السلام عليكم خاوتي اليوم بغيت نهدر على وحد السيري لي شاعت بزاف مؤخرا و اللي هي From
مستوى السلسلة راه في تساقط مستمر بعد الموسم الأول اللي كان ممتاز مرورا بالموسم الثاني اللي كان شوية شوية و أخيرا الموسم الثالث اللي رجع السيري أضحوكة بالنسبة ليا صراحة
أولا، في سيريات الغموض الحاجة اللي تشد المتابع بطبيعة الحال هي الأسئلة و الفصول اللي يخلي المشاهد يكمل المشاهدة باش يعرف واش راه صاري، لكن الحاجة اللي تكره المشاهد فالمتابعة هي كثرة الأسئلة بدون أجوبة و الغموض لمجرد الغموض، كاين اللي راح يجي يقولي هادي هي الgenre كيما هاك، لا لا أخي نعطيك مثال في سيري أخرى اللي هي أنمي هجوم العمالقة كانت فيه كمية غموض و تساؤلات بالجملة لكن الكاتب كان كل شوية يعطيك إجابة عن شيئ و في نفس الوقت يخليك تطرح أسئلة أخرى جديدة حتى النهاية وين يكون جاوبك على كل شيئ يعنى ماشي 3 سيزون و نتا تشوف في اشياء معندك حتى فكرة عليها.
ثانيا، بعيدا عن مشكلة الغموض المبالغ فيه و انعدام الأجوبة اللي نقدر نتغاضى عليها، السيري فيها مشكلة أكبر و هي التمثيل و الحوارات الصبيانية تقول طفل صغير راه يكتب، مثلا العراك اللي صرا فالحلقة الأخيرة بين جيم و ثابيثا لوكان عطاوه ل chatgpt يدير حوار أفضل منه.
النقطة الثالتة و الأخيرة و هي كثرة ال plotholes و القرارات الغير منطقية اللي تأخدها بعض الشخصيات، مثلا شخصية Kristi تقرى السنة الثالثة ميدسين تعرف دير أصعب العمليات بلا ما نذكر العلاقة المقززة تاعها مع صحبتها اللي ما فيها أدنى فائدة حالها حال Elis و فاطمة و غيرهم من الشخصيات اللي حرفياً مايديرو والو عندك برك بويد و جايد و بعض الشخصية القليلة الأخرى أما الباقي كلهم NPCs تكملة عدد و فقط.
في نظري السلسلة هادي أخدت فوق حقها بزاف، و إذا كمل السيزون الثالث بدون أي إجابة أو حدث كبير. سأجد صعوبة كبيرة في تكملة بقية الموسم.
سيري دات فوق حقها بسك جزء لول كان مليح و مكنش فيه هذو الاحداث الغير منطقية و تمطيط هذا
لوكان بدات كيما هكا واحد ميتفرجها
خويا كاين حاجة السيري كي تشيع معناها اغلبية الناس اتفقو على انهم عاجبتهم حتى لو تختلفت انت في الرأي ماتقدرش تقنعهم بواش راك تقول باسكو الشاغم تاعها كي تبقا تتسائل و تربط الاحداث و الرموز ببعضاها
و زيد تقييمها في imdb 7.8 يعني متواضع ماراهش 9 ولا 8.9 بخصوص النقاط لي ذكرتها
كريستي دير عملية ماشي حاجة غريبة تخصص تاعها و و زيد فلم .. المثلية و العياذ بالله راني معاك اما الادوار الاخرى لي قلت عليهم يعمرو بلاصة باسكو الممثلين الاقوياء راهم هوما لي يمشو سيري ( فيكتور . ثابيتا . بويد . هينري جايد )
أوافقك الرأي و بشدة، و بالنسبة لكريستي، فعلا حاجة خيالية، سنة 3 طب رانا مزلنا نتعرفو على أعضاء الجسم، لمخير فينا يعرف يخيط جرح صغير، فمابالك عملية و ايكوغرافي و تشخيص لمختلف الأمراض