأة القرأن واخطيك متليفون وكاش واحد عندو استفسار نجاوبوه ان شاء الله السلام عليكم.