السلام عليكم
جيت اليوم نشارك معاكم تجربتي وسفرتي إلى شرم الشيخ والقاهرة لمدة 8 ليالي.
اولا ، ريزارفيت مع وكالة فندق متواضع ( قمر سينا ) (الغرفة كانت مطلة على لابيسين ) tt inclus( فطور غداء عشاء مشروبات )
و تذاكر الطيارة مع Turkish Airlines ( اسكال في اسطنبول )
و توصيل من المطار للفندق ، سعر الفندق + التذكرة ب 99000دج
للعلم شرم الشيخ بدون فيزا للجزائريين شرط عدم البقاء اكثر من 15 يوم
بعد الوصول الى المطار ، لقينا السيد يستنا ووصلنا للفنادق تاعنا ودرنا check in على الساعة 1 ليلا على مااظن
في الصباح فطرنا و دخلنا لابيسين ومع العشية درنا حفلة ليلية في يخت مع عشاء ( مأكولات بحرية و مشروبات ) وموسيقى و رقص شرقي ب 400 جنيه
) للتوضيح 1 اورو = 33 ج في البنك و 37\38 في السوق السوداء ) يعني راح تلقاو الاسعار رخيصة مقارنة بالدينار الجزائري
اليوم الثاني رحنا للبحر كان صخري بالصح نظيف تتفرج فيه و تعوم حتى مع الاسماك تهبل ( كان كاين نقل مجاني من الفندق )
وفي الليل خرجنا للسوق القديم رحنا بتاكسي 35ج
التاكسي نتا وشطارتك، لازم تنيقوسيي معاهم يقولك 200 ج قولو 50 ،السوق القديم فيه جامع الصحابة صورنا تم صورنا واحد يقولك 20 ج للصورة وانت وشطارتك تاني.عندهم محلات تقليدية كبيرة وتقدر تحوس مليح فيه
اليوم الثالث، درنا خرجة ولا اروع لاكبر واجمل محمية رأس محمد و معاها الجزيره البيضاء
من 8 صباحا حتى 6مساءا ، كي العادة جاو داونا من الفندق
كان الغداء والمشروبات داخلين في السعر
الغوص اذا سلكت مع البداية تسلك 200 ج فقط بالصح حنا كنا مازال ماديسيديناش يسما كي حبينا نديرو في وسط الرحلة سلكنا 400ج الغوص تجربة روعة تشوف حوت ملون ومرجان روعة، سمك نيمو البرتقالي كيما الرسوم هههه عندهم مصور تحت الماء يصورك و انت اذا تحب تشري الصور ولا لالا
بعدها رحنا للجزيرة البيضاء ويسموها جزيرة مالديف، تعوم وحد 20 م و تلقا روحك في يابسة بيضاء في وسط البحر
كملنا الدورة في البحر، وبزاف هبطو دارو اسكنورلينج( الادوات تكريهم ) و يهبط معاهم ماترناجور ويدورك وتشوف وتعوم مع بزاف حوت باهي وروحنا على الستة تاع العشية
في الليل رحنا لسوهو سكوير تشبه لقاردن سيتي بالصح كييرة وفيها بزاف محلات و نافورة الراقصة(ترقص على صوت الموسيقى) شرينا من المول اللي تم من عند ابو نواف دقلة مغلفة بالشوكولاطة، حلقوم، عسل بالبرقدوش و حبة البركة الاسعار كانت معقولة جدا عندو.تاكسي من الفندق للسوهو ب 400 ج ذهاب واياب لانو بعيد,
اليوم الرابع درنا كواد في الصحراء وشربنا الشاي العربي و هاذي 300ج السيارة(2اشخاص) مع النقل من و الى الفندق،
في الليل خرجنا درنا شوي من بعد الانطلاقة للقاهرة في الحالة ب 45 يورو للشخص هي من المفروض لازم فيزا ب 25 دولار لكن حنا قالولنا كي عدتو جزائريين حنا نتحملو مسؤوليتكم( تسما ربحنا 25 دولار للشخص) الرحلة هاذي داخل فيها سعر الغداء و متحف مصر و الدخول للاهرامات و ابو الهول، لحقنا لمتحف مصر على الساعة التاسعة ص من بعد رحنا ركبنا في عبارة في نهر النيل ب 300 ج ثم الوجهة للاهرامات كرينا جمل ب 150 ج للشخص ،كانت روعة ثم رحنا لمتحف الزيوت والعطور ،ورجعنا لشرم الشيخ لحقنا حوالي الساعة 3 صباحا،
اليوم الموالي درنا بيسين وفي الليل رحنا لخليج نعمة فيها حوانت و مطاعم و باهية بزاف
اليوم الاخير رحنا للبحر صباح و في المساء درنا باراشيت 300ج للشخصين مع النقل من و الى الفندق،في الليل رحنا تعشينا كبدة اسكندراني مع شاورما مصرية (كبدة 20 ج ) من ثم رحنا لمقهى فرشة من أجمل المقاهي في العالم ،وعلى الساعة 11 في الليل جانا النقل رحنا للمطار لانو الرحلة كانت على الساعة 1 صباحا.
هاذ للرحلة مع كامل المصاريف حوالي 16 مليون ( كاين مصاريف زيادة كنت نشري حوايج زيادة انا للعائلة كامل ماء مثلجات .شيبس ونخلص التاكسي+هدايا …..)
#1001_سياحة
#1001_مصر
بصحتكم
🥰🥰🥰
بصحتكم … جيت نرسل لك في الخاص لقيت المنشور انونيم … ياريت تتكرم و تقولي اسم الوكالة او تعطيني الطريقة كفاش ندير انا ثاني
شحال راهي تدكرة لشرم الشيخ ؟