السلام عليكم
اليوم حاب نشارك معاكم تجربة رحلة سياحية لمصر الشقيق
لي ناسو طيبين بزاف لدرجة كبيرة ومن ابسط حاجة يديرو جو مرح ويحبونا بزاف صراحة. وافضل وقت لزيارتها اواخر سبتمبر وبداية اكتوبر تكون الحرارة معتدلة والغاشي ناقص تلقا غير الأجانب تقريب فالاماكن السياحية.
الفيزا تخرجها من السفارة خلال 7-15 يوم باوراق بسيطة مقابل 10500دج او تروح لاي وكالة سياحية يخدمولك خطاب ضمان من وكالة سياحية مصرية ب 4000-6000دج وكي تلحق للقاهرة تخلص 25$ يعطولك فيزا تدخل بيها.
الطيارة كي تڨابرها بكري تلقاها ب 48 وتطلع حتى فوق 60 تبقا هادي عليك. فالمطار اشري شريحة اتصالات ب 200 جنيه (1 جنيه = 7دج) فيها 15 جيقا وهدرة هي الارخس واحكم indrive وماتسمعش للطاكسيات
من الافضل تكري في القاهرة القديمة باش يكون اغلب المعالم السياحية قراب ليك وتعيش التجربة المصرية الاصيلة وتربح دراهم ترونسبور في جيبك للعلم عندهم تطبيق indrive وهو يمدلك اقل الاسعار مقارنة بالتطبيقات الاخرى وسعرو كيما دزاير تقريب. وعندهم الميكروباصات بصح مافهمتهمش صراحة لازمك تعرف ليزاري تاعهم. وكاين عندهم المترو تاني مليح وعندو شبكة كبيرة داخل القاهرة ورخيس تاني.
القاهرة اقل فترة تقعد فيها 4-5 ايام واقل من ذلك مايتسماش رحت لمصر ومايلزمش تكري في اوتال فخم حوس على اي غرفة في شقة ولا مرقد برك تحط فيه راسك فالليل الباقي راك برا. معمرة متاحف ومعالم كيما الأهرامات وقصر عابدين وقلعة صلاح الدين ومجمع الأديان والمتحف المصري ومتحف الحضارة الاسلامية ويرج القاهرة وجامع وحديقة الازهر ومسجد عائشة ومسجد الحسين….. خان الخليلي وشارع المعز وسوق العتبة والمولات… لي تروحلهم بالليل بلا ماتنسا النيل وممشى اهل مصر وتدي جولة تم في قارب من الافضل تكون وقت الغروب. هادو قاع واكثر تذاكر الدخول يا اما مجانية او بين 20-60 جنيه تقريبا
الأكل متنوع ورخيس عندهم ولازم تجرب اكل الشوارع تاعهم تجربة لا توصف 😅 تعمر كرشك ب 20-60 جنيه وتضرب عصير مانڨو ب 20 جنيه 😋 وتروحو لمحل الكرنك وتطلبو وجبة القنبلة ألذ salde de fruits كليتها في حياتي ب 50 جنيه اشفاو على الاسم وحوسو عليه فاليوتوب.
تقدر تروح للاسكندرية على نهار رايح جاي بالقطار لي يدير ساعتين طريق
من الافضل تدو معاكم دولار ماشي اورو خاطرش مطلوب أكثر وحاولو نشوفو مع لي تكريو عندو يصرفلكم يعطيكم سعر السوق السوداء خير من البنك تلقاو فرق تاع 10 جنيه تقريبا فالدولار الواحد.
مانيش موجد من قبل كل مانتفكر حاجة راني نكتبها هههههه والمنشور راه طويل ديجا وقت آخر ان شاء الله نشارك معاكم رحلة شرم الشيخ اذا حبيتو ولي عندو سؤال يحطو فالتعليقات نحاول نجاوب بلي نعرف
